2 BAKORINTHE 6

₁Joale rōna, re le ba sebetsang 'moho le Molimo, rea le rapela hore mohau oa Molimo le se ke la o amohella lefeela. ₂Molimo o re:

₃Hore mosebetsi oa rōna o se ke oa nyelisoa, ha re ke be re khopise motho ka letho. ₄Empa linthong tsohle re itšupa hore re basebeletsi ba Molimo, ka ho ba le tiisetso e kholo matšoenyehong, litsietsing, litlallong, ₅lichapong, lichankaneng, meferefereng, mesebetsing e boima, ho hloka boroko, tlaleng, ₆ka bohloeki, ka tsebo, ka mamello, ka mosa, ka Moea o Halalelang, ka lerato le se nang boikaketsi, ₇ka lipolelo tsa 'nete, ka matla a Molimo, ka lihlomo tsa ho loka ka letsohong le letona le ka ho le letšehali, ₈leha re tlotlisoa kapa re tlontlolloa, leha re buuoa hampe kapa re buuoa hantle. Re nkoa re le bathetsi, empa re bua 'nete; ₉re le ba sa tsejoeng, empa re tsejoa hantle; re le ba shoang, empa bonang rea phela; re le ba khalemeloang ka ho shapuoa, empa re sa bolaoe; ₁₀re le ba soabileng, empa re thabile; re le ba futsanehileng, empa re ruisa ba bangata; re le ba se nang letho, empa re ruile tsohle.

₁₁Bakorinthe, re buile le lōna phatlalatsa, re le buletse lipelo tsa rōna. ₁₂Rōna re le rata ka pelo eohle, athe lipelong tsa lōna lerato ha le eo. ₁₃Ke re: Re buleleng lipelo tsa lōna, khalapa li buseletsane. Ke bua joaloka ntat'a ha a bua le bana ba hae.

₁₄Le se ke la khema le ba sa lumeleng. Ho loka le ho se loke li ka khotsana joang? Leseli le ka kopana joang le lefifi? ₁₅Na Kreste a ka lumellana le Beleare? Kapa ke eng eo molumeli a ka e kopanelang le ea sa lumeleng? ₁₆Ana tempele ea Molimo e ka lumellana ka eng le melimo ea bohata? Rōna re tempele ea Molimo ea phelang, joalokaha Molimo a itse: