DIPROVERBIA 27

₁O se ke wa ithorisa ka letsatsi la hosasane, hobane ha o tsebe se tla hlahiswa ke letsatsi leo.

₂Ya o rorisang e be e mong, e seng leleme la hao; e be osele ho wena, e seng molomo wa hao.

₃Lejwe le boima, le lona lehlabathe, empa hlonamo ya lehlanya e di feta tse pedi.

₄Bohale bo soro, hlonamo ke ho tlala ha noka; haele lefufa, ke mang ya tla ema pela lona?

₅Kgalemelo ya pepeneneng e ntle ho feta lerato le patwang.

₆Maoma a etswang ke motswalle a tshepeha, empa dikako tsa ba o hloileng di a tshabeha.

₇Motho ya kgotsheng o hatakela dinotshi ka maoto; empa ya lapileng, se babang se monate ho yena.

₈Motho ya furaletseng hae ha hae, o jwaloka nonyana e lelerang hole le ntlo ya yona.

₉Ole le tse nkgang hamonate di thabisa pelo, ho jwalo keletso e tswang pelong ya motswalle ya mosa.

₁₀O se ke wa furalla motswalle wa hao, leha e le motswalle wa ntatao; mme o lese ho ya ha ngwaneno mohla o leng tsietsing. Eo le ahisaneng hammoho le yena o feta ngwaneno ya leng hole.

₁₁Mora wa ka, hlalefa, o nthabise pelo, mme ke tla ba le puo ho fetola ba nkomanyang.

₁₂Motho ya pelokeletsi o bonela kotsi pele, mme o a itshireletsa; mawatla a feta feela, mme a hlahelwa ke tsietsi.

₁₃Mo amohe kobo, hobane o itlamile ka molato wa e mong; mo ntshise tebeletso ya melato ya basele.

₁₄Ya rorisang motswalle wa hae e sa le kameso ka lentswe le phahameng, ba ya re, o a mo hlapaola.

₁₅Metsi a rothang dintshing tsa marulelo a ntlo, a sa kgaotse mohla sekgohola, le mosadi ya dikomang, ke ntho e le nngwe. ₁₆Ya ka lekang ho mo phoka, a ka kgutsisa moya; letsoho la hae le letona le ka tshwara ole.

₁₇Tshepe e leotsa tshepe; sefahleho sa motho se leotsa sefahleho sa motswalle wa hae jwalo.

₁₈Ya disang sefate sa feiye o tla ja tholwana ya sona, ya bolokang monga hae hantle o tla hlomphuwa.

₁₉Jwalokaha sefahleho se iponang metsing se tshwana le sefahleho, pelo ya motho e tshwana jwalo le pelo ya motho e mong.

₂₀Nqalo ya bafu le dihele ha di na ho kgora, mahlo a motho le wona ha a kgore.

₂₁Pitsa ya lesehla e qhibidisa silefera, sebopi se bedisa kgauta; motho a leke jwalo molomo o mo rorisang.

₂₂Leha o ka tulela lehlanya ka mokgobo, wa le sila ka tshilo le mabele a silwang, le teng bohlanya bo ke ke ba le tlohela.

₂₃O lekole dinku tsa hao hantle, mme o hlahlobe mohlape wa hao hantle. ₂₄Hobane nala hase ya kamehla, le borena ha bo hlolehe kamehla le mehla. ₂₅Jwang bo a bokellwa, botala bo a hlaha, mme ho latwa jwang dithabeng; ₂₆dikonyana di tla o apesa, diphooko di o rekele tshimo, ₂₇mme lebese la dipodi e tla ba dijo tsa hao, le tsa ntlo ya hao, le tsa makgabunyane a hao.