PESALEME YA 116

₁Ke rata Jehova, hobane o utlwile lentswe la ka, le merapelo ya ka; ₂hobane o ntshekehetse tsebe; ke tla mo rapela ke hona ka matsatsi wohle a ho phela ha ka. ₃Ditlamo tsa lefu di na be di nthatetse, ke na be ke tshwerwe ke matswalo a nqalo ya bafu, ka fumana matswalo le hlokofalo. ₄Empa ka rapela lebitso la Jehova, ka re: Oho Jehova, o boloke moya wa ka!

₅Jehova o lereko, o lokile, Modimo wa rona o tletse mohau. ₆Jehova o boloka ba bonolo; ke ne ke hlomohile, mme a tlisa thuso ho nna. ₇Moya wa ka, o boele phomolong ya hao, hobane Jehova o o entse hantle. ₈Efela o ntshitse moya wa ka lefung, le mahlo a ka dillong, le maoto a ka kgothometsehong. ₉Ke tla nne ke tsamaye pela sefahleho sa Jehova, lefatsheng la ba phelang.

₁₀Ke dumetse, ke boletse ke hona. Ka na ka hlokofala ka mokgwa o fetisang! ₁₁Ka ba ka re matswalong a ka: Batho bohle ke bathetsi. ₁₂Ke tla busetsang ho Jehova? Melemo yohle ya hae e ho nna. ₁₃Ke tla emisa senwelo sa topollo, ke rapele lebitso la Jehova; ₁₄ke tla phetha dikano tsa ka ho Jehova, pontsheng ya setjhaba sa hae kaofela.

₁₅Ho leng thata mahlong a Jehova, ke lefu la bakgethehi ba hae. ₁₆Oho Jehova, ke mohlanka wa hao; ke mohlanka wa hao ka sebele, mora wa lekgabunyane la hao. O lokolotse ditlamo tsa ka. ₁₇Ke tla o hlahisetsa sehlabelo sa teboho, ke rapele lebitso la Jehova. ₁₈Ke tla phetha dikano tsa ka ho Jehova, pontsheng ya setjhaba sa hae kaofela, ₁₉mabaleng a ntlo ya Jehova, kahare ho wena, Jerusalema! Bokang Jehova!