Ho lokisetsoa ho haha Tempele
1Solomone a rera ho hahela Morena Tempele le ho ikhahela ntlo ea bokhosi. 2A khetha banna ba likete tse mashome a supileng ho thōtha thepa ea ho haha, le ba likete tse mashome a robeli ho betla majoe thabeng. A khetha baokameli ba bona ba likete tse tharo le makholo a tšeletseng.
3Solomone a rōmela molaetsa ho Hirame, khosi ea Tire, a re: “Joalokaha u ile ua sebetsa le Davida, ntate, ua mo rōmela lifate tsa likedare ho ikhahela ntlo, le 'na ak'u sebetse le 'na joalo. 4Bona, ke hahela Morena Molimo oa ka, Tempele moo a tla khumamelloa teng, 'me ke mo abela eona. Ke moo ke tla mo chesetsa mokubetso o monko o monate teng. Ke moo re tla bea bohobe bo halalelang teng, re etsetse le nyehelo ea secheso teng, hoseng le mantsiboea, le ka lisabatha, le ka mekete ea ho thoasa ha khoeli, le ka mekete e halalelang ea Morena Molimo oa rōna. Ena ke taelo ea kamehla eohle e laetsoeng Baiseraele.
5“Tempele ena eo ke tla e haha e kholo hobane Molimo oa rōna o moholo ho feta melimo eohle. 6Empa ke mang ea ka mo hahelang Tempele, haesitana le maholimo a maholo hakaana-kaana, a ke ke a mo lekana? Joale ebe 'na ke mang, hoo nka mo hahelang Tempele, haese feela ho haha sebakana sa ho mo chesetsa mahlabelo?
7“Ka lebaka lena, ak'u nthōmelle monna oa setsebi, ea tsebang ho etsa lintho tsa khauta, le tsa silefera, le tsa lethose, le tsa tšepe; ea tsebang le ho etsa masela a perese, le a mafubelu, le a maputsoa; ea tla tseba ho rala litšoantšo, a sebetse le banna ba litsebi, bao ke nang le bona mona naheng ea Juda le Jerusalema, bao Davida, ntate, a seng a ba hlophile.
8“Hape u nthōmelle lifate tsa likedare, le tsa molutu, le tsa alemaka, tse tsoang Lebanone. Kea tseba hore bahlanka ba hao ke litsebi tsa ho rèma lifate, moo Lebanone, 'me bahlanka ba ka ba tla sebetsa le ba hao, 9ba ntlhophele lifate tse ngata, hobane Tempele eo ke tla e haha e tla ba kholo ka mokhoa o makatsang. 10Ke tla u romela koro e etsang boima ba lithane tse likete tse peli, le harese e etsang boima ba lithane tse likete tse peli, le veine e etseng lilethara tse likete tse makholo a mane, le ole ea mohloaare e etsang lilethara tse likete tse makholo a mane, hore e be lijo tsa bahlanka ba hao ba tla rèma lifate.”
11Eaba Hirame, khosi ea Tire, o araba Solomone ka lengolo, o re: “Kahobane Morena a ratile sechaba sa hae, o u entse hore u be khosi ea sona.”
12Hirame a tsoela pele, a re: “Ho bokoe Morena Molimo oa Iseraele, ea entseng leholimo le lefatše, ea neileng Davida mora ea bohlale, ea nang le kelello le kutloisiso, ea tla hahela Morena Tempele, a be a ikhahele ntlo ea bokhosi.
13“Joale ke u rōmela monna ea bohlale, ea nang le kutloisiso, ea bitsoang Hurame. 14Ke mora oa mosali e mong oa ba morabe oa Dane. Ntat'ae o ne a ahile Tire. Monna enoa o tseba ho etsa lintho tsa khauta, le tsa silefera, le tsa lethose, le tsa tšepe; le ho betla majoe, le ho etsa lintho tsa lehong, le tsa masela a perese, le a maputsoa, le a lene a lōhehileng, le a mafubelu. O tseba le ho etsa moralo oa ntho efe le efe, le ho etsa setšoantšo sa ntho efe le efe eo ho thoeng a e etse. Monna enoa o tla sebetsa le litsebi tsa hao, le litsebi tsa mong'a ka Davida, ntat'ao.
15“Ka baka lena, mong'a ka a ke a rōmele koro, le harese, le veine, le ole, e leng tseo a buileng ka tsona, ho rōna bahlanka ba hae. 16Rōna re tla rèma lifate tsohle tseo u li hlokang, mona Lebanone, re li tlamahanye, re li akhele leoatleng, li sike le lebōpo li phaphametse, ho ea fihla Jopo. Joale uena u tla li nka, u li ise Jerusalema.”
Mosebetsi oa ho haha Tempele oa qaleha
17Solomone a bala bajaki bohle ba neng ba le naheng ea Iseraele; a ba bala joalokaha Davida, ntat'ae, a ne a ile a ba bala. Ha fumanoa ba le likete tse lekholo le mashome a mahlano a metso e meraro, le makholo a tšeletseng. 18Ba likete tse mashome a supileng a ba abela ho jara thōtō; ba likete tse mashome a robeli a ba abela ho thua majoe thabeng, 'me ba likete tse tharo le makholo a tšeletseng bona a ba abela ho hlokomela batho ba sebetsang.
