1Matsatsing 'ona ao, Bafilesita ba khōbōkanya mabōtho a bona ho futuhela Baiseraele. Eaba Akishe o re ho Davida: “U hl'u tsebe hantle hore uena le bahlabani ba hao le tla ea le 'na ntoeng.”
2Davida a re ho Akishe: “Ho lokile! U tla bona ntho eo mohlanka oa hao a tla e etsa!”
Akishe a re ho Davida: “Ke hantle; u tla ba molebeli oa ka kamehla.”
3Hoba Samuele a shoe, 'me Baiseraele bohle ba mo llele, ba mo epela Rama, motseng oa habo. Saule o ne a ile a leleka linōhe le mathuela kahar'a naha.
Saule o ba tsietsing
4Bafilesita ba khōbōkana, ba fihla ba hloma Shuneme. Saule le eena a khōbōkanya Baiseraele bohle, 'me a hloma Gileboa. 5Ha Saule a bona mabōtho a Bafilesita a tšoha, 'me matšoafo a hae a uba habohlōkō. 6Saule a botsa Morena, empa Morena a se ke a mo araba, leha e le ka litoro, kapa ka lejoe la Urime, kapa ka baporofeta. 7Eaba Saule o re ho bahlanka ba hae: “Mpatleleng mosali oa senōhe, ke e'o lisetsa ho eena.”
Ba re ho eena: “Mane Ene-Dore mosali ea joalo o teng.”
Senōhe sa Ene-Dore
8Saule a ikhakanya, apara liaparo lisele, a tsamaea le banna ba babeli, ba fihla ho mosali eo bosiu. Saule a re ho mosali eo: “Kea u rapela: Ak'u ntšenolele tse tlang ho etsahala ka ho mpotsetsa ho balimo, u be u ntsosetse eo ke tla u bolella lebitso la hae.”
9Mosali eo a re ho eena: “U tseba seo Saule a se entseng, le kamoo a lelekileng linōhe le mathuela kateng kahar'a naha ena. Ke ka lebaka la'ng ha u nketsetsa leraba, hore ke tle ke bolaoe?”
10Empa Saule a hlapanyetsa mosali eo ka Morena, a re: “Ka Morena ea phelang, taba ena e ke ke ea u tlisetsa kotlo.”
11Joale mosali eo a re: “Ke u tsosetse mang?”
Saule a re: “Ntsosetse Samuele.”
Samuele oa hlaha
12Hang ha mosali a bona Samuele a hōoeletsa haholo, a re ho Saule: “U nthetselitse'ng? Ke uena Saule!”
13Eaba khosi e re ho eena: “U se ke ua tšoha. U bona'ng?”
Mosali a re ho Saule: “Ke bona ntho e kang sethotsela e rōpōha fatše.”
14Saule a re ho mosali: “E sebōpeho se joang?”
Mosali a re: “Ho rōpōha monna-moholo ea apereng seaparo se selelele.”
Saule a tseba hore efela eo ke Samuele. A obamela fatše ka sefahleho, ho isa hlompho.
Kahlōlo ea Saule
15Samuele a re ho Saule: “Ke ka baka la'ng ha u nkhathalitse ka hore u ntsose?”
Saule a re: “Ke tsielehile haholo, hobane Bafilesita baa ntoantša, empa Molimo o mphuraletse. Ha a sa nkaraba, leha e le ka baporofeta kapa ka litoro. Ke ka lebaka lena ke ileng ka u bitsa, hore u tl'o mpolella seo ke tšoanetseng ho se etsa.”
16Eaba Samuele o re: “Ke ka baka la'ng ha u mpotsa ha e le moo Morena a u furaletse, a fetohile sera sa hao? 17Morena o u entse seo a neng a u bolelle sona pele, ka molomo oa ka. Morena o u amohile 'muso oa hao, o o neile e mong, e leng Davida, 18hobane ha ua ka ua mamela lentsoe la Morena, 'me ha ua ka ua phethahatsa kahlōlo ea Morena ha a ne a halefetse Baamaleke. Ke ka lebaka lena Morena a u etselitseng ntho e tjena kajeno. 19Ho feta mona, Morena o tla neelana ka Baiseraele, le ka uena matsohong a Bafilesita. Hosasane uena le bara ba hao le tla be le le bafu joaloka 'na. Morena o tla neelana le ka mabōtho a Baiseraele matsohong a Bafilesita.”
Saule o nyahama pelo
20Hang ha Saule a utloa mantsoe a Samuele a tjapalla fatše a tšohile haholo, a feletsoe ke matla, hobane o ne a qetile letšeare lohle le bosiu bohle a sa je.
21Mosali eo a atamela ho Saule, a bona hore Saule o tšohile haholo, 'me a re ho eena: “Lekhabunyane la hao le ile la mamela lentsoe la hao, eaba le ipea kotsing ka ho phetha seo u ileng ua le laela sona. 22Ka baka lena kea u rapela, le uena ak'u mamele lekhabunyane la hao. A nke ke u fe thathana ea bohobe u je, u tle u matlafale, ebe u tsoela pele leetong la hao.”
23Empa Saule a hana, a re: “Nke ke ka ja!”
Bahlanka ba hae le mosali eo ba mo qophella, a b'a qetella a lumetse. Joale a ema fatše, a lula holim'a moalo.
24Mosali o ne a e-na le namane e nontšitsoeng ka sakeng. A potlaka, a e hlaba; a nka phofo, a e luba, a pheha bohobe bo sa lomosoang. 25Tsena a li bea kapele ho Saule le bahlanka ba hae, 'me ba e-ja, ba nt'o ema, ba tsamaea ka bona bosiu bona boo.
