MAREKA 14

₁Matsatsi a ne a sa tla ba mabedi, e ntoo ba Paseka le mahobe a se nang ditomoso. Baprista ba baholo le bangodi ba ne ba batla mokgwa wa ho tshwara Jesu ka bohlale, ba tle ba mmolaye. ₂Empa ba ne ba re: A e se be mohla mokete, esere mohlomong moferefere wa eba teng hara setjhaba.

₃Yare ha a le Bethania, tlung ya Simone molepera, a dutse dijong, ha fihla mosadi ya nang le pitsa ya alebastera, e tletseng setlolo sa nareda ya sebele, se theko e thata; a bolaya pitsa ya alebastera, a se tshela hloohong ya Jesu. ₄Ba bang ba itlhonamela, ba re: Tshenyeho eo ya setlolo e thusitseng? ₅athe se ka be se rekile didenare tse fetang makgolo a mararo, tsa newa bafumanehi. Ba itshena ho mosadi eo jwalo. ₆Empa Jesu a re: Mo leseng; le mo utlwisetsang bohloko? O nketseditse ketso e molemo. ₇Hobane haele bafumanehi, le tla nne le be le bona kamehla, mme le tla tseba ho ba etsa hantle mohla le ratang; empa nna, le ke ke la ba le nna kamehla. ₈O entse seo a neng a ka se etsa; o tlile pele ho tlotsetsa mmele wa ka ho epelwa. ₉Kannete ke re ho lona: Hohle lefatsheng moo Evangeli ena e tla bolelwa teng, se entsweng ke yena le sona se tla bolelwa, a tle a hopolwe ka sona.

₁₀Judase Iskariota, e mong wa ba leshome le metso e mmedi, a ya ho baprista ba baholo, a tle a ba neele Jesu. ₁₁Ha ba mo utlwa, ba thaba, mme ba mmalla hore ba tla mo nea ditjhelete. Jwale, a batla sebaka sa ho ba neela yena.

₁₂Ka letsatsi la pele la mokete wa mahobe a se nang ditomoso, e leng leo ho hlajwang Paseka ka lona, barutuwa ba hae ba re ho yena: O rata ha re ya o lokisetsa kae, o tle o je Paseka? ₁₃Yaba o roma barutuwa ba hae ba le babedi, a re ho bona: Eyang motseng, mme le tla kgahlana le motho ya jereng nkgo ya metsi; le mo latelle. ₁₄Moo a kenang teng, le bolelle monga ntlo, le re: Moruti o re: Ntlo e kae eo ke tla jela Paseka ho yona le barutuwa ba ka? ₁₅O tla le bontsha ntlo e kgolo, e kahodimo, e kgabisitsweng, e lokisitsweng; le re lokisetse hona teng. ₁₆Barutuwa ba hae ba tloha, ba kena motseng, ba fumana ho le jwalokaha a ba boleletse; mme ba lokisa Paseka.

₁₇Ha e se e le ka shwalane, a ya teng le ba leshome le metso e mmedi. ₁₈Ha ba dutse ba eja, Jesu a re: Kannete ke re ho lona: E mong wa lona, ya jang le nna, o tla nkeka. ₁₉Yaba ba qala ho swaba, le ho mmotsa e mong le e mong, ka ho re: A ke nna na? A ke nna na? ₂₀A araba, a re ho bona: Ke e mong wa ba leshome le metso e mmedi, yena ya kenyang letsoho le nna morifing. ₂₁Haele Mora Motho, o ikela jwalokaha ho ngodilwe bakeng sa hae; empa ho madimabe motho eo, eo Mora motho a ekwang ke yena! Ho ka be ho le molemo ho motho eo, hola a se ke a tswalwa.

₂₂Ba re ba sa ja, Jesu a nka bohobe, mme eitse hobane a boke, a bo ngwatha, a ba nea bona, a re: Nkang, le je; hona ke mmele wa ka. ₂₃A ntoo nka senwelo, a leboha, a ba nea sona; mme ba nwela ho sona bohle. ₂₄A re ho bona: Hona ke madi a ka, a selekane se setjha, a tshollelwang ba bangata. ₂₅Kannete ke re ho lona: Ha ke sa tla hlola ke enwa se behwang ke morara, ho tla be ho fihle tsatsi leo ke tla se nwa se le setjha mmusong wa Modimo.

₂₆Eitse hobane ba bine dithoko, ba ya thabeng ya Mehlwaare.

₂₇Jesu a re ho bona: Bohle le tla kgoptjwa ho nna bosiung bona; hobane ho ngodilwe, ho thwe: Ke tla otla modisa, mme dinku di tla qhalana. ₂₈Empa, etlare hobane ke tsohe, ke tla le etella pele ho ya Galelea. ₂₉Petrose a re ho yena: Leha bohle ba ka kgoptjwa, haele nna, tjhe! ₃₀Jesu a re ho yena: Kannete ke re ho wena: Wena, kajeno, ka bona bosiu bona, mokoko ha o eso ho lle habedi, o tla be o se o ntatotse hararo. ₃₁Ebile Petrose o tlodisa puo, a re: Leha ho ka thwe, ke shwe le wena, nke ke ka ba ka o latola. Mme bohle ba rialo le bona.

