NEHEMIA 7

₁Eitse hobane lerako le phethehe, ka kenya mamati a menyako, mme balebedi ba bewa kabelong ya bona, le tsona dibini, le Balevi. ₂Ka bea Hanani ngwaneso, le Hanania, molaodi wa qhobosheane, hore ba lebele Jerusalema; hobane e ne e le monna wa sebele, ya tshabang Modimo ho feta, ₃ka re ho bona: Menyako ya Jerusalema e se ke ya bulwa haese ha letsatsi le se le futhumetse; ha lona le sa ntsane le eme teng, ho ke ho kwalwe menyako, mme e tiiswe ka mekwallo; ba ahileng Jerusalema le ba etse balebedi, e mong le e mong sehlopheng sa hae, e mong le e mong maloka le ntlo ya hae. ₄Hobane motse o ne o le batsi, o le moholo, empa setjhaba sa teng se ne se se sekae, le wona matlo a ne a eso ho hahuwe.

₅Yaba Modimo wa ka o kenya pelong ya ka kgopolo ya ho phutha baholo le mahosana le setjhaba, hore ba balwe ka masika a bona. Ka fumana buka ya masika a ba neng ba tlile pele, ka fumana teng ho ngodilwe, ho thwe:

₆Ke bana batho ba naha ba kgutlileng kgolehong ba neng ba isitswe kgolehong ke Nebukadnesare, morena wa Babilona, ba boetseng ba kgutletse Jerusalema le Juda, e mong le e mong motseng wa habo, ₇ba tlileng le Sorobabele, le Joshua, le Nehemia, le Asaria, le Raamia, le Nahamani, le Mordekai, le Bilshane, le Misperethe, le Bigvai, le Nehume, le Baana.

Palo ke ena ya banna ba setjhaba sa Iseraele: ₈Bana ba Pareoshe ba kete tse pedi tse nang le lekgolo le mashome a supileng a metso e mmedi; ₉bana ba Shefathia ba makgolo a mararo a mashome a supileng a metso e mmedi. ₁₀Bana ba Arake ba makgolo a tsheletseng a mashome a mahlano a metso e mmedi; ₁₁baneng ba Joshua bana ba Pakathe-Moabe ba lesika la Joabe ba kete tse pedi tse nang le makgolo a robileng meno e le mmedi a leshome le metso e robileng meno e le mmedi; ₁₂bana ba Elame ba sekete se nang le makgolo a mabedi a nang le mashome a mahlano a metso e mene; ₁₃bana ba Satthu ba makgolo a robileng meno e le mmedi a mashome a mane a metso e mehlano; ₁₄bana ba Sakkai ba makgolo a supileng a mashome a tsheletseng; ₁₅bana ba Binnui ba makgolo a tsheletseng a mashome a mane a metso e robileng meno e le mmedi; ₁₆bana ba Bebai ba makgolo a tsheletseng a mashome a mabedi a metso e robileng meno e le mmedi; ₁₇bana ba Asgade ba kete tse pedi tse nang le makgolo a mararo a mashome a mabedi a metso e mmedi; ₁₈bana ba Adonikame ba makgolo a tsheletseng a mashome a tsheletseng a metso e supileng; ₁₉bana ba Bigvai ba kete tse pedi tse nang le mashome a tsheletseng a metso e supileng; ₂₀bana ba Adine ba makgolo a tsheletseng a mashome a mahlano a metso e mehlano; ₂₁bana ba Athere ba lesika la Esekiase, ba mashome a robileng mono o le mong a metso e robileng meno e le mmedi; ₂₂bana ba Hashume ba makgolo a mararo a mashome a mabedi a metso e robileng meno e le mmedi; ₂₃bana ba Betsai ba makgolo a mararo a mashome a mabedi a metso e mene; ₂₄bana ba Harife ba lekgolo le le leng le nang le leshome le metso e mmedi; ₂₅bana ba Gibeone ba mashome a robileng mono o le mong a metso e mehlano; ₂₆banna ba Bethlehema le ba Nethofa ba lekgolo le nang le mashome a robileng mono o le mong a metso e robileng meno e le mmedi; ₂₇banna ba Anathothe, ba lekgolo le mashome a mabedi a metso e robileng meno e le mmedi; ₂₈banna ba Beth-Asmavethe ba mashome a mane a metso e mmedi; ₂₉banna ba Kiryathe-Jearime le Kefira le Beerothe ba makgolo a supileng a mashome a mane a metso e meraro; ₃₀banna ba Rama le Geba ba makgolo a tsheletseng a mashome a mabedi a motso o mong; ₃₁banna ba Mikmashe ba lekgolo le nang le mashome a mabedi a metso e mmedi; ₃₂banna ba Bethele le Ai ba lekgolo le nang le mashome a mabedi a metso e meraro; ₃₃banna ba Nebo e mong ba mashome a mahlano a metso e mmedi; ₃₄bana ba Elame e mong ba sekete se nang le makgolo a mabedi a mashome a mahlano a metso e mene; ₃₅bana ba Harime ba makgolo a mararo a mashome a mabedi; ₃₆bana ba Jeriko ba makgolo a mararo a mashome a mane a metso e mehlano; ₃₇baba ba Lode le Hadide le Ono ba makgolo a supileng a mashome a mabedi a motso o mong; ₃₈bana ba Senaa ba kete tse tharo tse nang le makgolo a robileng mono o le mong a mashome a mararo.

