1 SAMUELE 9

₁Ho ne ho e-na le monna oa morabe oa Benjamine, lebitso la hae e le Kishe, mora oa Abiele, mora oa Serore, mora oa Bekorate, mora oa Afiea oa morabe oa Benjamine. E ne e le morui. ₂O ne a e-na le mora ea bitsoang Saule, e le mohlankana ea mahlong, 'me ho se na le ea mong oa bana ba Iseraele ea mo fetang ka letho. O ne a a le molelele, a phahametse batho bohle ka mahetla.

₃Joale ha lahlela litonki tsa Kishe, ntat'a Saule. Kishe a re ho Saule: “Nka e mong oa bahlanka, u tsamaee, u e'o batla litonki.” ₄Saule a feta har'a naha ea Efraime e maralla, a feta le har'a naha ea Shalesha, empa ba se ke ba li fumana. Eaba ba feta har'a naha ea Shaaleme, 'me le moo tsa e-ba sieo. A feta le har'a naha ea morabe oa Benjamine, empa le teng a se ke a li fumana.

₅Ha ba se ba fihlile naheng ea Sufe, Saule a re ho mohlanka oa hae, ea neng a e-na le eena: “Tloo, re khutle, esere ntate a tlohela ho nahana litonki tse lahlehileng, eaba o tšoenyeha ka baka la rōna.”

₆Mohlanka a re ho eena: “Bona mona, motseng ona ho na le monna ea halalelang, 'me ke motho ea hlomphehang. Tsohle tseo a li bolelang, ruri li ee li phethahale. Joale a re ee hona teng; mohlomong a ka re bolella ho hong malebana le leeto lena leo re leng har'a lona.”

₇Eaba Saule o re ho mohlanka oa hae: “Empa bona mona, haeba re e-ea teng, monna eo re tla mo nea eng? Ha ho sa na mofao mekotlaneng ea rōna, 'me ha ho mpho eo re tla e nea monna ea halalelang. Re na le eng?”

₈Mohlanka a boela a araba Saule, a re: “Bona, ke na le cheletana ea silefera, eo ke tla e nea monna eo ea halalelang, 'me o tla re bolella moo re tla fumana litonki tseo teng.”

₉Mehleng ea pele, naheng ea Iseraele, ha motho a ne a il'o botsa Molimo o ne a ee a re: “Tloo, re ee ho senōhe,” hobane ea bitsoang moporofeta kajeno, mehleng eo o ne a bitsoa senōhe. ₁₀Joale Saule a re ho mohlanka oa hae: “U buile hantle! Tloo, re ee!” Eaba ba ea motseng oo monna ea halalelang a neng a le ho oona.

₁₁Ha ba ntse ba nyoloha moepeng, ba e-ea ka motseng, ba fumana basetsana ba e-ea selibeng, 'me ba re ho bona: “Na senōhe sa moo se teng?”

₁₂Basetsana ba ba araba, ba re: “Se teng. Se ka mono kapele ho lōna. Potlakang; se fihlile hona kajeno motseng ona, hobane hona kajeno sechaba se il'o etsetsoa sehlabelo aletareng e holim'a leralla. ₁₃Hang-hang ha le fihla ka motseng le tla se fumana se e-s'o nyolohele leralleng ho ea ja. Sechaba se ke ke sa ja lijo, senōhe se e-s'o fihle, hobane se lokela ho hlohonolofatsa sehlabelo, 'me kamorao ho moo ba memiloeng ba tla ja. Ka baka leo, nyolohang hona joale, 'me le tla se fumana.”

₁₄Eaba ba nyolohela ka motseng. Ha ba kena har'a motse ba bona Samuele a e-tla a lebile ho bona, a nyolohela leralleng.

₁₅Ka letsatsi le kapele ho la ho fihla ha Saule, Morena o ne a ile a senolela Samuele, a re: ₁₆“Hosasane, ka nako eona ena, ke tla rōmela monna ea tsoang naheng ea Benjamine ho uena. U tla mo tlotsa hore e be khosi ea sechaba sa ka, 'me o tla namolela sechaba sa ka matsohong a Bafilesita. Ke bone ho sotleha ha sechaba sa ka, hobane sello sa sona se fihlile ho 'na.”

₁₇Ha Samuele a bona Saule, Morena a bua ho Samuele, a re: “Monna eo ke buileng ka eena ho uena ke enoa! Eena monna enoa o tla busa sechaba sa ka.”

₁₈Joale Saule a atamela pel'a Samuele, khorong ea motse, a re: “Ak'u mpolelle, kea u rapela, ebe ntlo ea senōhe e hokae?”

₁₉Samuele a araba Saule, a re: “Ke 'na senōhe. Nketelle pele, u nyolohele leralleng, hobane kajeno re tla ja le uena. Hosasane ke tla u lōkōlla, u tsamaee, 'me ke tla u bolella tsohle tse ka pelong ea hao. ₂₀Ha e le litonki tse nang le matsatsi a mararo li u lahlehetse, u se ke ua itšoenya ka tsona, hobane le se li fumanoe. Empa ke mang eo Baiseraele ba mo labalabelang haholo? Na hase uena le lelapa lohle la ntat'ao?”

₂₁Saule a araba, a re: “Na 'na ha ke oa morabe oa Benjamine, e leng o monyenyane haholo oa merabe ea Iseraele? Na lelapa leso hase lona le lenyenyane haholo la malapa a morabe oa Benjamine? Joale ke ka baka la'ng ha u bua ntho e tjee ho 'na?”

₂₂Eaba Samuele o nka Saule le mohlanka oa hae, o kena le bona ka tlung, o ba bea ka sehloohong ho ba memiloeng, bao e neng e ka ba banna ba mashome a mararo. ₂₃Samuele a re ho moapehi: “Tlisa setho seo ke ileng ka u nea sona, ka re u se bee kathōko.”

₂₄Moapehi a nka sephaka, le tsohle tse tsamaeang le sona, a se bea kapele ho Saule. Samuele a re: “Bona, setho ke sena seo u se bōlōketsoeng. Se bee kapele ho uena, u je, hobane ho tloha ha ke ne ke re ke memile batho, haesale ke u bōlōkela sona hore u be u fihle.” Ka letsatsi leo Saule a ja le Samuele.

₂₅Ba theoha holim'a leralla, 'me ba fihla motseng. Bosiung boo Saule a alloa liphate kaholim'a marulelo a ntlo, a robala teng.

₂₆Ba tsoha ka malungoalungoana. Eare ha mafube a hlaha, Samuele a bitsa Saule a le kaholim'a marulelo a ntlo, a re: “Tsoha, ke u lōkōlle, u tsamaee!” Saule a ema, 'me ba tsoela seterateng ba le babeli le Samuele. ₂₇Ha ba theohela ho ea qetellong ea motse, Samuele a re ho Saule: “E-re mohlanka oa hao a fetele kapele ho rōna,” eo a fetela kapele, “empa uena u eme themelele! 'me ke tla u bolella molaetsa oa Molimo.”