PESALEME YA 2

₁Na ditjhaba di dumadumelang, mme batho ba rerelang tsa lefeela? ₂Marena a lefatshe a phuthehetseng, le mahosana a bokanetseng ho tsohela Jehova le motlotsuwa wa hae matla? ₃Ba re: A re kgaoleng ditlamo tsa bona, re kwele mehala ya bona.

₄Ya dutseng mahodimong o a ba tseha, Jehova o soma ka bona, ₅o bua le bona ka bohale, o ba tsielehisa kgalefong ya hae, ₆o re: Ke nna ka sebele ke tlotsitseng morena wa ka Sione, thabeng ya ka e kgethehileng!

₇A nke ke phethe morero; Jehova o itse ho nna: O Mora wa ka, kajeno ke o tswetse. ₈Kopa ho nna, mme ke tla o fa ditjhaba e be lefa la hao, le dipheletso tsa lefatshe e tle e be leruo la hao. ₉O tla di thumakanya ka molamu wa tshepe, o di silakanye jwaloka pitsa ya letsopa.

₁₀Jwale he, marena, hlalefang; le lona, baahlodi ba lefatshe, le eletswe! ₁₁Sebeletsang Jehova ka tshabo, mme le thabe le ntse le thothomela! ₁₂Akang Mora, a se tlo halefa, mme la timela tseleng ya lona, hobane bohale ba hae bo se bo tla tuka. Ho lehlohonolo bohle ba beileng tshepo ya bona ho yena!