₃₉Haele baprista, ya eba bana ba Jedaia, wa ntlo ya Joshua, ba makgolo a robileng mono o le mong a mashome a supileng a metso e meraro; ₄₀bana ba Immere ba sekete se nang le mashome a mahlano a metso e mmedi; ₄₁bana ba Pashkure ba sekete se nang le makgolo a mabedi a mashome a mane a metso e supileng; ₄₂bana ba Harime ba sekete se nang le leshome le metso e supileng.

₄₃Haele Balevi, ya eba bana ba Joshua le Kadmiele, le bana ba Hodva, ba mashome a supileng a metso e mene.

₄₄Haele dibini, ya eba bana ba Asafe ba lekgolo le mashome a mane a metso e robileng meno e le mmedi.

₄₅Haele balebedi ba menyako, ya eba bana ba Shallume, bana ba Athere, bana ba Thalmone, bana ba Akkube, bana ba Hathitha, le bana ba Shobai; ba etsa lekgolo le nang le mashome a mararo a metso e robileng meno e le mmedi.

₄₆Haele Banethinime, ya eba bana ba Tsika, bana ba Hasufa, bana ba Tabbaothe, ₄₇bana ba Keroshe, bana ba Sia, bana ba Padone, ₄₈bana ba Lebana, bana ba Hagaba, bana ba Salmai; ₄₉bana ba Hanane, bana ba Giddele, bana ba Gakare, ₅₀bana ba Reaia, bana ba Retsine, bana ba Nekoda, ₅₁bana ba Gassame, bana ba Ussa, bana ba Paseha, ₅₂bana ba Besai, bana ba Mehunime, bana ba Nefushesime, ₅₃bana ba Bakbuke, bana ba Hakufa, bana ba Karhure, ₅₄bana ba Batslithe, bana ba Mehida, bana ba Harsha, ₅₅bana ba Barkoshe, bana ba Sisera, bana ba Thema, ₅₆bana ba Netsiha, le bana ba Hathifa.

₅₇Haele bana ba bafo ba Salomone, ya eba bana ba Sothai, bana ba Soferethe, bana ba Perida, ₅₈bana ba Jaala, bana ba Darkone, bana ba Giddele, ₅₉bana ba Shefathia, bana ba Hatthile, bana ba Pokerethe-Hatsebaime, le bana ba Amone.

₆₀Kaofela ha Banethinime le bana ba bafo ba Salomone ya eba makgolo a mararo a mashome a robileng mono o le mong a metso e mmedi.

₆₁Ba bang ke ba tlohileng Thele-Melha, le Thele-Harsha, le Kerub-Addone, le Immere, ba mpa ba sitwa ho supa matlo a bontata bona, le lesika la bona le pakang hore ke Baiseraele: ₆₂Ke bana ba Delaia, le bana ba Tobia, le bana ba Nekoda ba makgolo a tsheletseng a mashome a mane a metso e mmedi. ₆₃Hape, baneng ba baprista, ya eba bana ba Hobaia, le bana ba Hakkotse, le bana ba Barsillai bao ntata bona a neng a nyetse e mong wa baradi ba Barsillai Mogileade, a bile a rewa lebitso la habo bona. ₆₄Bano ba kile ba batla mangolo a mabitso a bona mangolong a masika, ba mpa ba se ke ba a fumana; ba balwa ke hona e le ba sa hlwekang, mme ba ntshwa bopristeng. ₆₅Mmusisi a ba bolella hore ba se no ya ntho tse halalelang, ho be ho hlahe moprista ya ka emang pela Modimo a tshwere Urime le Thummime.

₆₆Phutheho kaofela, ha e balwa hammoho, ya etsa dikete tse mashome a mane a metso e mmedi tse nang le makgolo a mararo a mashome a tsheletseng, ₆₇kantle ho makgoba a bona a banna le a basadi a neng a etsa dikete tse supileng tse nang le makgolo a mararo a mashome a mararo a metso e supileng; ba makgolo a mabedi a mashome a mane a metso e mahlano ba bona e ne e le dibini tsa banna le tsa basadi. ₆₈Hape, ba ne ba na le dipere tse makgolo a supileng a mashome a mararo a metso e tsheletseng, le dimulete tse makgolo a mabedi a mashome a mane a metso e mehlano, ₆₉le dikamele tse makgolo a mane a mashome a mararo a metso e mehlano, le diesele tse dikete tse tsheletseng tse nang le makgolo a supileng a mashome a mabedi.

₇₀Ba bang ba dihlooho tsa matlo a bontata bona ba ntshetsa mosebetsi dimpho. Mmusisi yena a ntshetsa bobolokelo sekete sa didarike tsa kgauta, le merifi e mashome a mahlano, le diaparo tsa baprista tse makgolo a mahlano a mashome a mararo. ₇₁Ho dihlooho tsa matlo a bontata bona, ba bang ba ntshetsa bobolokelo ba tjhelete tsa mosebetsi didarike tsa kgauta tse dikete tse mashome a mabedi, le dimina tsa silefera tse kete tse pedi tse nang le makgolo a mabedi. ₇₂Se kileng sa ntshwa ke ba bang ba setjhaba ke didarike tsa kgauta tse dikete tse mashome a mabedi, le dimina tsa silefera tse kete tse pedi, le diaparo tsa baprista tse mashome a tsheletseng a metso e supileng.

₇₃Jwale baprista, le Balevi, le balebedi ba menyako, le dibini, le bao e leng batho feela, le Banethinime, le Baiseraele bohle, ba aha metseng ya bona.