Samaria ea futuheloa
1Bene-Hadade, khosi ea Arame, a khōbōkanya lebōtho la hae. O ne a e-na le likhosi tse mashome a mararo a metso e 'meli, tse nang le lipere le likariki tsa ntoa. A nyoloha, a futuhela Samaria, a e etsetsa thibella. 2Eaba o rōmela maqōsa ka motseng, ho Akabe, khosi ea Iseraele, o re ho eena: “Bene-Hadade o bua tjena: 3‘Silefera ea hao le khauta ea hao ke tsa ka; le basali ba hao, le bana ba hao ba batle-batle, ke ba ka.’ ”
4Eaba khosi ea Iseraele ea araba, e re: “Joalokaha u se u boletse, mong'a ka, khosi ea ka, ke oa hao; le tsohle tseo ke nang le tsona ke tsa hao.”
5Maqōsa a boela a tla, a re: “Bene-Hadade o bua tjena, o re: ‘Le hoja ke ne ke u rōmetse molaetsa, ke itse u ntlisetse silefera ea hao, le khauta ea hao, le basali ba hao, le bana ba hao, 6hosasane, ka eona nako ena, ke tla rōmela bahlanka ba ka ho uena, ba tl'o hlahloba ntlo ea hao, le matlo a bahlanka ba hao, 'me ba inkele ntho e 'ngoe le e 'ngoe e leng ea bohlokoa ho uena, ba tsamaee ka eona.’ ”
7Eaba khosi ea Iseraele e bitsa baholo ba sechaba, e re: “A ke le boneng kamoo motho enoa a leng leqhōkō kateng! O itse ke mo fe basali ba ka, le bana ba ka, le silefera ea ka, le khauta ea ka, 'me ha kea ka ka mo hanela ka letho.”
8Baholo bohle, le sechaba sohle, ba re ho eena: “U se mamele letho, leha e le ho lumela letho.”
9Ka baka leo, a re ho maqōsa a Bene-Hadade: “Bolellang mong'a ka, khosi, le re: ‘Tsohle tseo u li batlileng ho mohlanka oa hao ka lekhetlo la pele ke tla li etsa, empa ha e le hona hona, nke ke ka ho etsa.’ ” Maqōsa a tsamaea, a isa karabo.
10Bene-Hadade a boela a rōmela molaetsa ho eena, a re: “Ke tla futuhela Samaria ka boieane ba bahlabani, hoo ha e mong le e mong oa bona a ka ngoatha lefupu la mobu oa teng, o ke keng oa ba lekana. Haeba ke sa etse joalo, melimo e nketse tjena le tjena, esita le ho fetisa moo.”
11Eaba khosi ea Iseraele ea araba, e re: “'Molelleng, le re: ‘Sentle ke ho boea le marumo le thebe; re tla boka ha li oroha.’ ”
12Bo-Bene-Hadade le likhosi ba ne ba ntse ba e-noa, ba le liahelong. Ha Bene-Hadade a utloa molaetsa ona, a re ho bahlanka ba hae: “Theang thekō!” Eaba ba thea thekō, ba futuhela motse.
Samaria ea namoleloa
13Joale moporofeta e mong a fihla ho Akabe, khosi ea Iseraele, a re: “Morena o bua tjena: ‘Na u bona boieane boo ba bahlabani? Ke tla neelana ka bona matsohong a hao kajeno, 'me u tla tseba hore ke 'na Morena.’ ”
14Eaba Akabe o re: “E tla ba ka mang?”
Moporofeta a re: “Morena o bua tjena: ‘E tla ba ka bahlanka ba mahosana a litereke.’ ”
Akabe a re: “Ntoa e tla laoloa ke mang?”
Moporofeta a mo araba, a re: “Ke uena.”
15Joale Akabe a bala bahlanka ba mahosana a litereke, 'me a fumana ba le makholo a mabeli le mashome a mararo a metso e 'meli. Kamorao ho moo a bala bahlabani bohle ba bana ba Iseraele, 'me bona ea e-ba likete tse supileng.
16Ba futuha ha tsatsi le le hloohong tsa mengala. Bo-Bene-Hadade le likhosi tse mashome a mararo a metso e 'meli, tse neng li mo tlatsitse, ba ne ba ntse ba e-noa, ba le liahelong, ba tahiloe. 17Bahlankana ba mahosana a litereke ba futuha pele.
Bene-Hadade a rōmela lihloela, tsa tla mo tsebisa, tsa re: “Banna ba Samaria baa tla!”
18Eaba o re: “Ebang ba tla ka khotso, kapa ba tla ka ntoa, le ba thōpe.”
19Bahlankana bao ba mahosana a litereke ba tsoa motseng, bahlabani ba ba setse morao. 20Mohlabani ka mong a bolaea oa hae. Baarame ba baleha, 'me Baiseraele ba ba phalalisa. Bene-Hadade, khosi ea Arame, a loabela pere, a baleha le bahlabani ba palameng lipere. 21Eaba khosi ea Iseraele e ikakhela ntoeng, e hapa lipere le likariki tsa ntoa, Baarame bona ea ba etsa mofela.
Arame e futuha khetlo la bobeli
22Joale moporofeta a fihla ho khosi ea Iseraele, a re ho eona: “Tsamaea, u e'o hlopha mabōtho a hao, u bone hore na u tla etsa joang, hobane ha selemo se thoasa khosi ea Arame e tla u futuhela.”
