Merabe e ka leboea e fetohela khosi
1Rehoboame a ea Shekeme, moo Baiseraele bohle ba neng ba ile teng, ho ea 'mea hore e be khosi. 2Ha Jeroboame, mora oa Nebate, ea neng a ntse a le Egepeta, a utloa tsena, a 'na a lula moo Egepeta. O ne a ile a baleha khosi Solomone, a ea phela Egepeta. 3Eaba joale Jeroboame oa latoa, 'me eena le sechaba sohle sa Baiseraele, ba fihla ho Rehoboame, ba re: 4“Ntat'ao o ne a re imelitse ka mosebetsi. Ka baka lena, ak'u re imolle mosebetsi ona oo ntat'ao a ileng a re imetsa ka oona, 'me re tla u sebeletsa.”
5Rehoboame a re ho bona: “Ak'u mpheng sebaka sa matsatsi a mararo, le nt'o tla ho 'na hape.” Eaba sechaba sea qhalana.
6Joale a eletsana le banna-baholo bao e neng e le baeletsi ba Solomone, ntat'ae, ha a sa phela, a re ho bona: “Le nkeletsa hore ke arabe sechaba see joang?”
7Ba re ho eena: “Haeba ho tloha kajeno u ka ba mohlanka oa sechaba sena, ua se sebeletsa, ua bua le sona hantle ha u se araba, e tla ba bahlanka ba hao.”
8Rehoboame a se ke a mamela keletso ea banna-baholo, a eletsana le bahlankana bao a hōtseng le bona, ba neng ba mo sebeletsa. 9A re ho bona: “Le nkeletsa hore sechaba see ke se arabe joang, se itseng ho 'na: ‘Ak'u re imolle mosebetsi oo ntat'ao a ileng a re imetsa ka oona’?”
10Bahlankana bana bao a hōtseng le bona ba mo araba, ba re: “Sechaba sena se itseng ho uena: ‘Ntat'ao o ne a re imelitse ka mosebetsi; uena ak'u re imolle,’ u tle u se arabe tjena, u re: ‘Monoana oa ka o monyenyane o motenya ho feta letheka la ntate. 11Ntate o ile a le imetsa ka mosebetsi; 'na ke tla le imetsa le ho feta. Ntate o ne a le shapa ka liphafa; 'na ke tla le shapa ka katse.’ ”
12Ka letsatsi la boraro bo-Jeroboame le sechaba sohle ba fihla ho Rehoboame, joalokaha khosi e ne e itse: “Ka letsatsi la boraro le tle le tle ho 'na hape.” 13Khosi Rehoboame a araba sechaba ka ho se kharumela; a lahla keletso eo banna-baholo ba neng ba mo elelitse ke eona. 14A bua le sona ho latela keletso ea bahlankana, a re: “Ntate o ne a le imelitse ka mosebetsi; 'na ke tla le imetsa le ho feta. Ntate o ne a le shapa ka liphafa; 'na ke tla le shapa ka katse.” 15Ka baka leo, khosi ea se ke ea mamela sechaba, hobane hona ho ne ho entsoe ke Morena, e le hore polelo ea hae e tle e phethahale, eo a ileng a e bolela ka molomo oa Ahiea, oa Shilo, a e bua ho Jeroboame, mora oa Nebate.
16Ha sechaba sohle sa Iseraele se bona hore khosi ha e se mamele, sa e araba, sa re:
“Re amana ka life le Davida?
Mora oa Jese hase letho ho rōna!
Ha re ka ke ra fumana letho
ho eena!
Baiseraele, motho le motho
lapeng la hae!
Davida, sala le morabe oa heno!”
Eaba Baiseraele ba khutlela malapeng a bona. 17Empa Rehoboame a busa bana ba Iseraele ba neng ba ahile metseng ea Juda.
