Ho monga baphokodi. Pesaleme ya mohlanka wa Jehova, Davida, ya boletseng ditaba tsa sefela sena ho Jehova, ha Jehova a se a mo namoletse matsohong a dira tsohle tsa hae, le letsohong la Saule.
1A re:
Ke tla o rata haholo, Jehova, wena o leng matla a ka, 2wena Jehova, lefika la ka, qhobosheane ya ka, monamoledi wa ka, Modimo wa ka, lefika la ka leo ke tshabelang ho lona, thebe ya ka, lenaka la poloko ya ka, le qhobosheane e phahameng ya ka! 3Ke howeletsa, ke re: Jehova a ke a bokwe! mme ke namolelwa ho dira tsa ka.
4Ditlamo tsa lefu di na be di nkopetse hare, diphororo tsa tshenyo di ne di ntshositse. 5Marapo a lebitla a ne a ntikile, ke ne ke tshwasitswe mameneng a lefu. 6Matswalong a ka ka bitsa ho Jehova, ka phahamisetsa mehoo ya ka ho Modimo wa ka. A utlwa lentswe la ka a le sehalalelong sa hae, mohoweletso wa ka wa finyella pela hae ditsebeng tsa hae.
7Yaba lefatshe le a reketla, la thothomela, metheo ya dithaba ya keqa, ya sisinyeha, hobane a ne a halefile. 8Ha nyoloha mosi dinkong tsa hae, le mollo o timeletsang molomong wa hae; a phutsa mashala a hlenneng. 9A namisa mahodimo, a theoha, lefifi le letenya le le tlasa maoto a hae.
10A kalla kerubime, a fofa, a haola ka mapheo a moya; 11a ipopa ka lefifi ho tshabela teng, a ikopa ka metsi a matsho le ka maru a lefifi. 12Kganyeng e mo etellang pele, ha tswa maru a emereng sefako le mashala a hlenneng.
13Jehova a duma lehodimong, Mookamedi ya phahameng a utlwahatsa lentswe la hae, e le difako le mashala a hlenneng. 14A betsa metsu ya hae, a ba qhalanya ka yona, a tsekemisa mahadima a sa balweng, mme a ba qhemetsa. 15Mangope a lewatle a hlaha, metheo ya lefatshe ya hloboleha ka kgalemelo ya hao, Jehova, ka pudulo ya moya o tswang dinkong tsa hao.
16A nanabetsa letsoho a le phahameng, a ntshwara, a nkgula metsing a maholo. 17A nnamolela ho sera sa ka se matla, le ho ba ntlhoileng ba mphetang ka matla. 18Ba ne ba mpatetse mohla ke leng tsietsing, Jehova ya mpa ya eba seikokotlelo sa ka. 19A nntshetsa sebakeng, a mpholosa; hobane a ne a nthata.
20Jehova o nkentse ka ho loka ha ka, mme o mpuseditse ka ho hlweka ha matsoho a ka. 21Hobane ke bolokile ditsela tsa Jehova, mme ha ke a ka ka kwenehela Modimo wa ka. 22Dikahlolo tsohle tsa hae tsa nna tsa eba pela ka, mme ha ke a ka ka furalla melao ya hae. 23Ke hlokile ho nyatseha ho yena, ke itisitse hore ke se ke ka iketsa ya molato. 24Ka baka leo, Jehova o mputsitse ka ho loka ha ka, le ka ho hlweka ha diatla tsa ka mahlong a hae.
25Ya molemo o mo etsetsa molemo; monna ya lokileng o mo etsa ka ho loka; 26ya hlwekileng o mo etsa ka ho hlweka ha hae, ya kgopo o mo etsa ka bokgopo ba hae. 27Setjhaba se ikokobetsang o a se pholosa, mme o kokobetsa mahlo a phahameng.
28Le jwale o kgantsha lebone la ka; Jehova, Modimo wa ka, o edisa lefifi la ka. 29Ka wena nka nehella lekgotleng la dira, ka Modimo wa ka nka tlola lerako. 30Ditsela tsa Modimo di lokile; lentswe la Jehova le tshekehile; ke thebe ho bohle ba itshepetseng yena.
31Ke mang e leng Modimo, haese Jehova? Lefika ke mang, haese Modimo wa rona? 32Ke Modimo o ntlamileng ka senyepa sa matla, mme o ntsamaisa ka tsela e lokileng. 33O entse maoto a ka a kang a kgama e tshehadi, o mpeile diphahameng tsa ka.
34O ruta matsoho a ka ntwa, mme matsoho a ka a tjheba seqha sa koporo. 35O nneile thebe ya poloko ya hao, letsoho la hao le letona le ntse le ntiisa, mme lereko la hao le nkgodisitse. 36O neile mehato ya ka sebaka; maoto a ka ha a thelle.
37Ke phalletse dira tsa ka, ke di timeditse; ha ke a ka ka kgutla, ke eso ho di qete. 38Ka di katakela, tsa sitwa ho tsoha, tsa wa katlasa maoto a ka. 39O ntlamile ka matla ke tle ke lwane, wa nkokobeletsa ba ntsohetseng matla.
40O ntadimisitse mekokotlo ya dira tsa ka, mme ka fedisa ba ntlhoileng. 41Ba howa, empa monamoledi a ba siyo; ba howeletsa ho Jehova, mme ha a ka a araba. 42Ka ba silakanya jwaloka lerole le nkwang ke moya, ka ba fiela jwaloka diretse tsa tsela.
43O nnamoletse le mohla diphaphang tsa setjhaba, wa mpea hlooho ya ditjhaba; setjhaba seo ke neng ke sa se tsebe se a ntshebeletsa; 44ha ba utlwa taelo ya ka, ba nkutlwa hanghang, bara ba baditjhaba ba nqeka; 45bara ba ditjhaba ba tepeletse, ba tswa diqhobosheaneng tsa bona ba thothomela.
46Jehova a ke a phele, lefika la ka le ke le roriswe! 47Modimo wa poloko ya ka o ke o hodiswe, Modimo o mpheteletsang, o nkokobeletsang ditjhaba, 48o nnamolelang direng tsa ka! O mphahamisitse hodima ba neng ba ntwantsha, o mphonyohisitse ho monna ya bohale! 49Ka baka leo, Jehova, ke tla o roka hara ditjhaba, ke rorise kganya ya lebitso la hao. 50O sitsa morena wa hae ka poloko e kgolo, o etsa mohau ho motlotsuwa wa hae, ho Davida, le ho moloko wa hae ka ho sa feleng!
