Puso ea Akase, khosi ea Juda
1Ka selemo sa leshome le metso e supileng sa puso ea Peka, mora oa Remalea, Akase, mora oa Jotame, khosi ea Juda, a qala ho busa. 2Akase o ne a e-na le lilemo tse mashome a mabeli ha a qala ho busa. A busa ka lilemo tse leshome le metso e tšeletseng, a le Jerusalema. Ha aa ka a khahlisa Morena Molimo oa hae, joalokaha Davida, ntat'ae-moholo eena a ile a khahlisa Morena. 3O ile a tsamaea mehlaleng ea likhosi tsa Iseraele. Ka ho etsa nyehelo ea secheso ka mora oa hae, a etsa manyala a kang a neng a etsoa ke lichaba tseo Morena a neng a li leleke kapele ho bana ba Iseraele. 4Hape a etsetsa mahlabelo libakeng tseo ho rapelloang melimo ea bohata ho tsona, le tse holim'a lithaba, le tse katlas'a lifate tsohle tse talana, 'me a chesetsa mokubetso hona teng.
5Joale Resine, khosi ea Arame, le Peka, mora oa Remaleea, khosi ea Iseraele, ba futuhela Jerusalema. Ba etsetsa Akase thibella, empa ba se ke ba mo hlōla. 6Ka eona nako eo Resine, khosi ea Arame, a boela a hapa motse oa Elate, 'me a leleka Bajuda moo Elate. Baarame ba fihla Elate, 'me le kajeno-ea-bokajeno ba sa ahile moo.
7Akase a rōmela maqosa ho Tigelate-Pilesere, khosi ea Asiria, a re: “'Na ke mohlanka oa hao, le mora oa hao. Tloo, u tl'o 'namolela matsohong a likhosi tsa Arame le Iseraele, tse mphutuhetseng.” 8Akase a hahara silefera le khauta ka Tempeleng ea Morena, le ka matlōleng a ntlo ea khosi, 'me a li rōmela ho khosi ea Asiria e le mpho. 9Khosi ea Siria ea ananela kōpo ea Akase; ea futuhela Damaseka, ea e hapa, ea thōpa le batho ba teng, ea ba isa Kire, 'me ea bolaea Resine.
10Khosi Akase a ea Damaseka ho ea kopana le Tigelate-Pilesere, khosi ea Asiria. Ha a le moo, a bona aletare. Khosi ea rōmella setšoantšo sa aletare eo, le liqaqiso tsa eona ho moprista Uriea. 11Moprista Uriea a haha aletare eo ho ea ka liqaqiso tsohle tseo khosi Akase a ileng a li rōmela a le Damaseka. Eaba o haha aletare eo khosi Akase a e-s'o khutle Damaseka. 12Ha khosi e fihla ho tsoa Damaseka, ea bona aletare, ea atamela ho eona, ea hloella mehatong ea eona. 13Khosi ea chesetsa nyehelo ea eona ea secheso, le nyehelo ea lijo holim'a aletare eo, ea tšèla le nyehelo ea eona ea lino holim'a eona; ea fōka holim'a aletare ka mali a tse hlabetsoeng ho etsa nyehelo ea teboho. 14Khosi Akase a tlosa aletare ea Morena, e entsoeng ka lethose, e neng e le kapele ho Tempele, pakeng tsa aletare e ncha le Tempele ea Morena, a e bea ka leboea ho aletare e ncha.
15Joale khosi Akase a laela moprista Uriea, a re: “Holim'a aletare e kholo u chesetse nyehelo ea secheso ea hoseng, le nyehelo ea khosi ea lijo, 'moho le nyehelo ea secheso ea sechaba sohle sa naha eo, le nyehelo ea sona ea lijo, le nyehelo ea sona ea lino. Holim'a eona u fōke ka mali 'ohle a tse hlabetsoeng nyehelo ea secheso, le ka mali 'ohle a tse hlabetsoeng ho etsa sehlabelo. Aletare ea lethose eona, ke eo ke tla botsa Morena ke le ho eona.” 16Moprista Uriea a etsa tsohle, ho ea ka taelo ea khosi Akase.
17Khosi Akase a qhaqholla likariki tsa lethose tse neng li le ka Tempeleng, a tlosa likotlolo tse holim'a tsona. A tlosa tanka eo baprista ba tollang ka ho eona e holim'a mekokotlo ea lipholo tsa lethose, a e bea lebaleng la majoe. 18Kahobane khosi Akase a ne a rata ho khahlisa khosi ea Asiria, a felisa tselana e ruletsoeng, eo a neng a tsamaea ka eona ka Sabatha, a koala le monyako o kantle, oo a neng a kena ka oona ka Tempeleng ea Morena.
19Liketso tse ling tsa Akase li ngotsoe Bukeng ea Liketsahalo tsa Likhosi tsa Juda. 20Akase a shoa, 'me a epeloa le bo-ntat'ae, Motseng oa Davida. Mora oa hae, Hesekiea, a mo hlahlama.
