Baokameli ba mesebetsi ea Solomone
1Khosi Solomone e ne e le khosi ea Iseraele eohle. 2Baokameli ba mesebetsi ea hae e ne e le bana: Asariea, mora oa Sadoke, e ne e le moprista; 3Elehorefe le Ahiea, bara ba Shisha, e ne e le bangoli; Jehoshafate, mora oa Ahilode, e le mongoli oa liketsahalo; 4Benaea, mora oa Jehoeada, e le molaoli oa mabōtho; Sadoke le Abiatare e le baprista; 5Asariea, mora oa Nathane, e le mookameli oa babusi ba litereke; moprista Sabude, mora oa Nathane, e ne le sephatho sa khosi; 6Ahishare e le mookameli oa lelapa la khosi; Adonirame, mora oa Abada, eena e le mookameli oa makhoba.
Babusi ba litereke
7Solomone o ne a e-na le babusi ba litereke ba leshome le metso e 'meli naheng ea Iseraele, ba neng ba tlisetsa khosi le lelapa la eona lijo. 'Musi ka mong o ne a e-na le khoeli eo ka eona a tlisetsang khosi lijo. 8Mabitso a bona ke ana: Mora oa Hure o ne a le naheng e maralla ea Efraime; 9mora oa Dekere a le Makase, le Shaalebime, le Bete-Shemeshe, le Elone e Bete-Hanane; 10mora oa Hesede a le Arubote, a okametse Soko le naha eohle ea Hefere; 11Mora oa Abinadabe, ea neng a nyetse Tafate, morali oa Solomone, a okametse litereke tsohle tsa Dore. 12Baana, mora oa Ahilode, o ne a okametse Taanake le Megido, le Bete-Sheane eohle e haufi le Saretane, tlas'a Jesereele, ho tloha Bete-Sheane ho ea fihla Abele-Mehola, le ho ea fihla ka nq'ane ho Jokoneame. 13Mora oa Gebere a le Rama e Gileade, o ne a okametse metse ea Jaire, mora oa Manase. Metse eo e ne e le Gileade. O ne a bile a okametse Aregobe e Bashane. Kaofela e ne e le metse e mashome a tšeletseng, e meholo, e nang le marako, le mekoallo ea lethose. 14Ahinadabe, mora oa Ido, a le Mahanaime; 15Ahimase, ea neng a nyetse morali e mong oa Solomone, ea bitsoang Basemate, a le naheng ea Nafthali. 16Baana, mora oa Hushai, o ne a le Ashere le Alote; 17Jehoshafate, mora oa Parua, a le naheng ea Isakare; 18Shimei, mora oa Ela, a le naheng ea Benjamine; 19Gebere, mora oa Uri, a le Gileade, naheng ea Sihone, khosi ea Baamore, le naheng ea Oge, khosi ea Bashane. E ne e le eena feela 'musi oa naha eo.
Bohlale ba Solomone le katleho ea hae
20Sechaba sa morabe oa Juda le sa Iseraele se ne se le sengata joaloka lehlabathe le lebōpong la leoatle. Se ne se e-ja, se e-noa, se nyakalla. 21Solomone a busa mebuso eohle, ho tloha nōkeng ea Euferatese, ho ea fihla naheng ea Bafilesita, le meeling ea Egepeta. Mebuso ena eohle ea mo tlisetsa limpho, ea mo sebeletsa ka nako eohle ea ho phela ha hae.
22Lijo tsa Solomone, tsa letsatsi le leng le le leng, e ne e le likilo tse ka bang likete tse tharo tsa phofo e thumisehileng, le likilo tse ka bang likete tse tšeletseng tsa phofo feela; 23lipholo tse leshome tse nontšitsoeng, le lipholo tse mashome a mabeli tse tsoang makhulong, le linku tse lekholo, ho sa baloe likhama, le litšèpè, le matsa, le likhōhō.
24Solomone o ne a busa naha eohle e ka bophirimela ho nōka ea Euferatese, ho tloha Tifesa, ho ea fihla Gasa; a busa le likhosi tsohle tsa naha eo. One a phelisana ka khotso le lichaba tsohle tseo a neng a ahelane le tsona. 25Pusong eohle ea Solomone, ho tloha Dane ho ea fihla Beeresheba, ba morabe oa Juda le oa Iseraele ba ne ba phela ka khotso, motho ka mong a lula tlas'a sefate sa hae sa morara, kapa sa feiee.
26Solomone o ne a e-na le lijelo tse likete tse mashome a mane, tsa lipere tse hulang likariki tsa hae tsa ntoa; le bahlabani ba palamang ba likete tse leshome le metso e 'meli.
27E mong le e mong oa babusi ba litereke o ne a tlisetsa khosi Solomone lijo ka khoeli eo a e khethetsoeng, 'me ho sa haelle letho. 28'Musi ka mong, ho ea kamoo a laetsoeng kateng, o ne a isa harese le seteroi moo li hlokoang teng, e le lijo tsa lipere tse hulang likariki tsa ntoa, le tse palangoang.
29Molimo a nea Solomone bohlale bo makatsang, le kutloisiso e makatsang, le tsebo e ngata joaloka lehlabathe le lebōpong la leoatle. 30Bohlale ba Solomone bo ne bo feta bohlale ba batho bohle ba Bochabela, le ba batho bohle ba Egepeta. 31O ne a le bohlale ho feta batho bohle, a feta le Etane oa Moesera, le Hemane, le Kalekole, le Dareda, bara ba Mahole, 'me lebitso la hae la tuma lichabeng tsohle tseo a neng a ahelane le tsona. 32Solomone a qapa maela a likete tse tharo; lifela tsona tsa e-ba sekete le metso e mehlano. 33A bua ka lifate, ho tloha ka sefate sa kedare ea Lebanone, ho ea ho sa hisopa e melang marakong; a bua le ka liphoofolo, le ka linonyana, le ka lihahabi, le ka litlhapi. 34Batho bohle, ba tsoang lichabeng tsohle tsa lefatše, ba rōngoa ke likhosi tsa bona, tse ileng tsa utloela tsa bohlale ba Solomone, hore ba e'o inoesa ka nkho.
