2 BAKORINTHE 3

₁Na re boela re qala ho ikemela? Kapa joaloka ba bang, re hloka mangolo a re emelang ho lōna, kapa a tsoang ho lōna? ₂Ke lōna lengolo la rōna, le ngotsoeng ka lipelong tsa rōna, le tsejoang, le baloang ke batho bohle. ₃Ho pepenene hore lōna le lengolo la Kreste, le beiloeng matsohong a rōna, le ngotsoeng ka Moea oa Molimo ea phelang, e seng ka enke; le ngotsoeng matlapeng a lipelo tsa nama, e seng matlapeng a lejoe.

₄Re na le tšepo e joalo ho Molimo ka Kreste. ₅Hase hore rōna ka borōna re na le matla a lekaneng hore re hopole letho joaloka hoja le tsoa ho rōna, empa matla a rōna a tsoa ho Molimo. ₆Ke eena ea re fileng matla a ho ba basebeletsi ba selekane se secha, seo e leng sa Moea, e seng sa Molao o ngotsoeng feela. Molao o ngotsoeng oa bolaea, athe Moea oa phelisa.

₇Molao oo tšebeletso ea oona e isang lefung, o ngotsoeng ka litlhaku majoeng, o ile oa fanoa ka tlōtla, hoo bana ba Iseraele ba neng ba sitoa ho talima sefahleho sa Moshe, ka baka la tlōtla e felang ea sefahleho sa hae. ₈Ha ho le joalo, na tšebeletso ea Moea e ke ke ea e-ba le tlōtla e fetang eo haholo? ₉Haeba tšebeletso e isang kahlōlong e bile le tlōtla, tšebeletso e isang ho lokeng e tla ba le tlōtla e kholo haholo hakaakang! ₁₀Ebile tlōtla e neng e khanya hakaalo ka nako e fetileng ha e sa khanya, ka baka la tlōtla e kholohali ea joale. ₁₁Ha se neng se fela se tlile ka tlōtla, se sa feleng se tla ba le tlōtla e kholo hakaakang!

₁₂Kaha re na le tšepo e joalo, re bua ka sebete, ₁₃e seng joaloka Moshe ea neng a ikhurumetsa sefahleho, hore bana ba Iseraele ba se ke ba bona tlōtla e felang ea sefahleho sa hae ha e nyamela. ₁₄Empa likelello tsa bona li ne li thotofetse. Ho fihlela le kajeno-ea-bokajeno ha ba bala Testamente ea Khale, lesira lane le ntse le ba siretse, ha lea tlosoa; le felisoa ke Kreste feela. ₁₅Ho fihlela le kajeno-ea-bokajeno, kamehla ha ho baloa buka ea Moshe, lesira le sa koahetse lipelo tsa bona; ₁₆athe kamehla ha motho a sokolohela ho Morena, lesira leo lea tlosoa. ₁₇Morena ke Moea, 'me moo Moea oa Morena o leng teng tokoloho e teng. ₁₈Rōna bohle, joaloka seiponeng, re bonahatsa tlōtla ea Morena ka lifahleho tse khurumolotsoeng, 'me eona tlōtla eo, e tsoang ho Morena e leng Moea, e re fetola hore re tšoane le eena; re ntse re ateloa ke tlōtla ho-ea-ho-ile.