1 JOHANNE 2

₁Bana ba ka, ke le ngolla tsena hore le tle le se ke la etsa sebe. Empa haeba motho a ka etsa sebe, re na le 'muelli ea re buellang ho Ntate: ke Jesu Kreste, ea lokileng. ₂Ke eena ea ikentseng nyehelo ka baka la libe tsa rōna; e seng tsa rōna feela, empa le tsa lefatše lohle.

₃Seo re tsebang ka sona hore rea mo tseba, ke ha re bōlōka litaelo tsa hae. ₄Ea reng: “Kea mo tseba,” empa a sa bōlōke litaelo tsa hae, o leshano, ha a na 'nete. ₅Empa ea bōlōkang lentsoe la hae, ke eo ruri lerato la Molimo le phethehileng ka ho eena. Sena ke seo re tsebang ka sona hore re phela ho eena. ₆Ea reng o phela ho eena, eka khona le eena a tsamaee kamoo Jesu a neng a tsamaea kateng.

₇Baratuoa, taelo eo ke le ngollang eona hase e ncha, empa ke taelo ea khale, eo le bileng le eona ho tloha tšimolohong. Taelo eo ea khale ke lentsoe leo le neng le le utloe. ₈Leha ho le joalo, ke taelo e ncha eo ke le ngollang eona; hoo ke 'nete ka ho eena le ka ho lōna, kaha lefifi le se le ntse le feta, 'me leseli la 'nete le se le khanya.

₉Ea reng eena o leseling, empa a hloile ngoan'abo, o sa ntsane a le lefifing le joale. ₁₀Ea ratang ngoan'abo o phela leseling, 'me ha ho letho ka ho eena le ka mo lihelang sebeng. ₁₁Empa ea hloileng ngoan'abo o lefifing; o tsamaea lefifing, ha a tsebe moo a eang teng, hobane lefifi leo le foufalitse mahlo a hae.

₁₅Le se ke la rata lefatše le tsa lona. Haeba motho a rata lefatše, lerato la Ntate ha le eo ka ho eena, ₁₆hobane tsohle tsa lefatše: litakatso tsa botho, tse hohelang mahlo, le ho ikhantša ka maruo, tsena hase tse tsoang ho Ntate, empa ke tse tsoang ho lefatše. ₁₇Lefatše, 'moho le litakatso tsa lona, lea fela, empa ea etsang thato ea Ntate o tla phela kamehla eohle.

₁₈Bana ba ka, e se e le nako ea bofelo. Kamoo le utloileng kateng hore Sera sa Kreste sea tla, hona joale lira tsa Kreste li se li le teng ka bongata, 'me ke ka hona re tsebang hore e se e le nako ea bofelo. ₁₉Ke ba intšitseng ho rōna, feela e ne e hlile e se ba rōna, hobane hoja e ne e le ba rōna, ba ka be ba ntse ba le ho rōna. Joale ba intšitse hore ho tle ho bonahatsoe hore hase ba rōna kaofela ha bona.

₂₀Empa lōna le na le Moea o Halalelang oo le o neiloeng ke Kreste, 'me bohle le tseba 'nete. ₂₁Ha kea le ngolla hobane le sa tsebe 'nete, empa ke hobane le e tseba, le tseba le hore ha ho leshano le ka tsoang 'neteng. ₂₂Ea leshano ke ofe, haese ea latolang hore Jesu ke Kreste? Ea latolang Ntate le Mora ke eena Sera sa Kreste. ₂₃Mang le mang ea latolang Mora, o latola le eena Ntate; ea pakang Mora, o paka le eena Ntate.

₂₄Molaetsa oo le o utloileng ho tloha tšimolohong le o bōlōke. Ha le ka bōlōka ka ho lōna molaetsa oo le o utloileng ho tloha tšimolohong, le lōna le tla bōlōkeha ho Mora le ho Ntate. ₂₅Seo a re tšepisitseng sona ke sena: Bophelo bo sa feleng.

₂₆Ke le ngoletse tsena, e leng tse amanang le ba le khelosang. ₂₇Empa lōna le amohetse Moea o Halalelang ho eena, o ntseng o phela ka ho lōna, 'me ha le hloke ho rutoa ke mang kapa mang. Erekaha Moea o Halalelang o le ruta tsohle, e leng 'nete, e seng leshano, phelang ka ho Kreste, joalokaha Moea o le rutile.

₂₈Joale he, bana ba ka, phelang ka ho Kreste, e le hore mohla a iponahatsang re tle re be sebete, re se ke ra ba lihlong, ra honyela, ha a se a le teng.

₂₉Kaha le tseba hore o lokile, le lokela ho tseba hore mang le mang ea etsang tse lokileng o tsoetsoe ke eena.