₃₂Ba ya nqalong e bitswang Gethesemane. Jwale, a re ho barutuwa ba hae: Dulang mona, ke tle ke be ke rapele. ₃₃A ntoo ya le Petrose, le Jakobo, le Johanne, mme a qala ho tshoha haholo le ho tsieleha. ₃₄A re ho bona: Moya wa ka o tshwerwe ke maswabi a isang lefung; salang mona, mme le fadimehe. ₃₅A ya pejana, a wela fatshe, a rapela hore, ha ho ka etswa, hora eo e mo fete. ₃₆O ne a re: Abba, Ntate! tsohle o ka di etsa; tlosa senwelo sena pela ka; empa, ho se ke ha etswa seo nna ke se ratang, ho etswe seo wena o se ratang. ₃₇A boya, a ba fumana ba robetse; a re ho Petrose: Simone, na o robetse? O sitilwe ho fadimeha hora e le nngwe na? ₃₈Fadimehang, le rapele, hore le se kene molekong; hobane moya o mafolofolo, empa nama yona e a fokola. ₃₉A boela a ya, a rapela, a bolela wona mantswe ao. ₄₀Eitse hobane a kgutle, a ba fumana ba boetse ba robetse; hobane mahlo a bona a ne a le boima; ba ne ba sa tsebe seo ba ka mo arabang sona. ₄₁A tla la boraro, a re ho bona: Robalang jwale, le kgatholohe! Ho a lekana; hora e tlile. Bonang, Mora motho o se a ya neelwa matsohong a baetsadibe. ₄₂Emang, a re yeng; bonang, ya nkekang o se a le haufi.

₄₃Kapelepele, ha a sa rialo, ha hlaha Judase, e mong wa ba leshome le metso e mmedi, a ena le sehlopha se seholo, se tshwereng disabole le melamu, se rometswe ke baprista ba baholo le bangodi le baholo. ₄₄Ya mo ekang o ne a ba neile pontsho, a re: Eo ke tla mo aka, ke yena; le mo tshware, mme le ye le yena, le mo tiisitse. ₄₅Ha a fihla, a phakisa a atamela Jesu, a re: Rabbi! Rabbi! a ba a mo aka. ₄₆Yaba ba isa matsoho a bona ho yena, ba mo tshwara.

₄₇Jwale e mong wa ba leng teng a tsomola sabole, a hlatha mohlanka wa moprista e moholo, a mo kgaola tsebe.

₄₈Jesu a bua, a re ho bona: Le tswile hae ho tla ntshwara ka disabole le ka melamu, jwalokaha eka ke leshodu. ₄₉Ke ne ke ntse ke dula le lona ka tsatsi le leng le le leng tempeleng, ke ruta, mme ha le a ka la ntshwara; empa e le hore Mangolo a phethahale.

₅₀Jwale, barutuwa bohle ba mo tlohela, ba baleha.

₅₁Mohlankana e mong o ne a mo latela, a apere kobo ya bosiu feela; bahlanka ba mo tshwara; ₅₂empa yena a ba tlohella kobo, a baleha a le feela.

₅₃Jwale ba isa Jesu ho moprista e moholo. Baprista ba baholo bohle le baholo le bangodi ba phuthehela teng. ₅₄Petrose yena a mo latela a le hole, a ba a kena lebaleng la moprista e moholo; a dula le bahlanka, a ikomosa mollong.

₅₅Jwale, baprista ba baholo le lekgotla lohle ba batla bopaki bo ka qosang Jesu, ba tle ba mmolaye; empa ha ba ka ba bo fumana. ₅₆Hobane ba bangata ba ne ba mo qosa ka bohata, empa taba tsa bopaki ba bona di ne di sa dumellane. ₅₇Ba bang ba ema, ba mo qosa ka bohata, ba re: ₅₈Re mo utlwile a re: Ke tla qhaqha tempele ena e entsweng ka matsoho, ke hahe e nngwe ka matsatsi a mararo, e sa etswang ka matsoho. ₅₉Empa le teng taba tsa dipaki tseo di ne di sa dumellane. ₆₀Yaba moprista e moholo o ema kahare, a botsa Jesu, a re: Na ha o arabe letho na? Seo bao ba o qosang ka sona keng? ₆₁A mpa a kgutsa, a se ke a araba letho. Moprista e moholo a boela a mmotsa, a re ho yena: Na ke wena Kreste, Mora wa Modimo o bokwang na? ₆₂Jesu a re: Ke yena; mme le tla bona Mora motho a dutse letsohong le letona la matla a Modimo, a etla ka maru a lehodimo! ₆₃Jwale, moprista e moholo a hahola dikobo tsa hae, a re: Re sa batlelang dipaki? ₆₄Le utlwile nyefolo. Lona, le reng? Bohle ba mo tswa, ba re, o tshwanelwa ke lefu. ₆₅Yaba ba bang ba qala ho mo tshwela ka mathe, ba mo kwahela mahlo, ba mo jabela, ba re ho yena: Porofeta! Mme bahlanka ba mo otla ka dithupa.

₆₆Petrose a sa ntse a le katlase, lebaleng, ha fihla lekgabunyane le leng la moprista e moholo. ₆₇Ha le bona Petrose a ntse a ikomosa, la mo tadima, la re: Le wena o ne o na le Jesu wa Nasaretha. ₆₈A mpa a latola, a re: Ha ke tsebe, ha ke utlwe seo o se bolelang. Mme a tswela ntle, kgotlwaneng. Yaba mokoko o a lla. ₆₉Lekgabunyane ha le mmona, le boela la qala ho re ho ba emeng moo: Enwa ke wa bona! ₇₀Yena a mpa a boela a latola. Ho se hokaenyana, ba emeng moo ba re ho Petrose: O wa bona ruri, hobane le wena o Mogalelea, le puo ya hao eka ya teng. ₇₁Jwale, a qala ho hlapanya le ho ana, a re: Motho eo le mmolelang ha ke mo tsebe. ₇₂Yaba mokoko o lla la bobedi. Jwale Petrose a elellwa seo Jesu a neng a mmoleletse sona, kamoo a neng a itse kateng: Mokoko ha o eso ho lle habedi, o tla be o se o ntatotse hararo. Mme a qala ho lla.