PESALEME YA 49

₁Mamelang ditaba tsena, lona ditjhaba kaofela; le sekehe ditsebe, lona batho bohle ba ahileng lefatsheng: ₂bao e leng batho feela, le lona marena, le ya ruileng le ya fumanehileng, bohle hammoho! ₃Molomo wa ka o tla bolela bohlale, dinahano tsa pelo ya ka di rute kutlwisiso. ₄Ke sekehela polelo tsa hlalefo ditsebe tsa ka, ke lotha selotho sa ka, ke ntse ke letsa harepa.

₅Nka tshaba eng ka letsatsi le lebe, ha ke teetswe hare ke bolotsana jwa ba ntjhehelang, ₆ba itshepetseng menono ya bona, ba ithorisang ka bongata ba maruo a bona? ₇Ha ho le a mong wa bona ya ka tsebang ho lopolla ngwanabo, leha e le ho ntshetsa Modimo topollo bakeng sa hae. ₈Topollo ya bophelo ba motho e fetisa matla a hae, e tla nne e mo hlole kamehla. ₉Ha ho kamoo motho a ka lopollwang kateng hore a nne a phele ka ho sa feleng, a se ke a bona lebitla. ₁₀Tjhe, o tla le bona. Ba bohlale ba ya shwa; lewatla le sethoto le bona ba ya shwa, ba tlohelle basele maruo a bona. ₁₁Ba lekanya hore matlo a bona a tla ba teng kamehla, le meaho ya bona e dule ho isa ditloholong le ditloholwaneng; e leng bao mabitso a bona a hlomphuwang lefatsheng. ₁₂Empa motho, hara bokgabane ba hae, ha a hlole kamehla; o tshwana le diphoofolo tse hlajwang.

₁₃Ke yona tsela ya ba itshepang, le ya ba ba latelang ke ho kgolwa ke dipolelo tsa bona. (Sela.) ₁₄Ba soteletswa jwaloka dinku nqalong ya bafu, moo lefu e tla ba modisa wa bona; ka hosasa, ba lokileng ba tla bewa marena a bona; bokgabane ba bona bo ya fela, nqalo ya bafu ke moo ba tla aha teng. ₁₅Empa Modimo o tla hlwibila moya wa ka matleng a nqalo ya bafu, hobane o tla nkamohela. (Sela.)

₁₆O se ke wa tshoha leha motho a atisa maruo a hae, mme matlotlo a ntlo ya hae a eketseha! ₁₇Hobane mohla a shwang, a ke ke a nka letho, mme kganya ya hae e ke ke ya theohela lebitleng le yena. ₁₈Leha a ka ithoka a sa phela, leha batho ba ka o rorisa ka baka la menono ya hao, ₁₉e ka kgona o ye ho moloko wa bontatao, ba ke keng ba boela ba bona lesedi. ₂₀Motho, bokgabaneng ba hae, ya mpang a se na kutlwisiso, o tshwana le diphoofolo tse hlajwang.