MAREKA 9

₁Le hona a re ho bona: Kannete ke a le bolella, ke re: Ba bang ba teng ho ba emeng mona, ba ke keng ba utlwa ho shwa, ba eso ho bone mmuso wa Modimo o etla ka matla.

₂Kamora matsatsi a tsheletseng, Jesu a nka Petrose, le Jakobo, le Johanne, a ya le bona ba nnotshi hodima thaba e telele. Yaba o fetoha pontsheng ho bona; ₃diaparo tsa hae tsa fetoha, tsa benya, tsa eba tshweu jwaloka lehlwa, kamoo ho seng mohlatswi lefatsheng kateng, a ka tsebang ho sweufatsa hakalo. ₄Mme Elia le Moshe ba hlaha ho bona, ba buisana le Jesu. ₅Yaba Petrose o bua, a re ho Jesu: Rabbi, ho molemo ha re ka dula mona; ha re etseng metlotlwane e meraro: o mong e be wa hao, o mong e be wa Moshe, o mong e be wa Elia. ₆Hobane o ne a sa tsebe seo a se bolelang, etswe ba ne ba tshohile haholo. ₇Yaba leru le a tla, la ba kgurumetsa, ha ba ha tswa lentswe lerung, la re: Enwa ke Mora wa ka ya ratwang; mo utlweng. ₈Ba phakisa ba qamaka, empa ba se ke ba hlola ba bona motho e mong ho bona haese Jesu a nnotshi.

₉Eitse ha ba theoha thabeng, a ba laya hore ba se ke ba bolella motho seo ba se boneng, haese mohla Mora motho a seng a tsohile bafung. ₁₀Ba boloka polelo eo ka ho bona, ba botsana hore ho tsoha bafung ke ho reng na?

₁₁Yaba ba mmotsa, ba re: Bangodi ba bolela keng hore e ka kgona Elia a tle pele? ₁₂A araba, a re ho bona: Efela Elia o tshwanetse ho tla pele, a lokise tsohle; mme ho ngodilwe jwang bakeng sa Mora motho hore e ka kgona a utlwiswe bohloko bo boholo, mme a nyediswe? ₁₃Empa ke re ho lona: Elia o se a tlile, mme ba mo entse kahohle kamoo ba ratileng kateng, jwalokaha ho ngodilwe bakeng sa hae.

₁₄Ha a fihla ho barutuwa ba bang, a bona bongata bo boholo bo ba teetse hare, le bangodi ba pheile kgang le bona. ₁₅Yare ha bongata bohle bo mmona, ba tshoha, mme ba mo mathela ho mo dumedisa. ₁₆A botsa bangodi, a re: Le pheile kgang ya eng le bona? ₁₇E mong hara bongata a araba, a re: Moruti, ke tlisitse mora wa ka ho wena, o na le moya o sa bueng. ₁₈Hohle ha o mo tshwara, o mo teanya fatshe, a ntshe makweba, a tsikitlanye meno, a omelle; ke boleletse barutuwa ba hao hore ba o leleke, ba mpa ba sitwa. ₁₉Yaba o araba, a re: Jo! moloko o sa dumeleng, ke tla ba le lona ho isa kae? ke tla le behela pelo ho isa kae? Mo tliseng ho nna. ₂₀Ba mo tlisa ho yena. Yare ha ngwana a bona Jesu, moya wa mo sisinya ka bohale, a wa fatshe, a bidikana, a ntse a ntsha makweba. ₂₁Yaba Jesu o botsa ntatae, a re: Motsotso o se o le o kae a hlahetswe ke hona hoo? A re: Ke ha a sa le monyenyane; ₂₂mme o mo lahletse hangata mollong le metsing, o tle o mo timetse. Empa ha o ka tseba ho thusa, re utlwele bohloko, mme o re thuse. ₂₃Jesu a re ho yena: O reng ha o re, ha nka tseba ho thusa? Dumela: tsohle di ka etsetswa ya dumelang. ₂₄Yaba ntata ngwana o phakisa a phahamisa lentswe ka meokgo, a re: Ke a dumela, Morena! nthuse ho se dumeleng ha ka. ₂₅Jwale, Jesu ha a bona hobane bongata bo a mo mathela, a kgalemela moya o ditshila, a re: Moya o sa bueng, o sa utlweng, ke a o laela, nna, ke re: Tswa ho yena, mme o se ke wa hlola o kena ho yena. ₂₆Yaba o tswa, o ntse o howa, o sisinya ngwana ka bohale; a ba jwaloka mofu, ba bangata ba ba ba re: O shwele. ₂₇Empa Jesu a mo tshwara ka letsoho, a mo tsosa, mme a ema.

