PESALEME YA 90

₁Jehova, o nnile wa ba setshabelo sa rona melokong le melokong. ₂Dithaba di eso ho ka di hlaha, o eso ho bope lefatshe le dintho tsohle, e, ho tloha ho bo sa hlaheng ho isa ho bo sa feleng, esale o le Modimo. ₃O kgutlisetsa batho leroleng, mme o re: Kgutlelang, lona, bana ba batho! ₄Hobane dilemo tse sekete mahlong a hao di jwaloka tsatsi la maobane, ha le se le fetile, le jwaloka tebelo ya bosiu. ₅O a ba kgohola; ba jwaloka toro; hosasa, ba mela jwaloka jwang; ₆hosasa, bo a palesa, bo mele, mantsiboya bo a helwa, bo pone.

₇Hobane re fediswa ke bohale ba hao, re tshoswa ke kgalefo ya hao. ₈O bea makgopo a rona pela hao, le dibe tsa rona tse patilweng o di bea leseding la sefahleho sa hao. ₉Hobane matsatsi a rona a ikela pela bohale ba hao, re fellwa ke dilemo tsa rona jwalokaha re fellwa ke kgopolo. ₁₀Matsatsi a ho phela ha rona ke dilemo tse mashome a supileng, ho ba matla ke tse mashome a robileng meno e le mmedi; boikakaso ba tsona ke kgathatso le bomadimabe; hobane bophelo ba rona bo fela kapele, bo ikela koo. ₁₁Matla a bohale ba hao le botshabeho ba kgalefo ya hao ke mang ya di elang hloko? ₁₂O re rute ho bala matsatsi a rona ka mokgwa oo re ka fihlelang pelo e hlalefileng ka wona!

₁₃Kgutla, Jehova! o tla isa kae ...? o hauhele bahlanka ba hao! ₁₄O re kgorise ka mohau wa hao e sa le kameso, re tle re nyakalle, re thabe ka matsatsi wohle a rona. ₁₅O re fe thabo e lekaneng le matsatsi ao o re hlomoditseng ka wona, le dilemo tseo re boneng ditlokotsi ka tsona! ₁₆Bonahatsa mosebetsi wa hao ho bahlanka ba hao, le kganya ya hao ho bana ba bona! ₁₇Mme mohau wa Jehova. Modimo wa rona, o be ho rona! Mosebetsi wa matsoho a rona, o re tiiselletse wona; e, mosebetsi wa matsoho a rona o o tiise.