PESALEME YA 72

₁Oho Modimo, o nee morena dikahlolo tsa hao, ho loka ha hao ho fuwe mora morena. ₂O tla ahlola setjhaba sa hao ka ho loka, le mafutsana a hao ka bokgabane. ₃Dithaba di tla tlisetsa setjhaba kgotso, le wona maralla ka baka la ho loka ha hae. ₄O tla ahlolela ba madimabe ba setjhaba, a thuse bana ba ya lesitsi, mme a hatakele batubi. ₅O tla tshajwa, letsatsi le kgwedi ha di sa kganya, melokong le melokong. ₆O tla theoha, a be jwaloka pula hodima makgulo, jwaloka medupe e kolobisang mobu. ₇Mehleng ya hae, ya lokileng o tla atleha, mme kgotso e ya nne e ate ho isa ha kgwedi e lesa ho ba teng.

₈O tla busa ho nka lewatleng le leng ho isa lewatleng le leng, le ho nka nokeng ho isa dipheletsong tsa lefatshe. ₉Baahi ba lefeella ba tla kgumama pela hae, bao e leng dira ho yena ba nyeke lerole; ₁₀marena a Tarshishe le a dihlekehleke a tla ntsha dineo, marena a Seba le a Saba a tlise dinyehelo. ₁₁Marena kaofela a tla kgumama pela hae, ditjhaba tsohle di mo sebeletse. ₁₂Hobane o tla boloka ya lesitsi ha a howa, le ya madimabe ya hlokang mothusi; ₁₃o tla utlwela ya madimabe le mohloki bohloko, a boloke bophelo ba ya lesitsi; ₁₄o tla ba lwela bohorohosong le botubong, madi a bona e be ntho e hlokwang mahlong a hae. ₁₅Ba tla nne ba phele, ba mo nee dikgauta tsa Seba, ba mo rapelle ka dinako tsohle, ba nne ba mmoke kamehla.

₁₆Nala ya mabele e tla ba teng lefatsheng hodima dithaba, diqwapi tsa wona di hwase jwaloka merokodi e dumang Lebanone; batho ba tla atleha metseng jwaloka dimela tsa naha. ₁₇Lebitso la hae le ke ke la fela, letsatsi ha le sa ntse le kganya, lebitso la hae le tla hloleha, batho ba hlohonolofatsane ka lona; ditjhaba tsohle di tla le hodisa.

₁₈Ho roriswe Jehova Modimo, Modimo wa Iseraele, ya etsang dintho tse makatsang a nnotshi! ₁₉Ho bokwe lebitso la hae le kganyang ka ho sa feleng; lefatshe lohle le ke le tlale kganya ya hae! Amen! e, amen!

₂₀Dithapelo tsa Davida, mora Jese, di fella moo.