23Bahlanka ba khosi ea Arame ba re ho eona: “Molimo oa bona ke molimo oa lithaba, ke kahoo ba ileng ba re hlōla, empa ha re ka ba loantšetsa liphuleng, ruri re tla ba hlōla. 24Joale etsa tjena: Tlosa likhosi bolaoling, 'me bakeng sa tsona u bee balaoli ba mabōtho. 25Khōbōkanya mabōtho a lekanang le a ileng a bolaoa; lipere li be kaalo ka tsa pele, le likariki tsa ntoa li be kaalo ka tsa pele. Re tla ba loantšetsa phuleng, 'me ruri re tla ba hlōla.” Eaba o mamela seo ba se buang, 'me a etsa joalo.
26Ha selemo se thoasa, Bene-Hadade a khōbōkanya Baarame, a nyolohela Afeke, a futuhela Baiseraele. 27Bana ba Iseraele le bona ba khōbōkana, ba hlomela, ba khahlanyetsa Baarame. Bana ba Iseraele ba hloma litente tsa bona kapele ho Baarame, ba ba joaloka mehlatsoana e 'meli ea lipotsanyane, ha Baarame bona ba ne ba tletse naha.
28Moporofeta oa Molimo a fihla, a bua ho khosi ea Iseraele, a re ho eona: “Morena o bua tjena: ‘Erekaha Baarame ba itse Morena ke molimo oa maralla, e seng molimo oa liphula, ke tla neelana ka letšoelehali lena matsohong a hao, 'me u tla tseba hore ke 'na Morena.’ ”
29Ba qeta matsatsi a supileng ba hlomme, ba tjamelane. Ka letsatsi la bosupa ntoa ea kopana, 'me ka lona tsatsi leo bana ba Iseraele ba bolaea bahlabani ba litaaso ba Baarame, ba likete tse lekholo. 30Ba phonyohileng ba balehela motseng oa Afeke, empa lerako la motse la pitla ba likete tse mashome a mabeli a metso e supileng ba bona. Bene-Hadade le eena a balehela motseng, a fihla a kena ka kamoreng e kahare.
31Bahlanka ba hae ba re ho eena: “Mamela mona; re utloile hore likhosi tsa Baiseraele ke likhosi tse mohau; ka baka leo, rea u kōpa: Re lumelle re itlame matheka ka masela a mahoashe, re qhake lihlooho tsa rōna ka lithapo, re ee ho khosi ea Iseraele, mohlomong e ka u qenehela.”
32Eaba ba itlama matheka ka masela a mahoashe, ba qhaka lihlooho tsa bona ka lithapo, ba ea ho khosi ea Iseraele, ba fihla ba re: “Mohlanka oa hao Bene-Hadade o re: ‘Kea u rapela: U se ke ua mpolaea!’ ”
Eaba khosi ea Iseraele e re: “O nts'a phela? Ke ngoan'eso!”
33Banna bao ba ba seli haholo ho bona moo moea o fokelang teng, 'me hang-hang, ha ba bone, ba re: “E, ngoan'eno Bene-Hadade!”
Eaba e re: “Tsamaeang, le e'o mo lata!” Bene-Hadade a fihla ho khosi ea Iseraele, 'me ea mo palamisa kariki ea eona ea ntoa.
34Joale Bene-Hadade a re ho khosi ea Iseraele: “Ke tla u buseletsa metse eohle eo ntate a neng a e hape ho ntat'ao, 'me u ka iketsetsa libaka tsa khoebo Damaseka, joalokaha ntate le eena a ne a li etse Samaria.”
Akabe a re: “Ke tla u lōkōlla ha re ka etsa selekane.” Eaba ba etsa selekane le eena, a nt'o mo lōkōlla.
Moporofeta o nyatsa Akabe
35Ka taelo ea Morena, monna e mong oa sehlopha sa baporofeta a re ho molekane oa hae: “Nkotle, kea u rapela!” Empa monna eo a hana ho mo otla.
36Eaba o re ho eena: “Kahobane ha ua hlompha taelo ea Morena, hang-hang ha u tloha ho 'na mona, tau e tla u bolaea.” Eare hang-hang hoba a tlohe ho eo, tau ea khahlana le eena, 'me ea 'molaea.
37A khahlana le monna e mong hape, 'me a re ho eena: “Nkotle, kea u rapela.” Eo a mo otla, a mo ntša maqeba. 38Eaba moporofeta oa tsamaea, o emela khosi tseleng, a ikhakantse ka ho itlama mahlo ka lesela. 39Ha khosi e feta a e hōoeletsa, a re: “Mohlanka oa hao o ne a ikakhetse moo ntoa e leng mahlo-mafubelu; eaba monna e mong o tsoa har'a thekō, o ntlisetsa motho, o re ho 'na: ‘Lisa motho enoa! Haeba a ka tšoha a phonyoha, u tla bolaoa bakeng sa hae; ho seng joalo u tla lefa silefera e etsang boima ba likilo tse mashome a mararo a metso e mene.’ 40Ha mohlanka oa hao a ntse a tšoere ka mona le ka mane, monna eo a nyamela.”
Khosi ea Iseraele ea re ho eena: “Kahlōlo ea hao e tla ba eona eo. Ke uena ea itheretseng eona.”
41Joale a potlakela ho itlamolla mahlo, 'me khosi ea Iseraele ea bona hore ke e mong oa baporofeta. 42Moporofeta eo a re ho khosi: “Morena o bua tjena: ‘Kahobane u lōkōlōtse motho eo ke neng ke rerile hore a timetsoe, u tla bolaoa bakeng sa hae; le sechaba sa hao se bolaoe bakeng sa sechaba sa hae.’ ” 43Khosi ea Iseraele ea ea tlung ea eona; ea fihla Samaria pelo ea eona e tetebetse, e tšoenyehile.
