1 JOHANNE 1

₁Re le ngolla tsa Lentsoe la bophelo, le bileng teng ho tloha tšimolohong, leo re ileng ra le utloa, ra le bona ka mahlo a rōna, ra le bōha, ra ba ra le ama ka matsoho a rōna. ₂Bophelo boo bo ile ba iponahatsa, 'me ra bo bona. Ka hona rea bo paka, 'me re le bolella tsa bophelo bo sa feleng, bo neng bo le ho Ntate, 'me bo iponahalitseng ho rōna. ₃Seo re ileng ra se bona, le seo re ileng ra se utloa, re le bolella sona, e le hore le lōna le tle le phelisane le rōna, 'me ho phelisana ha rōna le lōna ke ho phelisana le Ntate le Mora oa hae, Jesu Kreste. ₄Re le ngolla tsena hore le tle le thabe, 'me thabo ea lōna e be e tletseng.

₅Molaetsa oo le ileng la o utloa ho Mora oa hae, oo re le bolellang oona, ke ona: Molimo ke leseli, 'me ho eena lefifi ha le eo ho hang. ₆Haeba re re re phelisana le eena, empa re phela lefifing, re leshano, 'me ha re phethe tsa 'nete. ₇Empa haeba re phela leseling, joalokaha le eena a le leseling, rea phelisana, 'me mali a Jesu, Mora oa hae, a re hloekisa libe tsohle.

₈Haeba re re ha re na sebe, rea ithetsa, 'me 'nete ha e eo ho rōna. ₉Ha re ipolela libe tsa rōna, Molimo o tla re tšoarela tsona, 'me a re hloekise bokhopo bohle, kaha oa tšepahala, 'me o lokile. ₁₀Haeba re re ha re e-s'o etse sebe, re re o leshano, 'me lentsoe la hae ha le eo ho rōna.