PESALEME YA 81

₁Utlwahatsang difela tsa lona ho Modimo oo e leng matla a rona, le mehoo ya lona ya nyakallo ho Modimo wa Jakobo! ₂Phahamisang dipina tsa lona, le otle meropa, le tidinye thomo le harepa e kgahlehang! ₃Ke kgwedi e ntjha, letsang phala; ke kgwedi e tolokileng, tsatsi la mokete wa rona! ₄Hobane ke molao o neilweng Iseraele, taelo ya Modimo wa Jakobo; ₅ke bopaki boo o bo beileng ho Josefa, mohla o futuhelang Egepeta.

₆Teng ka utlwa lentswe la eo ke neng ke sa mo tsebe pele; a re: Ke jarolotse lehetla la hae phahlo, matsoho a hae a lesitse ho jara seroto. ₇Wa nthapela o le matswalong, ka o boloka, ka o utlwa ke ipopile ka leru le dumang, ka o leka metsing a Meriba. (Sela.) ₈Mamela, setjhaba sa ka, ke o pakele! Iseraele, hola wa rata ho nkutlwa! ₉Ha ho se be modimo osele ha hao, mme o se ke wa rapela medimo ya ditjhaba! ₁₀Ke nna Jehova, Modimo wa hao, ya o nyolotseng naheng ya Egepeta. Ahlamisa molomo wa hao, mme ke tla o tlatsa! ₁₁Empa setjhaba sa ka ha se a ka sa utlwa lentswe la ka, Iseraele ha a ka a mmamela. ₁₂Ke moo ke ba tlohetseng boikgantshong ba pelo tsa bona, ba tle ba latele dikeletso tseo e leng tsa bona. ₁₃Oho! hola setjhaba sa ka se rata ho nkutlwa, mme Iseraele a tsamaya ditseleng tsa ka! ₁₄Nka be ke phakisa ho kokobetsa dira tsa bona, nka be ke fetolela letsoho la ka ho bahanyetsi ba bona. ₁₅Ba hloyang Jehova ba ka be ba ipea katlasa hae, mme tjhaba sa ka se ne se tla bona lehlohonolo le sa feleng! ₁₆Ke ne nka ba fepa ka lefi la phofo, ke na nka ba kgorisa ka dinotshi tsa mafika!