SEFELA SA SALOMONE 7

₁Moradi wa morena, maoto a hao a matle hakakang dirwalong tsa wona! Dithopola tsa dinoka tsa hao di jwaloka mekgabo e sebeditsweng ke moetsi wa sebele; ₂theka la hao ke mohope o holokaneng, o tletseng veine e tswakilweng; sefuba sa hao se jwaloka setha sa mabele se dikilweng ke mehaladitwe. ₃Matswele a hao a mabedi eka mafahlana a mabedi a tshephe; ₄molala wa hao eka tora e sebeditsweng ka dinaka tsa tlou; mahlo a hao a jwaloka matsha a Heshbone, monyakong wa Bathe-Rabbime; nko ya hao e jwaloka tora ya Lebanone e lebileng nqa Damaseka; ₅hlooho ya hao e phahamile, e tshwana le Karmele, mme thitsane ya hao eka purepera ya borena mahareng a letlowanyana le e tlamileng. ₆Thatohatsi ya ka, o motle hakakang, o rateha hakakang ka dikgahliso tsa hao! ₇Boemo ba hao eka ba sefate sa palema, matswele a hao eka masihla a sona. ₈Ka re: Ke tla hlwella hlorong ya sefate sa palema, ke itshwarelle ka makala a sona a lepeletseng. Matswele a hao a ke a be jwaloka masihla a morara, monko wa phefumoloho ya hao o be jwaloka wa apole; ₉molomo wa hao o be jwaloka veine e monate e phallelang ho moratuwa wa ka, e buisang melomo ya ba robetseng.

₁₀Nna ke wa moratuwa wa me, lerato la hae le lebile ho nna. ₁₁Tloo, moratuwa wa me, a re ye masimong, re dule metsaneng. ₁₂Meso ha e etla, re tla ya dirapeng tsa merara, re be re bone ha merara e mela, ha e se e fina masihla a yona, ha difate tsa kharanata di thuntse; teng ke tla o bontsha lerato la me. ₁₃Diduda di se di utlwahatsa monko wa tsona; pela monyako wa heso ditholwana tsohle tse ratwang di teng, tsa jwale le tsa pele. Moratuwa wa me, ke o boloketse tsona.