Dillo le thapelo hodima tshenyeho ya Jerusalema.
Thapelo ya motho ya madimabe ya imetsweng ke bohloko, ha a tshollela modumaelo wa hae pela Jehova.
1Jehova, mamela thapelo ya ka, modumaelo wa ka o ke o fihle pela hao! 2O se ke wa mpatela sefahleho sa hao ka letsatsi la matswalo a ka! O ntshekehele tsebe, ha ke bitsa ho wena! Phakisa o nkarabe! 3Hobane matsatsi a ka a timela jwaloka mosi, masapo a ka a tjhese jwaloka letlapa la leifo; 4pelo ya ka e tjhele, e omeletse jwaloka jwang; ke lebala le ho ja bohobe ba ka. 5Ka baka la ho bokolla ha ka, masapo a ka a kgomaretse dinama tsa ka. 6Ke tshwana le moholodi wa lefeella, ke jwaloka sephooko sa dithako. 7Ke timeletswe ke boroko, ke tshwana le nonyana e emeng e innotshi sehlohlolong sa ntlo. 8Ke songwa ka matsatsi wohle ke dira tsa ka; ba ntse ba ntlhanyetsa, ba nka lebitso la ka ho hlapaola ka lona. 9Hobane ke ja molora bakeng sa bohobe, ke tswakantse seno sa ka ka meokgo, 10ka baka la kgalefo ya hao le la bohale ba hao bo tukang. Efela o ile wa ntshwara, wa ntihela fatshe. 11Matsatsi a ka a jwaloka moriti o otlolohang, ke omella jwaloka jwang.
12Empa wena, Jehova, o hlola ka ho sa feleng, mme lebitso la hao le tla hopolwa melokong le melokong. 13O tla tsoha, o hauhele Sione, hobane e se e le nako ya ho mo utlwela bohloko; e, nako e lekantsweng e tlile. 14Hobane bahlanka ba hao ba rata majwe a Sione, ba utlwela lerole la hae bohloko. 15Ke moo ditjhaba di tla hlonepha lebitso la Jehova, marena wohle a lefatshe a tshabe kganya ya hao. 16Etlare ha Jehova a tsosa Sione, o tla hlaha kganyeng ya hae; 17o tla retelehela ho ba lesitsi ba rapelang, mme a ke ke a nyedisa thapelo ya bona. 18Taba eo e ke e ngollwe mehla e tlang ho tla, setjhaba se tlang ho tswalwa se ke se rorise Jehova. 19Hobane phahameng ya sehalalelo sa hae, Jehova o tadimile; phahameng ya mahodimo, o lebisetsa mahlo a hae fatshe, 20ho mamela medumaelo ya batlamuwa, ho lokolla ba kgethetsweng lefu, 21hore ba bolele lebitso la Jehova Sione, le thoko tsa hae Jerusalema, 22mohla ho kopanang ditjhaba kaofela le yona mebuso, ho tla sebeletsa Jehova.
23O robile matla a ka ke le tseleng, o kgutshofaditse matsatsi a ka. 24Ke re: Modimo wa ka, o se ke wa ntlosa ke sa le mahareng a ditshiu tsa ka! Dilemo tsa hao di hlola di le teng melokong le melokong. 25Kgale o ne o thee lefatshe, mme mahodimo ke mosebetsi wa diatla tsa hao. 26Wona a tla fela, empa wena, o tla nne o be teng; a tla tsofala jwaloka seaparo; o tla a fetola jwaloka kobo, mme a tla fetoha; 27empa wena, e ya nne esale e le wena, mme dilemo tsa hao ha di ka ke tsa fela. 28Bana ba bahlanka ba hao ba tla ikgahela fatsheng la bona, mme moloko wa bona o tla nne o be teng pela hao.
