Moporofeta o khalemela Jehoshafate
1Jehoshafate, khosi ea Juda, a khutlela tlung ea hae, Jerusalema, ka khotso. 2Jehu, mora oa Hanani oa moporofeta, a ea mo khahlanyetsa, 'me a re ho khosi Jehoshafate: “Na ke hantle ho thusa batho ba khopo, le ho rata ba hloileng Morena? Ka baka leo, Morena o u halefetse. 3Leha ho le joalo, u entse ho hong ho lokileng: U tlositse litšoantšo tsa Ashera naheng ena, 'me u itokiselitse ho sebeletsa Molimo.”
Jehoshafate o etsa liphetoho
4Jehoshafate o ne a ahile Jerusalema, empa o ne a ee a tsamaee har'a sechaba, ho tloha Beeresheba ho ea fihla naheng e maralla ea Efraime, a ntse a bolella sechaba hore se khutlele ho Morena Molimo oa bo-ntat'a sona. 5Naheng eohle ea Juda a bea moahlōli motseng o mong le o mong o hahelelitsoeng. 6A re ho baahlōli bana: “Hlokomelang seo le se etsang, hobane ha le ahlōlele motho, empa le ahlōlela Morena, ea leng teng ha le ahlōla. 7Ka baka leo, tšabang Morena. Elang hloko, 'me le sebetse joalo. Molimo oa rōna ha a sothe toka, ha a ee ka tšobotsi, ha a batle tjotjo.”
8Le motseng oa Jerusalema Jehoshafate a khetha baahlōli har'a Balevi, le har'a baprista, le har'a lihlooho tsa malapa a Iseraele, hore ba ahlōlele Morena, 'me ba felise liqabang. Ba ne ba ahile Jerusalema. 9A ba laela, a re: “Le tšabe Morena, le mo sebeletse ka botšepehi, le ka lipelo tse se mang mano. 10Ha litaba li ka ba teng pakeng tsa bana babo lōna ba phelang metseng, ebang ke tsa tšōllo ea mali, kapa tse amanang le molao, kapa litaelo, kapa litemoso, kapa melaoana, le ba hlokomelise hore ba se ke ba siteloa Morena, 'me lōna, le bana babo lōna, Morena a ke ke a le halefela. Etsang joalo, 'me le ke ke la ba le molato.
11“Moprista e Moholo Amariea, ke eena ea tla le okamela litabeng tsohle tsa Morena. Sebadiea, mora oa Ishemaele, 'musi oa sechaba sa Juda, o tla le okamela litabeng tsohle tsa khosi, 'me Balevi e tla ba basebeletsi ba lōna. Sebetsang ka sebete, 'me Morena a ke a thuse ba lokileng.”
