NUMERE 9

₁Ka kgwedi ya pele ya selemo sa bobedi hobane Baiseraele ba tlohe Egepeta, Jehova a bua le Moshe feelleng la Sinai, a re: ₂Bana ba Iseraele a ba ke ba etse Paseka ka nako e beilweng. ₃Le tla e etsa ka nako e beilweng, ka tsatsi la leshome le metso e mene la kgwedi yona ena, ka nako ya mantsiboya; le tla e etsa ka ditaelo tsohle le ka melao yohle e beetsweng yona.

₄Yaba Moshe o bolella bana ba Iseraele hore ba etse Paseka: ₅ba etsa Paseka feelleng la Sinai, ka kgwedi ya pele, ka tsatsi la leshome le metso e mene la kgwedi, ka nako ya mantsiboya. Tsohle tseo Jehova a neng a di laetse Moshe, bana ba Iseraele ba di etsa jwalo.

₆Empa ho ne ho le batho ba bang ba silafetseng ka baka la motho ya shweleng, ba sitilweng ke hona ho etsa Paseka ka tsatsi lona leo. Yaba ba itlhahisa ho Moshe le ho Aarone ka lona tsatsi leo; ₇mme batho bao ba re ho Moshe: Re silafetse ka baka la motho ya shweleng, mme re ka thibelwa keng ho hlahisa kabelo ya Jehova hara bana ba Iseraele ka nako e beilweng na? ₈Moshe a re ho bona: Emang, ke tle ke mamele seo Jehova a tlang ho ntaela sona bakeng sa lona.

₉Yaba Jehova o bua le Moshe, a re: ₁₀Bolella bana ba Iseraele, o re: Ekare ha e mong ho lona le ho meloko ya lona a silafetse ka baka la mofu, kapa a etetse hole, o tla etsetsa Jehova Paseka. ₁₁Ba tla e etsa ka tsatsi la leshome le metso e mene la kgwedi ya bobedi, ka nako ya manstiboya; ba tla e ja ka mahobe a se nang ditomoso le ka meroho e babang; ₁₂ba ke ke ba siya letho la yona le ka sallang hosasane; ba ke ke ba roba lesapo la yona, leha le le leng; ba tla e etsa ka ditaelo tsohle tsa Paseka.

₁₃Empa haele motho ya hlwekileng, ya seng leetong, ha a sa etse Paseka, motho eo o tla tloswa hara setjhaba sa habo; kahobane a sa ka a hlahisa kabelo ya Jehova ka nako e beilweng, motho eo o tla jara sebe sa hae. ₁₄Ha moditjhaba, ya ahileng le lona, a etsa Paseka ya Jehova, o tla e etsa ka taelo ya Paseka le ka molao wa yona. Ho tla ba molao o le mong bakeng sa lona, bakeng sa moditjhaba, le ya tswaletsweng ha eno.

₁₅Ka tsatsi leo ho emisitsweng tabernakele ka lona, leru la kgurumetsa tabernakele, e leng tente ya bopaki; mantsiboya ha eba hoo e kang mollo hodima tabernakele ho fihlela hosasa. ₁₆Ha nna ha eba jwalo kamehla: motshehare leru le ne le e kgurumetsa, mme bosiu le ne le tshwana le mollo. ₁₇Enere ha leru le phahama, le tloha hodima tente, bana ba Iseraele ba ne ba tloha; mme moo leru le neng le ema, bana ba Iseraele ba ne ba emisa teng. ₁₈Bana ba Iseraele ba ne ba tloha ka taelo ya Jehova, ba ne ba emisa hape ka taelo ya Jehova. Ha leru le ne le ntse le dutse hodima tabernakele, ba ne ba hlola ba emisitse. ₁₉Ha leru le ne le duladula halelele hodima tabernakele, bana ba Iseraele ba ne ba ela taelo ya Jehova hloko, mme ba ne ba sa tlohe. ₂₀Le ha leru le ne le dula hodima tabenakele matsatsi a seng makae, ba ne ba emisa ka taelo ya Jehova, mme ba ne ba tloha ka taelo ya Jehova. ₂₁Leha leru le ne le dula teng ho tloha mantsiboya ho isa hosasa, mme le ne le phahama hosasa, ba ne ba tloha; ha leru le ne le phahama kamora letsatsi le le leng le bosiu bo le bong, ba ne ba tloha. ₂₂Ha leru le ne le dula hodima tabernakele matsatsi a mabedi, kapa kgwedi, kapa ho fetisa kgwedi, bana ba Iseraele ba ne ba hlola teng ba emisitse, ba sa tlohe; ha le ne le phahama, ba ne ba tloha. ₂₃Ba ne ba emisa ka taelo ya Jehova, hape ba ne ba tloha ka taelo ya Jehova: ba ne ba ela taelo ya Jehova hloko, kamoo Jehova a neng a laetse ka Moshe kateng.