1 SAMUELE 1

₁Ho ne ho e-na le monna e mong oa Ramataime-Sofime, oa naha e maralla ea Efraime. Lebitso la hae e ne e le Elekana, mora oa Jerohame, Jerohame mora oa Elehu, Elehu mora oa Tohu, Tohu mora oa Sufe, oa morabe oa Efraime. ₂O ne a e-na le basali ba babeli. Lebitso la oa pele e ne e le Anna, la oa bobeli e le Peninna. Peninna o ne a e-na le bana, empa Anna eena o ne a se na bana. ₃Ka selemo se seng le se seng monna eo o ne a ee a tlohe motseng oa habo, a ee Shilo ho ea khumamela Morena oa mabōtho, le ho mo etsetsa sehlabelo. Bara ba babeli ba Eli, e leng Hofeni le Finease, e ne e le baprista ba Morena.

₄Ka letsatsi leo Elekana a neng a etsa sehlabelo ka lona, o ne a ee a nee mohats'a hae Peninna, le bara le barali ba hae bohle, liabo tsa sehlabelo. ₅Empa Anna eena o ne a ee a mo fe liabo tse peli, hobane o ne a mo rata, le hoja Morena a ne a mo timme thari. ₆Mohalitsong oa hae o ne a mo utloisa bohlōkō ka ho mo soma, hobane Morena a mo timme thari. ₇Hona ho ne ho etsahala ka selemo se seng le se seng. Kamehla ha ba nyolohela Tempeleng ea Morena, Peninna o ne a ee a utloise Anna bohlōkō, ka baka leo a lle, a se ke a je. ₈Joale Elekana, monna oa Anna, a re ho eena: “Anna, u llela'ng? Ke hobane'ng ha u sa je? Ke hobane'ng ha pelo ea hao e le bohlōkō! Na 'na ha ke ntho ea bohlokoa ho uena ho feta bara ba leshome?”

₉Eare hoba ba je, 'me ba noe, ha ba le Shilo, Anna a ema. Moprista Eli o ne a lutse setulong se pel'a monyako oa Tempele ea Morena. ₁₀Moea oa Anna o ne o tšoenyehile haholo; eaba o rapela Morena, o lla habohlōkō. ₁₁A etsa kano, a re: “Oho, Morena oa mabōtho, haeba ruri u ka talima matšoenyeho a lekhabunyane la hao, 'me ua nkhopola, ua se ke ua lebala lekhabunyane la hao, ua mpa ua le fa ngoana oa moshanyana, ke tla mo abela Morena ka matsatsi 'ohle a ho phela ha hae, 'me hlooho ea hae e ke ke ea beōloa.”

₁₂Ha a se a nkile nako e telele a ntse a rapela Morena, Eli a 'na a talima molomo oa hae. ₁₃Anna o ne a rapela ka pelo, a ntse a bebenya melomo feela, empa lentsoe la hae le sa utloahale. Ka baka leo, Eli a hopola hore mosali eo o tahiloe. ₁₄Eaba Eli o re ho eena: “U tla tahoa ho fihlela neneng? Ak'u hlaphoheloe botahoeng bona ba hao!”

₁₅Anna a araba, a re: “Che, mong'a ka, 'na ke mosali ea tšoenyehileng moeeng. Ha kea noa veine kapa seno se tahang; ke ne ke mpa ke tšollela masisapelo a ka ho Morena. ₁₆U se ke ua talima lekhabunyane la hao e le mosali ea khopo, hobane ho fihlela joale ke ntse ke buisoa ke masisapelo a ka le matšoenyeho a ka.”

₁₇Eli a mo araba, a re: “Tsamaea ka khotso! Eka Molimo oa Iseraele a ka u nea seo u se kōpileng ho eena!”

₁₈Anna a re: “Ak'u talime lekhabunyane la hao ka mohau.” Mosali eo a ikela, 'me a ja, sefahleho sa hae sa khanya khotso. ₁₉Bo-Elekana le Anna ba tsoha ka malungoalungoana, ba khumamela Morena, ba khutla, 'me ba fihla tlung ea bona e Rama. Elekana a kena likobong tse Anna, mohats'a hae, 'me Morena a mo hopola.

₂₀Ha ho se ho fetile nako e itseng, Anna a ithoala, 'me a beleha mora. A mo rea lebitso la Samuele, a re: “Ke hobane ke mo kōpile ho Morena.”

₂₁Joale monna oa hae Elekana, hammoho le bohle ba lelapa la hae, a nyoloha ho ea nyehella Morena ka sehlabelo sa selemo se seng le se seng, le ho phetha kano ea hae. ₂₂Empa ha e le Anna eena a se ke a nyoloha, hobane o ile a re ho monna oa hae: “Hang-hang ha moshanyana a khoesoa, ke tla mo tlisa, ke mo hlahise kapele ho Morena, 'me a tle a hlole teng kamehla eohle.”

₂₃Eaba Elekana, monna oa hae, o re ho Anna: “Etsa seo u bonang se lokile, u emele ho fihlela u mo khoesitse. Feela eka Morena a ka etsa hore u phethahatse kano ea hao.” Eaba Anna o itulela hae, o hōlisa mora oa hae ho fihlela a ba a mo khoesa.

₂₄Ha Anna a se a khoesitse Samuele, a nyoloha le eena a khanna lipohoana tse tharo, a nkile phofo e thumisehileng, e boima ba likilo tse leshome, le lekuka la veine, a mo isa ka tlung ea Morena e Shilo. Moshanyana eo o ne a sa le monyenyane. ₂₅Ba hlaba e 'ngoe ea lipohoana, 'me ba isa moshanyana ho Eli. ₂₆Anna a re: “Oho, mong'a ka, ke hlapanya ka uena, mong'a ka, hore ke 'na mosali ea kileng a ema pel'a hao mona, a rapela Morena. ₂₇Ke ne ke kōpa hore a mphe moshanyana enoa, 'me Morena o 'neile seo ke neng ke se kōpe ho eena. ₂₈Ka baka leo, le 'na ke mo abela Morena. Ke mo abetse Morena ka matsatsi 'ohle a bophelo ba hae.” Eaba ba khumamela Morena hona moo.