PESALEME YA 9

₁Ke tla o rorisa, Jehova, ka pelo ya ka yohle; ke tla bolela mehlolo ya hao kaofela. ₂Ke tla thaba, ke nyakallele wena. Ke tla binela lebitso la hao, Mookamedi ya phahameng!

₃Dira ho nna di suthela morao, di a thekesela, di timela pela hao! ₄Hobane o emela taba tsa ka le tokelo tsa ka; o dutse teroneng ya hao, o le moahlodi ya lokileng. ₅O kgalemela ditjhaba, o timetsa bakgopo, o hlakola lebitso la bona kamehla le mehla, ka ho sa yeng kae. ₆Ditshenyo tsa dira tsa ka di fedile ka ho sa feleng. O sentse metse ya bona, lebitso la bona le fedile hammoho le bona.

₇Empa Jehova o busa ka ho sa feleng; terone ya hae o e lokiseditse kahlolo; ₈o tla ahlola lefatshe ka ho loka, a neele ditjhaba dikahlolo tse lokileng. ₉Jehova ke setshabelo ho ya tujwang, setshabelo sa hae mehleng ya matswalo. ₁₀Ba tsebang lebitso la hao ba itshepisa ka wena; hobane wena, Jehova, ha o tlohele ba o batlang.

₁₁Binelang Jehova ya ahileng Sione; behelang ditjhaba diketso tsa hae tse phahameng; ₁₂hobane yena mophetetsi wa madi o a di hopola, hobane ha a lebale mohoweletso wa ba madimabe.

₁₃Nkgauhele, Jehova; bona bomadimabe boo ba ntlhoileng ba nkgatakelang ka bona, wena ya nnyollang menyakong ya lefu, ₁₄ke tle ke tumise dithoko tsa hao kaofela dikgorong tsa moradi wa Sione, ke thabele poloko ya hao!

₁₅Baditjhaba ba tebela lemeneng leo ba itjheketseng lona; maoto a bona a tshwaswa lerabeng leo ba le patileng. ₁₆Jehova o iponahaditse, o lokisitse; o tshwasa ya kgopo ketsong ya diatla tsa hae. (Higgaione. Sela.)

₁₇Bakgopo ba leba nqalong ya bafu, ho jwalo le ditjhaba kaofela tse lebetseng Modimo. ₁₈Hobane mofutsana a ke ke a lebalwa kamehla, mme tshepo ya ba madimabe e ke ke ya timela ka ho sa yena kae.

₁₉Tsoha, Jehova, hore motho a se ke a ipha matla, ditjhaba di tle di ahlolwe pela hao. ₂₀Jehova, sohlometsa botshabeho ba hao hara tsona, ditjhaba di tle di utlwe hoba ke batho feela! (Sela.)