DIPROVERBIA 17

₁Ho monate ho ja phate feela moo kgotso e leng teng, ho ena le ho dula tlung e tletseng dinama, moo dikomang di leng teng.

₂Mohlanka ya bohlale o tla busa mora e mobe wa monga hae, a je lefa hammoho le bara ba monga hae.

₃Silefera e qhibidiswa pitseng ya lesehla, kgauta e bediswa seboping; empa ya lekang dipelo ke Jehova.

₄Motho e mobe o theeletsa melomo e kgopo tsebe; leleme le sebang le mamelwa ke ya leshano.

₅Ya tshehang mofutsana o soma Ya mmopileng, ya tlakang ditlokotsi tsa ba bang a ke ke a phonyoha kotlong.

₆Ditloholo ke moqhaka wa maqheku, mme kganya ya bana ke batswadi ba bona.

₇Dipuo tsa maele ha di roneha ho motho ya mabela, tse mano tsona di roneha hakakang ho ba baholo!

₈Mpho ke lehakwe la bohlokwa ho ya e newang; hohle moo e kenang, e a hlola.

₉Ya apesang molato o batla lerato; empa ya phunyang makunutu o fapanya batho ba ratanang.

₁₀Motho ya kelello o utlwa kgalemelo, ho feta lehlanya ha le shapuwa ha lekgolo.

₁₁Ya lonya o pheheletse boikgantsho feela, empa o tla romelwa lenqosa le lonya.

₁₂Ho molemo ho kgahlana le tau e nketsweng bana, ho fetisa ho kgahlana le lehlanya bohlanyeng ba lona.

₁₃Ya busetsang botle ka bobe, bosoto bo ke ke ba tloha tlung ya hae.

₁₄Ho qala phapang ke ho phunya metsi; ka baka leo, kgang ha e eso ho hotele, o e tlohele.

₁₅Ya hlatswang motho ya melato, le ya tswang motho ya se nang molato, ba babedi ba manyala ho Jehova.

₁₆Tsa ho reka letsohong la sethoto di sebetsang na? Na ke ho reka bohlale na? Empa se hloka pelo.

₁₇Motswalle wa motho o mo rata kamehla; e ba ngwanabo tlokotsing ya hae.

₁₈Ya se nang kelello ke ya phathatsanang le e mong ka letsoho; o itlama ka molato wa wa habo.

₁₉Ya ratang komang o rata tshenyeho; ya hodisang monyako wa hae o batla dithako.

₂₀Ya pelo e kgopo a ke ke a fumana lehlohonolo, mme ya leleme le kgopameng o tla wela bobeng.

₂₁Ya tswalang lehlanya o rua maswabi; ntata lehlaswa a ke ke a thaba ka lona.

₂₂Pelo e thabileng ke sehlare se matlafatsang; athe moya o hlomohileng o omeletsa masapo.

₂₃E mobe o amohela mpho e patilweng dikobong, ho sokamisa tsela ya ho loka.

₂₄Ya kelello o qamakisisa bohlale pela hae, empa mahlo a lehlanya a tjhalakela pheletsong tsa lefatshe.

₂₅Ngwana ya se nang taba o tena ntatae, mme o babisa ya mmelehileng.

₂₆Ho lefisa motho ya se nang molato, ha ho a loka, leha e le ho otla ba baholo ka baka la ho loka ha bona.

₂₇Ya itshwarang dipuong o tseba hlalefo, mme ya pelo e ikgutseditseng o na le kutlwisiso.

₂₈Esita le lehlanya ha le kgutsa, le ka bitswa ya bohlale; ya itomang melomo ke motho ya kelello.