18Joale khosi Rehoboame a rōma Adorame, eo e neng e le mookameli oa makhoba, hore a ee ho Baiseraele, empa Baiseraele bohle ba mo tlepetsa ka majoe, a ba a shoa. Ka baka lena, khosi Rehoboame a palama kariki ea hae ea ntoa ka potlako, a balehela Jerusalema. 19Ho tloha mohlang oo, ho fihlela kajeno-ea-bokajeno, eaba Baiseraele ba fetohetse lelapa la Davida.
20Ha sechaba sohle se utloa hore Jeroboame o boetse o khutlile, sa 'mitsetsa pitsong, sa 'mea hore e be khosi ea Baiseraele bohle. Ha se ke ha e-ba le ea mong ea ileng a latela lelapa la Davida, haese ba morabe oa Juda feela.
Boporofeta ba Shemaea
21Ha Rehoboame a fihla Jerusalema, a khōbōkanya banna bohle ba morabe oa Juda le ba morabe oa Benjamine; e le mokhetho oa bahlabani ba likete tse lekholo le mashome a robeli. Ba ne ba il'o loantša Baiseraele, hore ba hape 'muso, ba o khutlisetse ho eena, e leng eena mora oa Solomone.
22Empa lentsoe la Molimo la fihla ho Shemaea, moporofeta oa Molimo, la re: 23“Bolella Rehoboame, mora oa Solomone, khosi ea Juda le bohle ba morabe oa Juda, le bohle ba morabe oa Benjamine, le sechaba sohle, u re: 24‘Morena o bua tjena: Le se ke la nyoloha ho ea loantša bana babo lōna, e leng bana ba Iseraele. Monna e mong le e mong a khutlele lapeng ha hae, hobane hona ho entsoe ke 'na.’ ” Eaba ba mamela lentsoe la Morena, 'me ba khutlela malapeng a bona, ho latela polelo ea Morena.
Jeroboame o furalla Morena
25Jeroboame a haheletsa motse oa Shekeme, o naheng e maralla ea Efraime, 'me a aha teng. A tloha moo, a ea haheletsa motse oa Penuele.
26Eaba Jeroboame o re ka pelo: “'Muso o tla tloha o khutlela tlung ea Davida. 27Haeba sechaba sena se ka 'na sa nyolohela Jerusalema ho ea nyehella Morena ka mahlabelo teng, ka Tempeleng ea Morena, lipelo tsa sona li tla boela li sokolohela ho mong'a sona, e leng Rehoboame, khosi ea Juda. Se tla mpolaea, se khutlele ho Rehoboame, khosi ea Juda.”
28Hoba khosi Jeroboame a ikeletse, a bōpa manamane a mabeli ka khauta, 'me a re ho sechaba: “Baiseraele, tsela ea Jerusalema le e kutlile, ho lekane! Melimo ea lōna ke ena, e le ntšitseng naheng ea Egepeta!” 29A bea molimo o mong Bethele, o mong a o bea Dane. 30Ntho ena ea e-ba sebe, hobane sechaba se ile sa ea Bethele le Dane ho ea rapela.
31Jeroboame a haha litempele moo ho rapelloang melimo ea bohata teng, 'me har'a sechaba a ikhethela bao e seng bara ba Levi, hore e be baprista.
Jeroboame o etsa mokete Bethele
32Ka letsatsi la leshome le metso e mehlano la khoeli ea borobeli, Jeroboame a etsa mokete o tšoanang le o neng o etsoa naheng ea Juda, a nyehela ka mahlabelo holim'a aletare. Hona a ho etsa Bethele, a etsetsa manamane ao a a bōpileng mahlabelo. Hona moo Bethele a bea baprista ba litempele tseo ho rapelloang melimo ea bohata ho tsona, tseo a neng a li hahile. 33Ka lona letsatsi leo la leshome le metso e mehlano la khoeli ea borobeli, e leng khoeli eo a neng a ikhethetse eona ka ho rata, a nyehella holim'a aletare eo a e hahileng Bethele. A etsetsa bana ba Iseraele mokete; a nyehella holim'a aletare, a chesa mokubetso.
