Josiea o etsa mokete oa Paseka
1Josiea a etsetsa Morena mokete oa Paseka, Jerusalema. Ka letsatsi la leshome le metso e mene la khoeli ea pele, ba hlaba konyana ea Paseka. 2A busetsa baprista litulong tsa bona, a ba khothaletsa tšebeletso ea Tempele ea Morena. 3A re ho Balevi ba neng ba ruta Iseraele eohle, ba neng ba halalelelitsoe Morena: “Beang areka e halalelang ka Tempeleng eo Solomone, mora oa Davida, khosi ea Iseraele, a neng a e hahe; le se ke la hlola le sa e jara ka mahetla a lōna. Joale sebeletsang Morena Molimo oa lona, le sechaba sa hae sa Iseraele. 4Le itlhophe ho ea ka malapa a bo-ntat'a lōna, le ho ea ka lihlopha tsa lōna, kamoo Davida, khosi ea Iseraele, le Solomone, mora oa hae, ba ngotseng kateng.
5“Le eme Sehalalelong, ho ea ka lihlopha tsa malapa a bana babo lōna, ho ea ka bo-ntat'a bona, bao e leng batho feela sechabeng, 'me sehlopha ka seng se be le oa lelapa la Balevi. 6Le hlabe konyana ea Paseka, le ikhalaletse, le lokisetse le bana babo lōna, ho ea ka taelo ea Morena eo a neng a e etse ho Moshe.”
7Josiea a nea sechaba mehlape ea likonyana le ea lipotsanyane e etsang likete tse mashome a mararo, le lipohoana tse likete tse tharo tse tsoang mehlapeng ea khosi. E ne e le nyehelo ea Paseka, ea bohle ba neng ba le teng.
8Mahosana a hae a ntša nyehelo ea boithaopo, e le ea sechaba le ea baprista, le ea Balevi. Baokameli ba Tempele ea Molimo, e leng Hilekiea, le Sekariea, le Jehiele, ba nea baprista likhutšoane tsa Paseka tse likete tse peli le makholo a tšeletseng, le lipohoana tse makholo a mararo. 9Le bo-Konaniea, 'moho le bana babo, bo-Shemaea le Metanele, le lihlooho tsa Balevi, e leng Hashabiea, le Jeiele, le Josabada, ba nea Balevi likhutšoane tsa Paseka tse likete tse hlano, le lipohoana tse makholo a mahlano.
10Tšebeletso ea hlopheha, baprista ba ema litulong tsa bona, le Balevi ka lihlopha tsa bona, ho ea ka taelo ea khosi. 11Ba hlaba konyana ea Paseka, baprista ba fafatsa ka mali ao ba neng ba a neoa ke Balevi, ha Balevi bona ba ntse ba buha tse hlabiloeng. 12Ba bea linyehelo tsa secheso kathōko, e le hore ba tle ba li abe ho ea ka lihlopha tsa malapa a sechaba, le sona se tle se nyehelle Morena, joalokaha ho ngotsoe Bukeng ea Moshe. Ba etsa joalo le ka lipohoana. 13Ba besa likhutšoane tse hlabetsoeng Paseka ho ea ka taelo; linyehelo tse halalelang tsona ba li pheha ka lipitsa, le ka likètlèlè, le ka lipane, ba nt'o li abela sechaba ka potlako. 14Kamora' moo, ba itokisetsa lijo tsa Paseka, ba lokisetsa le baprista, hobane baprista, e leng litlōhōlō tsa Arone, ba ne ba ntse ba etsa linyehelo tsa secheso, le tsa mafura, ho fihlela e e-ba bosiu. Ka baka leo, Balevi ba itokisetsa lijo tsa Paseka, ba lokisetsa le baprista, e leng litlōhōlō tsa Arone.
15Libini, e leng litlōhōlō tsa Asafo, le ne li le litulong tsa tsona, ho ea ka taelo ea Davida, le ea Asafo, le ea Hemane, le ea Jedutune, senohe sa khosi. Balebeli ba neng ba lebela monyako o mong le o mong, ba ne ba sa tšoanela ho tloha moo ba neng ba lebetse teng, hobane bana babo bona, e leng Balevi, ba ne ba ba lokisetsa lijo.
16Kahoo tšebeletso eohle ea Morena ea ho etsa mokete oa Paseka, le ea ho etsetsa linyehelo tsa secheso aletareng ea Morena, ea lokisetsoa ka lona letsatsi leo, ho ea ka taelo ea khosi Josiea. 17Ka eona nako eo, bana ba Iseraele ba neng ba le teng, ba etsa mokete oa Paseka le mokete oa mahobe a sa lōmōsoang, ka matsatsi a supileng. 18Ho ne ho e-s'o ka ho e-ba le mokete oa Paseka o joalo, o kileng oa e-ba teng naheng ea Iseraele, ho tloha mehleng ea moporofeta Samuele. Le likhosi tsohle tsa Iseraele li ne li e-s'o ka li etsa mokete oa Paseka o joaloka oo Josiea a ileng a o etsa le baprista, le Balevi, le sechaba sohle sa Juda, le Baiseraele ba neng ba le teng, le baahi ba Jerusalema. 19Mokete ona oa Paseka oa na oa etsoa ka selemo sa leshome le metso e robeli sa puso ea Josiea.
Qetello ea puso ea Josiea
20Kamora' tsena tsohle, ha Josiea a se a lokisitse Tempele, Neko, khosi ea Egepeta, a futuhela Karakemishe, haufi le Euferatese; eaba Josiea oa mo khaoletsa. 21Empa Neko a rōmela maqosa ho Josiea, a re: “Taba ea ka le uena ke efe, uena khosi ea Juda? Kajeno ha ke futuhele uena, empa ke futuhela lelapa leo ke loantšanang le lona, hobane Molimo o ntaetse hore ke potlake. Tlohela ho 'na u kena-kenana le Molimo, ea ka lehlakoreng la ka, esere a u timetsa.”
22Leha ho le joalo, Josiea a hana ho khutla, a ikhakanya, e le hore a tle a mo loantše. A se ke a mamela mantsoe a Neko, a tsoang molomong oa Molimo, a ea ka khohlong ea Megido ho ea loantša Neko.
23Ba liqha ba fula khosi Josiea, 'me khosi ea re ho bahlanka ba eona: “Ntloseng, hobane ke tsoile kotsi e mpe!” 24Ka baka leo, bahlanka ba hae ba mo ntša ka kariking ea hae ea ntoa, ba mo kenya ka ho ea bobeli eo a neng a tlile le eona, ba mo isa Jerusalema, 'me a shoa. A epeloa mabitleng a bo-ntat'ae. Sechaba sohle sa Juda, le baahi ba Jerusalema, ba mo llela.
25Jeremia a qapela Josiea koli-ea-malla, 'me ho fihlela kajeno-ea-bokajeno, libini tsohle tsa banna le tsa basali li ntse li bua ka Josiea ha li bina koli-ea-malla eo, 'me hona ea e-ba molao naheng ea Iseraele. Tsena li ngotsoe bukeng ea Koli-ea-malla.
26Liketso tse ling tsa Josiea le tsa borapeli ba hae, ho ea kamoo ho ngotsoeng kateng Molaong oa Morena; 27ke ho re liketso tsa hae, ho tloha qalong ho isa qetellong, li ngotsoe Bukeng ea Likhosi tsa Iseraele le tsa Juda.