₂₈Yare ha Jesu a kene tlung, barutuwa ba hae ba mmotsa ba nnotshi, ba re: Rona ha re a ka ra tseba keng ho leleka motemona eo? ₂₉A re ho bona: Mofuta oo ha o tswe, haese ka thapelo le ka ho itima dijo.

₃₀Ha ba tloha moo, ba haola Galelea. Jesu o ne a sa rate ha a ka tsejwa ke motho. ₃₁Hobane o ne a ruta barutuwa ba hae, a re ho bona: Mora motho o tla neelwa matsohong a batho; ba tla mmolaya, mme hobane a bolawe, o tla tsoha ka tsatsi la boraro. ₃₂Empa ba se ke ba utlwisisa taba eo, mme ba tshaba ho mmotsa.

₃₃Ba fihla Kapernauma. Ha ba le tlung, Jesu a ba botsa, a re: Le ne le tsekisana ka dife tseleng? ₃₄Empa ba kgutsa, hobane tseleng, ba ne ba tsekile hore na e moholo ho bona ke mang. ₃₅Hobane a dule, a bitsa ba leshome le metso e mmedi, a re ho bona: Ha e mong a rata ho ba wa pele, e tla ba ya kamorao ho bohle le mohlanka wa bohle. ₃₆Yaba o nka ngwana, a mmea hara bona, mme ha a mo sikile, a re ho bona: ₃₇E mong le e mong ya amohelang e mong wa bana ba jwalo, ka lebitso la ka, o amohela nna; mme e mong le e mong ya nkamohelang, ha a amohele nna, empa o amohela ya nthomileng.

₃₈Jwale Johanne a bua le yena, a re: Moruti, re bone e mong ya sa re lateleng a leleka batemona ka lebitso la hao, mme re mo hanetse, kahobane a sa re latele. ₃₉Empa Jesu a re: Le se ke la mo hanela; hobane ha ho motho ya ka phakisang a mpolela hampe, ha a entse mohlolo ka lebitso la ka. ₄₀Hobane ya sa re lwantsheng, o a re emela. ₄₁E mong le e mong ya le nosang mohope wa metsi ka lebitso la ka, kahobane le le ba Kreste, kannete ke re ho lona: Ha a ka ke a timellwa ke moputso wa hae.

₄₂Haele ya ka kgopisang e mong wa ba banyenyane bana ba dumetseng ho nna, ho ka bang molemo ho yena ke ho tlamellwa lelwala le leholo molaleng, a lahlelwe lewatleng. ₄₃Letsoho la hao ha le o dihela, o le kgaole; ho ka bang molemo ho wena ke ha o kena bophelong o le tsohane, e seng ho ya diheleng, mollong o sa timeng, o ena le matsoho a mabedi; ₄₄moo seboko sa bona se sa shweng, le mollo o sa timeng. ₄₅Leoto la hao ha le o dihela, o le kgaole; ho ka bang molemo ho wena ke ha o kena bophelong o le sehlotsa, e seng ho lahlelwa diheleng, mollong o sa timeng, o ena le maoto a mabedi; ₄₆moo seboko sa bona se sa shweng, le mollo o sa timeng. ₄₇Leihlo la hao ha le o dihela, o le honye; ho ka bang molemo ho wena ke ha o kena mmusong wa Modimo o le moihlwe, e seng ho lahlelwa mollong wa dihele o ena le mahlo a mabedi; ₄₈moo seboko sa bona se sa shweng, le mollo o sa timeng. ₄₉Hobane e mong le e mong o tla nokwa ka mollo, mme sehlabelo se seng le se seng se tla nokwa ka letswai. ₅₀Letswai le molemo; empa letswai ha le tapa, le ka le noka kang? Le be le letswai ka ho lona, mme le ahisane ka kgotso.