DIPROVERBIA 1

₁Dipuo tsa Salomone, mora Davida, morena wa Iseraele, ₂tsa ho ruta bohlale le tayo, ho hlahlisa dipuo tse maele, ₃ho ratisa thuto ya kelello, ya ho loka, ya kutlwisiso, ya toka; ₄ho hlalefisa sethoto, ho nea mohlankana tsebo le kelello. ₅Ya bohlale a utlwe, mme o tla eketsa tsebo; ya hlalefileng le yena o tla ithuela masene, ₆hore a utlwisise maele le dipuo tse tebileng, le ditaba tsa ba bohlale, le thuto tsa bona tse patilweng.

₇Ho tshaba Jehova ke motheo wa tsebo; empa ba mawatla ba nyedisa bohlale le thuto.

₈Mora wa ka, mamela thuto ya ntatao, o se ke wa furalla tayo ya mmao; ₉hobane e tla ba meqhaka e o kgabisang hlooho, le letjekwana le bohehang molaleng wa hao.

₁₀Mora ka, ekare ha baetsadibe ba rata ho o hoka, o se ke wa ba wa dumela. ₁₁Ha ba re: Tloo le rona, re yo lalla ho tsholla madi, re tjhehe ba se nang molato, re ba bolaye feela; ₁₂re ba metse jwaloka nqalo ya bafu, ba sa utlwa; kaofela ha bona ba be jwaloka bao ba hohlomelang mokoting; ₁₃ke moo re tla fumana matlotlo a bohlokwa, re tlatse matlo a rona ka thepa e hapilweng; ₁₄o ikopanye le rona, mme re tla teanela ditjhelete mokotleng o le mong. ₁₅Mora ka, o se ke wa ya ka tsela ya bona, o fapose leoto la hao mmileng wa bona. ₁₆Hobane maoto a bona a mathela bobeng, ba thootheletswe ho tsholla madi. ₁₇Ruri, leraba le tjhehelwa lefeela pela mahlo a dinonyana; ₁₈athe bona ba lalla madi a bona, ba tjheha ho phela ha bona. ₁₉Ke yona taba ya bohle ba ineelang leruo, hobane le ja bophelo ba monga lona.

₂₀Bohlale bo meketsa kantle, bo tlerola ka lentswe le leholo mapatlelong; ₂₁bo howa mabaleng a marata, pela menyako ya motse; bo tumisa ditaba tsa bona hara motse, ₂₂bo re: Helang, lona dithoto, le tla rata bothoto ho le hokae na? Ho tla nne ho be hokae na basomi ba thabelang ho soma, mme mahlanya a hloya tsebo na? ₂₃Bakang ka kgalemelo ya ka, mme bonang, ke tla le tshollela moya wa ka, ke le rute ditaba tsa me.

₂₄Erekaha ke hoile, mme le hanne ho utlwa, ka ba ka otlolla le letsoho la ka, ho se motho ya kileng a lemoha; ₂₅erekaha le bile la nyedisa keletso ya ka, le sa ka la sekehela kgalemelo ya ka tsebe; ₂₆le nna ke tla tsheha ditsietsi tsa lona, ke some mohla le hlahelwang ke matsoso, ₂₇mohla matsoso a le hlahelang jwaloka difefo, le ditlokotsi di le mathelang jwaloka ditsokotsane, mme mahlomola le mapalesapelo a le sithabeditse; ₂₈mohlang oo, ba tla bitsa ho nna, empa ha nka ke ka araba; ba tla mpatla e sa le kameso, empa ba ke ke ba mphumana. ₂₉Kahobane ba hloile tsebo, ba sa ka ba ikgethela ho tshaba Jehova; ₃₀ba hanne keletso ya ka, ba nyedisitse kgalemelo tsohle tsa ka; ₃₁jwale, ba tla ja ditholwana tsa mekgwa ya bona, ba kgore merero ya bona. ₃₂Hobane ho kgeloha ha dithoto ke ho di bolayang, ho iketla ha mahlanya ke ho a timetsang. ₃₃Empa haele ya nkutlwang, yena o tla ikahela ka kgotso, a se na ho tsoha kotsi.