DIPROVERBIA 16

₁Merero ya pelo ke ya motho; haele ho bua he leleme, ho taelong ya Jehova.

₂Mekgwa yohle ya motho e lokile mahlong a hae; empa Jehova o lekanya meya.

₃O rolele ditaba tsa hao tsohle ho Jehova, mme merero ya hao e tla tiya.

₄Jehova o etseditse dintho tsohle merero ya tsona; e, esita le e mobe, o etseditswe letsatsi la tlokotsi.

₅Motho ka mong ya ikgohomosang ka pelong, ke manyala ho Jehova, ruri o tla otlwa, a ke ke a phonyoha.

₆Makgopo a phekolwa ke mohau le nnete, mme ke ka ho tshaba Jehova batho ba phemang bobe.

₇Jehova ha a kgahlwa ke ho tsamaya ha motho, o boelantsha dira tsa hae le yena.

₈Leruo le lenyenyane le nang le ho loka, le molemo ho feta menono e mengata e nang le bokgopo.

₉Pelo ya motho e itherela tsela, empa ke Jehova ya tsamaisang maoto.

₁₀Molomo wa morena o bolela ditaba tsa nnete, ha a ahlola a ke ke a fosa.

₁₁Ditekanyo le sekala se lokileng ke tsa Jehova, tsohle tse lekanyang tse mokotleng ke mosebetsi wa hae.

₁₂Ho marena ho etsa ho sa lokang ho manyala, hobane setulo sa borena se tiiswa ke ho loka.

₁₃Marena a kgahliswa ke melomo e metle, a rata ba buang ka ho loka.

₁₄Kgalefo ya morena e jwaloka lenqosa la lefu, empa motho ya bohlale o tla e thoba.

₁₅Ho ela ha sefahleho sa morena ke bophelo, lerato la hae ke leru le nesang pula ya hwetla.

₁₆Ho rua bohlale ho fetisa ho rua kgauta e hlwekileng hakakang! le ho rua masene ho feta ho rua silefera hakakang!

₁₇Mmila wa ba lokileng ke ho nena bobe, ya elang metsamao ya hae hloko o boloka moya wa hae.

₁₈Boikgohomoso bo etella timelo pele, boikgantsho bo isa ho weng.

₁₉Ho kokobetswa le ba banyenyane ho molemo ho ena le ho ja kgapo le baikgohomosi.

₂₀Ya hloko ditabeng o tla bona molemo, ho lehlohonolo ya tshepang Jehova.

₂₁Ya pelo e hlalefileng o bitswa ya maele, mme molomo wa hae o monate o atisa tsebo.

₂₂Masene ke sediba sa bophelo ho ba a ruileng, empa kotlo ya dithoto ke bowatla.

₂₃Pelo ya motho ya bohlale e nepisa molomo wa hae hlalefong, e hlophisa dipuo tsa hae ka thuto.

₂₄Puo tse ntle ke lekgeha la dinotshi, di monate moyeng wa motho, di matlafatsa masapo a hae.

₂₅Mohlomong ho motho tsela e nngwe eka e sasametse, athe phello ya yona ke lefu.

₂₆Ho lapa ha motho ya sebetsang ho a mo thusa; ke molomo wa hae o mo kgannang.

₂₇Motho wa lefeela o tjheka lemena la bobe, melomo ya hae e na le kgabo e tjhesang.

₂₈Motho ya diteme o jala diphapang, mosebi o hlobohanya metswalle.

₂₉Motho ya soro o hoka eo a tsamaisanang le yena, o mo hulela tseleng e sa lokang.

₃₀Ya tutubalang mahlo o rera tshenyo, ya fupang melomo o sebetsa bobe.

₃₁Moriri o moputswa, ha o fumanwa tseleng ya ho loka, ke mokgabo wa hlompho.

₃₂Ya diehang ho halefa o fetisa mohale; ya hlolang pelo ya hae o fetisa ya hapang metse.

₃₃Lotho e pjatlanngwa kobong; empa se bolelwang ke yona se tsejwa ke Jehova feela.