1 LIKETSAHALO 26

₁Lihlopha tsa balebeli ba menyako li ne li eme tjena: Ho bara ba Kora e ne e le Meshelemiea, mora oa Kore, e mong oa bara ba Asafo. ₂Bara ba Meshelemiea e ne e le Sekariea, letsibolo la hae, oa bobeli e le Jediaele, oa boraro e le Sebadiea, oa bone e le Jateniele, ₃oa bohlano e le Elame, oa botšelela e le Jehohanane, oa bosupa e le Eleunai.

₄Bara ba Obede-Edomo e ne e le Shemaea, letsibolo la hae, oa bobeli e le Jehosabada, oa boraro e le Jōoa, oa bone e le Sakara, oa bohlano e le Netanele, ₅oa botšelela e le Amiele, oa bosupa e le Isakare, oa borobeli e le Peuletai, ho ea kamoo Molimo a neng a hlohonolofalitse Obede-Edomo kateng.

₆Mora oa hae Shemaea a tsoala bara ba neng ba busa lelapa lohle labo bona, hobane e ne e le bahale. ₇Bara ba Shemaea e ne e le Oteni, le Refaele, le Obede, le Elesabade. Baena ba bona, e leng Elehu le Semakiea, e ne e le banna ba matla. ₈Bana bohle e ne e le litlōhōlō tsa Obede-Edomo; bona le bara ba bona, le bang ka bona, e ne e le banna ba matla, ba sebetsang ka thata. Litlōhōlō tsa Obede-Edomo li ne li le mashome a tšeletseng a metso e 'meli.

₉Meshelemiea le eena o ne a e-na le bara, le baena ba matla, ba leshome le metso e robeli. ₁₀Le Hosa, oa bana ba Merari, o ne a e-na le bara. Shimeri e ne e le eena hlooho ea bona. Le hoja e ne e se eena letsibolo, feela ntat'ae o ile a mo etsa hlooho. ₁₁Mora oa bobeli e ne e le Hilekiea, oa boraro e le Tebaleea, oa bone e le Sekariea. Kaofela bara ba Hosa le baena ba hae ba ne ba le leshome le metso e meraro.

₁₂Lihlopha tsena tsa balebeli ba menyako, li le tlas'a baokameli ba tsona, li ne li abetsoe ho sebeletsa ka Tempeleng ea Morena, sehlopha ka seng se sebeletsa joaloka tse ling. ₁₃Monyako ka mong oa khetheloa balebeli ba oona ka lōtho, ho ea ka malapa abo bona, ha khethoa ba baholo le ba banyenyane.

₁₄Lōtho le khethang molebeli oa monyako o ka bochabela la ntša Shelemiea. Mora oa hae Sekariea, eo e neng e le moeletsi ea bohlale, le eena a etsetsoa lōtho, 'me la mo ntšetsa ho lebela monyako o ka leboea.

₁₅Lōtho le khethang molebeli oa monyako o ka boroa la ntša Obede-Edomo, 'me lōtho le khethang balebeli ba ntlo ea pōlōkelo la ntša bara ba hae.

₁₆Lōtho le khethang balebeli ba monyako o ka bophirimela, le balebeli ba monyako oa Shalekete, o 'mileng o kaholimo, la ntša Shupime le Hosa.

Balebeli ba ne ba suthelana. ₁₇Ka letsatsi le leng le le leng, Balevi ba tšeletseng ba ne ba lebela ka bochabela, ba bane ba lebela ka leboea, ba bane ba lebela ka boroa, 'me tlung ea pōlōkelo ba lebela ka bobeli, ba suthelana. ₁₈Lebaleng le ka bophirimela, ba bane ba ne ba lebela pel'a tsela, ba babeli ba lebela hona lebaleng moo.

₁₉Tsena e ne e le tsona lihlopha tsa balebeli ba menyako, bao e neng e le litlōhōlō tsa Kore le tsa Merari.

₂₀Balevi, le bana babo bona, e ne e le bona balebeli ba matlotlo a Tempele ea Molimo, le balebeli ba matlotlo a limpho tse halalelang.

₂₁Har'a litlōhōlō tsa Ladane, oa morabe oa Gereshone, bao e neng e le lihlooho tsa malapa abo bona e ne e le litlōhōlō tsa Jehiele. ₂₂Bara ba Jehiele, e leng Setame le Joele ngoan'abo, e ne e le balebeli ba matlotlo a Tempele ea Morena.

₂₃Har'a litlōhōlō tsa Amorame, le tsa Isihare, le tsa Heborone, le tsa Usiele, ₂₄setlōhōlō sa Moshe, e leng Shebuele, mora oa Gereshome, e ne e le eena mookameli oa balebeli ba matlotlo. ₂₅Bang ka eena, ba tsoetsoeng ke Eleesere, ke bana: Eleesere a tsoala Rehabeea, Rehabeea a tsoala Jeshaea, Jeshaea a tsoala Jorame, Jorame a tsoala Sikeri, Sikeri a tsoala Shelomite. ₂₆Ke bo-Shelomite le bana babo, bao e neng e le balebeli ba matlotlo a limpho tse abetsoeng Morena, tseo khosi Davida, le lihlooho tsa malapa, le balaoli ba bahlabani ba sekete, le ba bahlabani ba lekholo, le balaoli ba mabōtho, ba ileng ba li abela Morena. ₂₇Linthong tse ileng tsa hapuoa ntoeng, ba fana ka tse ling hore li tle li sebelisoe Tempeleng ea Morena. ₂₈Tsohle tseo moporofeta Samuele, le Saule mora oa Kishe, le Abinere mora oa Nere, le Joabe mora oa Seruea, ba neng ba li abetse Morena, le tsohle tseo mang kapa mang a neng a li abetse Morena, li ne li laoloa ke Shelomite le bana babo.

₂₉Har'a litlōhōlō tsa Isihare, Kenaniea le bara ba hae ba ne ba abetsoe mosebetsi oa ho tsamaisa litaba tsa naha ea Iseraele, e le bangoli le baahlōli. ₃₀Har'a litlōhōlō tsa Heborone, Hashabiea le bana babo ba sekete le makholo a supileng, bao e neng e le bahale, e ne e le bona baokameli ba mosebetsi oohle oa Morena, ba okametse le tšebeletso eohle ea khosi naheng ea Iseraele e ka bophirimela ho Jorodane. ₃₁Har'a litlōhōlō tsa Heborone, Jeriea e ne e le eena hlooho, ho ea ka ho hlahlamana ha malapa abo tsona. Ka selemo sa mashome a mane sa puso ea Davida, ba fuputsa har'a ba morabe oa Heborone, 'me ha fumanoa bahale Jasere e Gileade. ₃₂Bang ka eena, ba likete tse peli le makholo a supileng, bao e neng e le bahale, e bile e le lihlooho tsa malapa abo bona, ba laeloa ka Davida hore litabeng tsohle tsa borapeli, le tsa puso, ba okamele ba morabe oa Rubene, le oa Gade, le ba karolo ea morabe oa Manase.