1Latelang mohlala oa ka, joalokaha le 'na ke latela oa Kreste.
Ho roala kapa ho se roale ka kerekeng
2Kea le rorisa hobane kamehla lea nkhopola, 'me le bōlōka tsohle kamoo ke li fetiselitseng ho lōna kateng.
3Empa ke rata hore le utloisise hore Kreste ke hlooho ea monna e mong le e mong, monna ke hlooho ea mosali, athe Molimo ke hlooho ea Kreste. 4Monna e mong le e mong ha a rapela kapa a porofeta a roetse ho hong hloohong, o tlontlolla Kreste. 5Mosali e mong le e mong ha a rapela kapa a porofeta, a sa roala letho hloohong, o tlontlolla monna oa hae; ha ho phapano mahareng a hae le mosali ea kutileng lekorana. 6Ha mosali a sa roala letho, ho molemo hore a kute. Haeba e le ntho e tlontlollang hore mosali a kute kapa a beole moriri, eka khona a roale ho hong hloohong. 7Ha ho hlokahale hore monna a roale letho hloohong, hobane ke setšoantšo sa Molimo, 'me o bontša tlōtla ea hae. Empa mosali eena o bontša tlōtla ea monna oa hae. 8Etsoe mosali o tsoile ho monna, athe monna ha a ea tsoa ho mosali. 9Ebile mosali o bōpiloe ka baka la monna, athe monna ha ea bōptjoa ka baka la mosali. 10Ka baka la mangeloi, mosali o tšoanetse ho roala ho hong hloohong, e leng pontšo ea hore o tlas'a taolo ea monna oa hae.
11Athe mahlong a Morena, monna ke oa bohlokoa ho mosali, le mosali ke oa bohlokoa ho monna, 12hobane joalokaha mosali a tsoile ho monna, le eena monna o tsoaloa ke mosali, 'me tsohle li tsoa ho Molimo. 13Ikahlōleleng e le lōna. Na hoa lokela hore mosali a rapele Molimo a sa roala letho hloohong? 14Ka tlhaho hoa tlontlolla hore monna a hōlise moriri oa hae. 15Empa ha mosali a hōlisa moriri oa hae e ba tlōtla ho eena, hobane o neiloe moriri o molelele, hore e tle e be lesira ho eena. 16Haeba e mong a rata ho phea khang ka hona, rōna, esita le likereke tsa Molimo, ha re na moetlo o joalo oa ho rapela.
Hlomphollo ea Selallo sa Morena
17Joale, ka tseo ke tla li bolela, ha ke le rorise, hobane liphutheho tsa lōna ha li na thuso. 18Taba ea pele, ke utloa hore likarohano li teng har'a lōna, liphuthehong tsa lōna tsa kereke, 'me ke batla ke lumela joalo. 19E, eka khona likarohano li be teng har'a lōna, e le hore bao e leng ba 'nete ba tle ba bonahale. 20Ka baka leo, ha le phutheha 'moho, ha le phuthehele ho ja Selallo sa Morena, 21hobane ha le le lijong, e mong le e mong o potlakela ho itjella tsa hae, e mong a lape, e mong a tahoe. 22Na ha le na mahalōna moo le ka itjellang, kapa la inoella teng? Kapa le nyelisa kereke ea Molimo, 'me le hlabisa ba se nang letho lihlong? Le re ke re'ng ho lōna? Ke le rorise? Che, tabeng ena nke ke ka le rorisa.
Ho thèoa ha Selallo sa Morena
23'Na ke amohetse ho Morena seo ke le neileng sona, e leng hore, ka bosiu boo Morena Jesu a ileng a èkoa ka bona, o ile a nka bohobe, 24a leboha, a bo ngoatha, a re: “Hona ke 'mele oa ka, o fanoang ka baka la lōna. Etsang hona ho nkhōpōla.” 25Ka mokhoa o joalo, ha ho se ho laletsoe, a nka senoelo, a re: “Senoelo sena ke selekane se secha se tiisoang ka mali a ka. Kamehla ha le e-noa, le etse joalo ho nkhōpōla.” 26Kamehla ha le e-ja bohobe bona, 'me le noela senoelong sena, le phatlalatsa lefu la Morena ho fihlela a khutla.
Ho ja Selallo ka mokhoa o sa lōkelang
27Ka baka leo, mang kapa mang ea jang bohobe ba Morena, kapa ea noelang senoelong sa Morena ka mokhoa o sa lokelang, o tla be a siteloa 'mele le mali a Morena. 28Kahoo, motho ka mong a ke a itekole pele, e be hona a jang bohobe boo, 'me a noelang senoelong seo. 29Ea jang le ea noang a sa khetholle hore ke 'mele oa Morena, o ipitsetsa kahlōlo. 30Ke ka baka leo ho nang le ba bangata har'a lōna, ba kulang le ba fokolang, 'me ba bangata ba se ba shoele. 31Hoja re ee re itlhahlobe pele, Molimo o ne a ke ke a re ahlōla. 32Empa rea tsuoa, 'me re otloa ke Morena, e le hore re tle re se ke ra ahlōloa 'moho le lefatše.
33Ha ho le joalo, bana beso, ha le phuthehela ho ja, fanang sebaka. 34Haeba e mong a lapile, a n'o ja ha hae, e le hore ho phutheha ha lōna ho se ke ha le tlisetsa kahlōlo. Ha e le ka tse ling, ke tla li lokisa mohla ke fihlang.
