PESALEME YA 51

₁Oho Modimo, nkgauhele ka lereko la hao; ka mehauhelo e meholo ya hao o hlakole ditlolo tsa ka! ₂Ntlhatswe, o be o ntlhatswisise bokgopo ba ka, o mphekole sebe sa ka! ₃Hobane ke tseba ditlolo tsa ka, sebe sa ka se pela ka kamehla. ₄Ke sitetswe wena, wena o nnotshi; ke entse ho leng hobe mahlong a hao; ke moo ho loka ha hao ho tla bonahala ha o bua, le hlweko ya hao ha o ahlola. ₅Bona, ke tswaletswe bokgopong, mme o nkemoletse sebeng. ₆Empa wena, o rata nnete pelong ya motho. O ntsebise bohlale sephiring sa ka!

₇O foke hodima ka ka hisopa, ke tle ke phekolehe! O ntlhatswe, ke tle ke fetisa lehlwa ka bosweu! ₈O nkutlwise nyakallo le thabo! Masapo a ka ao o a robileng a ke a hlasimolohe! ₉O furalle dibe tsa ka, o hlakole makgopo a ka kaofela! ₁₀Oho Modimo, o bope kahare ho nna pelo e hlwekileng, o boele o lokise kahare ho nna moya o tiileng! ₁₁O se ke wa ntelekisa pela sefahleho sa hao, o se ke wa nkamoha moya wa hao o halalelang! ₁₂O mpuseletse thabo ya poloko ya hao, nke ke tiiswe ke moya o mafolofolo.

₁₃Ebe moo ke rutang batlodi ditsela tsa hao, mme baetsadibe ba tla kgutlela ho wena. ₁₄Oho Modimo, Modimo wa poloko ya ka, o ntopolle molatong wa madi a tsholohileng; mme leleme la ka le tla rorisa ho loka ha hao! ₁₅Morena, ahlamisa melomo ya ka, mme molomo wa ka o tla tumisa dithoko tsa hao; ₁₆hobane ha o rate mahlabelo; hola ha ho jwalo, nka be ke a ntshitse; le ditjheso ha o kgahliswe ke tsona. ₁₇Sehlabelo se ratwang ke Modimo, ke moya o robehileng. Modimo, ha o kgese pelo e robehileng, e hlomohileng.

₁₈Leratong la hao o hlohonolofatse Sione; o hahe marako a Jerusalema! ₁₉Ke moo o tla kgahlwa ke mahlabelo a ho loka, le ditjheso, le tse tjheseletswang kaofela; mme ba tla hlahisa dipohwana aletareng ya hao.