1Eaba mosebetsi oohle, oo Solomone a neng a o etsetsa Tempele ea Morena, oa phethoa. Joale Solomone a kenya lintho tsohle tseo Davida, ntat'ae, a neng a li abetse Morena, ka matlung a pōlōkelo a Tempele. E ne e le silefera, le khauta, le lintho tsohle.
Areka ea selekane e isoa Tempeleng
2Joale Solomone a khōbōkanya baholo bohle ba Iseraele, le lihlooho tsohle tsa merabe, le mahosana a malapa a bana ba Iseraele. Bohle ba tla Jerusalema ho khosi Solomone, hore ba tl'o nyolla areka ea selekane sa Morena, e tsoe Motseng oa Davida, e leng Sione. 3Banna bohle ba Iseraele ba khōbōkanela ho khosi Solomone mohl'a mokete, ka khoeli ea bosupa.
4Baholo bohle ba Iseraele ba tla, 'me Balevi ba nka areka. 5Baprista le Balevi ba nyolla areka, le Tente ea Morena, le lintho tsohle tse halalelang, tse neng li le ka Tenteng. 6Joale bo-khosi Solomone le sechaba sohle sa Iseraele, se neng se khōbōkanetse ho eena, ba ema kapele ho areka, ba etsa mahlabelo ka likhutšoane, le ka lipohoana tse ngata, hoo li neng li ke ke tsa baloa.
7Baprista ba tlisa areka ea selekane sa Morena ka Tempeleng, ba e bea litulong tsa eona, ka Sehalalelong se halalelang ka ho fetisisa, tlas'a mapheo a likerubime. 8Likerubime tseo li ne li thathalalitse mapheo a tsona holim'a moo areka e beoang teng, a okametse areka le mefeng ea eona. 9Mefeng e ne e hlahisitse lintlha tsa eona, hoo lintlha tseo li neng li bonahala ha motho a le ka Sehalalelong, a tobane le Sehalalelo se halalelang ka ho fetisisa, empa li ne li sa bonahale ha motho a le kantle ho Sehalalelo, 'me li sa ntsane li le moo le kajeno-ea-bokajeno. 10Ho ne ho se letho kahar'a areka, haese matlapa a mabeli, ao Moshe a neng a a kenye kateng ha ba le Horebe, mohl'a Morena a etsang selekane le bana ba Iseraele, ha ba ne ba e-tsoa naheng ea Egepeta.
11Baprista ba tsoa ka Sehalalelong. Bohle ba neng ba e-tsoa kamoo ba ne ba itlhoekisitse ho sa natsoe lihlopha tsa bona. 12Balevi bohle, bao e neng e le libini, e leng bo-Asafo, le Hemane, le Jedutune, le bara ba bona, le bana babo bona, ba ne ba eme ka bochabela ho aletare, ba apere liaparo tsa lene tse tšoeu, ba letsa matlheretlhere, le likatara, le liharepa. Ba ne ba tlatsitsoe ke baprista ba lekholo le mashome a mabeli, ba neng ba letsa literompeta. 13Baletsi ba literompeta, le libini, ba amohela pina joalokaha eka ho bina motho a le mong, ba rorisa Morena. Ba ne ba tlatsitsoe ke literompeta, le matlheretlhere, le liletsa tse ling, ba rorisa Morena, ba re:
“Bokang Morena
hobane o molemo,
mohau oa hae
ke oa kamehla eohle.”
Eaba leru le tlala ka Tempeleng ea Morena. 14Baprista ba sitoa ho ntšetsa mosebetsi oa bona pele ka baka la leru, hobane tlōtla ea Morena e ne e tletse ka Tempeleng ea Molimo.
