PESALEME YA 47

₁Lona ditjhaba kaofela, opang ka diatla! Hlasimolohelang Modimo ka dipina tsa nyakallo! ₂Hobane Jehova, Mookamedi ya phahameng, o tshwanelwa ke ho tshajwa; ke yena Morena e moholo wa lefatshe lohle. ₃O beile ditjhaba katlasa rona, le merabe katlasa maoto a rona; ₄O re kgethetse lefa la rona, mokgabo wa Jakobo eo a mo ratang. (Sela.)

₅Modimo o nyoloha ka mehoo ya thabo, Jehova o phahama ka modumo wa terompeta. ₆Binelang Modimo; binang, le binele Morena wa rona; binang! ₇Hobane Modimo ke Morena wa lefatshe lohle: o roriseng ka sefela se seholo! ₈Modimo o rena hodima ditjhaba; Modimo o dutse teroneng e halalelang ya wona. ₉Mahosana a ditjhaba a phuthehile hammoho ho ba setjhaba sa Modimo wa Abrahama; hobane dithebe tsa lefatshe ke tsa Modimo; o phahamile haholo ka ho fetisisa.