Ho futuheloa Bafilesita
1Saule o ne a e-na le lilemo tse mashome a mararo ha a qala ho busa Iseraele. E bile khosi ea Iseraele ka lilemo tse peli.
2Saule a ikhethela banna ba likete tse tharo ba Baiseraele. Ba likete tse peli ba ne ba e-na le eena Mikemase, le thabeng ea Bethele. Ba sekete ba ne ba e-na le Jonathane, Gibea e Benjamine. Banna ba setseng a ba khutlisetsa malapeng a bona.
3Jonathane a hlōla lebōtho la Bafilesita le neng le le Gibea. Bafilesita ba utloela taba ena. Saule a laela hore ho letsoe lenaka naheng eohle, a re: “Baheberu ha ba ke ba mamele!” 4Baiseraele bohle ha ba utloa ho thoe Saule o hlōtse lebōtho la Bafilesita, le hore Bafilesita ba hloile Baiseraele, sechaba sa phuthehela ho Saule a le Gilegale.
5Bafilesita ba kopana ho loantša Baiseraele. Ba ne ba e-na le likariki tsa ntoa tse likete tse mashome a mararo, le bapalami ba lipere ba likete tse tšeletseng. Bahlabani ba ne ba le bangata joaloka lehlabathe le lebōpong la leoatle. Bafilesita ba nyoloha, ba hloma Mikemase, ka bochabela ho Bete-Afene. 6Ha Baiseraele ba bona hore taba li mosenekeng, kaha sechaba se ne se tsielehile, batho ba ipata ka mahaheng, le meferong, le mafikeng, le liqhobosheaneng, le malumeleng. 7Baheberu ba bang ba ne ba tšeletse mose ho Jorodane, naheng ea ba morabe oa Gade le Gileade.
Empa ha e le Saule eena o ne a ntse a le Gilegale, 'me sechaba sohle sa mo latela se ntse se thōthōmela. 8Saule a hlola matsatsi a supileng, ho emela nako eo Samuele a neng a e beile. Empa Samuele a se ke a tla Gilegale, 'me sechaba sa qhalanela Saule. 9Ka baka leo, Saule a re: “Ntlisetseng nyehelo ea secheso le nyehelo ea teboho.” Saule a etsa nyehelo ea secheso. 10Ha Saule a qetile ho etsa nyehelo ea secheso, ba bona Samuele a fihla. Saule a mo khahlanyetsa, a mo lumelisa.
11Eaba Samuele o re ho eena: “U entse'ng?”
Saule a re: “Ke ile ka bona hore sechaba sea nqhalanela, le hore le uena ha u fihle ka nako eo u neng u e beile, le hore Bafilesita ba kopanetse Mikemase. 12Ka baka leo, ke ile ka re: ‘Bafilesita ba tla theohela ho 'na, Gilegale, empa ha ke e-s'o ka ke rapela Morena, 'me ka fumana ke tlameha hore ke etse nyehelo ea secheso.’ ”
13Eaba Samuele o re ho Saule: “U sebelitse ka bothoto. Ha ua ka ua bōlōka molao oa Morena Molimo oa hao, oo a u laetseng oona. Hoja u entse joalo, Morena a ka be a hlomamisitse 'muso oa hao, hore e be oa kamehla eohle. 14Empa joale 'muso oa hao o ke ke oa hlola o tsoela pele. Morena o se a ipatletse motho eo a mo ratang. Morena o laetse motho eo hore e be khosi ea sechaba sa hae, hobane uena ha ua ka ua mamela seo Morena a u laetseng sona.”
15Samuele a ema, a tloha Gilegale, a nyolohela Gibea e Benjamine. Saule a bala batho bao a neng a e-na le bona, 'me ea e-ba banna ba ka bang makholo a tšeletseng.
16Saule le mora oa hae Jonathane, le banna bao a neng a e-na le bona, ba hlola Gibea e Benjamine, empa Bafilesita bona ba hloma Mikemase. 17Banna ba futuhang ba tsoa liahelong tsa Bafilesita, ba le lihlopha li tharo. Sehlopha se seng sa nka tsela e eang Ofera, naheng ea Shuale; 18sehlopha se seng sa nka tsela e eang Bete-Horone, 'me sehlopha sa boraro sa nka tsela e eang moeling o okametseng khohlo ea Seboime, ka nq'a lehoatateng.
19Mehleng eo ho ne ho se na lelala le ka fumanoang naheng eohle ea Iseraele, hobane Bafilesita ba ne ba re: “Baiseraele ba se tšohe ba iketsetsa lisabole kapa marumo.” 20Empa Baiseraele bohle ba ne ba ee ba ee ho Bafilesita, e mong le e mong a e'o leotsa sekara sa hae, le sekele ea hae, le selepe sa hae, le peke ea hae. 21Tefiso ea ho leotsa selepe le tsenene e ne e le silefera e etsang boima ba likeramo tse ka bang 'ne, ea ho leotsa sekara le mohoma oa matsoho e ne e le tse ka bang robeli.
22Ka baka leo, mohl'a letsatsi la ntoa, ho ne ho se na monna le ea mong oa banna ba neng ba e-na le Saule le Jonathane, ea neng a tšoere sabole kapa lerumo letsohong la hae. E ne e le Saule le mora oa hae Jonathane feela ba neng ba e-na le tsona.
23Bahlabani ba Bafilesita ba ne ba laletse lekhalong la Mikemase.
