PESALEME YA 26

₁Nkahlolele, Jehova! hobane ke phela ka toka ya ka; ke itshepetse Jehova, ha ke sisinyehe. ₂O ntekole, Jehova, o batlisise ho nna! O leke letheka la ka le pelo ya ka! ₃Hobane mohau wa hao o pela mahlo a ka, mme ke latela nnete ya hao. ₄Ha ke dule le batho ba ratang leshano, ha ke etelane le baikaketsi. ₅Ke hloile mokgatlo wa ba bolotsana, ha ke dudisane le batho ba babe. ₆Ke hatlela matsoho a ka ho lokeng, ke pota aletare ya hao, Jehova, ₇ke ntse ke kgeleketsa lentswe la diteboho le ho bolela mehlolo ya hao kaofela. ₈Jehova, ke rata leaho la ntlo ya hao, le nqalo moo kganya ya hao e leng teng.

₉O se ke wa tlosa moya wa ka le baetsadibe, leha e le bophelo ba ka le ba batho ba madi, ₁₀ba tshwereng polao matsohong a bona, mme seatla sa bona se setona se tletse dineo tsa qeko! ₁₁Haele nna, ke tla nne ke tsamaye ka toka ya ka; o mpoloke, o nketse ka mohau! ₁₂Leoto la ka le tiya tseleng e lokileng. Ke tla roka Jehova diphuthehong.