1Lebanone, bula dikgoro tsa hao, mollo o tle o tjhese dikedare tsa hao. 2Bokolla, kiprese, hobane kedare e wele, hobane difate tse phahamileng di sentswe. Bokollang, lona dieike tsa Bashane, hobane moru o sa kenweng o dihilwe! 3Ho utlwahala dillo tsa badisa, hobane kganya ya bona e sentswe; ho utlwahala ho rora ha ditawana, hobane mahlaka a Jordane a sentswe.
4Jehova, Modimo wa ka, o itse ho nna: Alosa dinku tse bolawang, tseo beng ba tsona ba di bolayang, ba sa bewe molato, 5mme ba rekisang ka tsona ba re: Ho bokwe Jehova! re ruile! ... mme badisa ba tsona ha ba di qenehele. 6Hobane ha ke sa tla qenehela baahi ba lefatshe, ho bolela Jehova; ke se ke tla neela batho bohle, e mong le e mong, matsohong a wa habo le matsohong a morena wa hae; ba tla otla lefatshe, mme nke ke ka ba namolela matsohong a bona.
7Yaba ke alosa dinku tse bolawang, hara tsona ho le tse fokolang tsa mohlape, mme ka inkela thupa tse pedi, e nngwe ka e rea Mohau, e nngwe ka e rea Ditlamo, ka ba ka alosa mohlape. 8Ka timetsa badisa ba bararo ka kgwedi e le nngwe. Empa ka fediswa pelo ke dinku, le tsona meya ya tsona ya tenwa ke nna. 9Yaba ka re: Ha ke sa tla di alosa! E shwang e shwe; e timelang e timele; haele tse salang, a di ke di je e nngwe le e nngwe nama ya e nngwe. 10Yaba ke nka thupa ya ka e bitswang Mohau, ke a roba, ke tle ke kgaole selekane sa ka seo ke neng ke se entse le ditjhaba kaofela. 11Sa kgaolwa ka tsatsi leo; mme tse fokolang tsa mohlape, tse neng di ntlhokomela, tsa lemoha kahoo hobane e be e le lentswe la Jehova. 12Ka re ho mohlape: Ha ekaba e le ntho e molemo mahlong a lona, nneeng moputso wa ka; ha ho se jwalo, o tloheleng. Yaba ba ntekanyetsa moputso wa ka, ya eba tjhelete tse mashome a mararo. 13Jehova a re ho nna: E akgelle mmopi wa dipitsa, theko eo e kalo eo ba ntekantseng ka yona! Yaba ke nka tjhelete tseo tse mashome a mararo, ka di akgella mmopi, tlung ya Jehova. 14Jwale, ka roba thupa ya ka ya bobedi, e leng Ditlamo, ke tle ke fedise kopano mahareng a Juda le Iseraele.
15Yaba Jehova o re ho nna: O boele o inkele seo e leng sa modisa wa lewatle. 16Hobane ke ya tsosa lefatsheng ya sa tlong ho hlokomela dinku tse timelang; a ke ke a batla e lahlehileng; e robehileng a ke ke a e oka; le e tsamayang a ke ke a e fepa; empa o tla ja nama ya tse nonneng, a be a petsole le ditlhako tsa tsona. 17Ho madimabe modisa wa lefeela ya tlohelang mohlape! Lerumo le tla otla letsoho la hae le leihlo la hae le letona. Letsoho la hae le tla omella ruri, leihlo la hae le letona le fifale.
