PESALEME YA 33

₁Lona ba lokileng, le thabele Jehova! Thoko e tshwanela batho ba lokileng. ₂Rorisang Jehova ka harepa, le mminele ka thomo ya dikgole tse leshome! ₃Mmineleng sefela se setjha, lohlanang ka dikgoba, le utlwahatse diletsa tsa lona le mantswe a lona!

₄Hobane lentswe la Jehova le lokile, o tshepeha diketsong tsohle tsa hae. ₅O rata tokelo le ho loka; lefatshe le tletse mehauhelo ya Jehova. ₆Mahodimo a entswe ke lentswe la Jehova, le makgotla wohle a wona ke pudulo ya molomo wa hae. ₇O bokella metsi a lewatle hammoho, a ka qubu; o boloka bodiba dipolokelong tsa hae.

₈Lefatshe kaofela a le ke le tshabe Jehova! Baahi bohle ba lefatshe a ba ke ba thothomele pela hae! ₉Hobane, ha a bua, ho ye ho hlahe ntho; leha a laela, e ye e be teng. ₁₀Jehova o etsa merero ya batho ntho feela; o tshwephola mehopolo ya ditjhaba. ₁₁Merero ya Jehova e tiile ka ho sa feleng, mehopolo ya pelo ya hae e eme ka ho sa yeng kae.

₁₂Ho lehlohonolo setjhaba seo Jehova e leng Modimo wa sona, le batho bao a ikgethetseng bona ho ba lefa la hae! ₁₃Jehova o tadima a le lehodimong, o bona bara ba batho kaofela. ₁₄Nqalong ya bodulo ba hae o lemoha baahi ba lefatshe kaofela. ₁₅Ke yena ya bopileng dipelo tsa bona bohle, ya elang mesebetsi ya bona kaofela hloko.

₁₆Ha ho morena ya ka hlolang ka bongata ba makgotla a hae, ha ho mohale ya ka bolokehang ka boholo ba matla a hae. ₁₇Pere hase ntho e hlolang, motho a ke ke a phonyoha ka matla a yona. ₁₈Bonang, mahlo a Jehova a hodima ba mo tshabang, ba tshepang mohau wa hae, ₁₉ho holla meya ya bona lefung le ho ba phedisa mehleng ya tlala.

₂₀Meya ya rona e itshepetse Jehova: ke yena thuso ya rona le thebe ya rona. ₂₁Hobane pelo tsa rona di ithabela ho yena, hobane re tshepile lebitso la hae le halalelang. ₂₂Mohau wa hao, Jehova, a o be hodima rona, jwalokaha re itshepetse wena.