Davida le Batesheba
1Ha selemo se thoasa, e leng nako eo likhosi li eeng li futuhe ka eona, Davida a rōma Joabe, a e-na le balaoli ba hae, le bahlabani bohle ba Baiseraele. Ba timetsa Baamone, ba thibella Raba. Empa Davida eena o ne a setse Jerusalema.
2Ka tsatsi le leng, motšeare oa mantsiboea, Davida a tsoha liphateng tsa hae. Ha a ntse a otlolla maoto holim'a marulelo a ntlo ea bokhosi, a bona mosali a ntse a tola. Mosali eo o ne a le motle haholo. 3Davida a rōmela leqōsa ho ea botsa hore na mosali eo ke mang. Leqōsa leo la tla le re: “Ke Batesheba, morali oa Eliame, mosali oa Uriea oa Mohete.” 4Davida a rōmela maqōsa ho ea mo lata. Mosali eo a tla, 'me Davida a robala le eena. Mosali enoa o ne a sa tsoa hlatsoa lehatlelo la hae. Kamora' moo, mosali a khutlela ha hae. 5Mosali eo a ithoala; eaba o rōmela molaetsa ho Davida, o re: “Ke ithoetse.”
6Davida a rōmela molaetsa ho Joabe, a re: “E-re Uriea oa Mohete a ke a tle koano.” Joabe a rōmela Uriea ho Davida. 7Ha Uriea a fihla ho eena, Davida a 'motsa hore na Joabe o phela joang le mabōtho, le hore na ntoa e tsamaea joang. 8Davida a re ho Uriea: “E-ea lapeng, u e'o phomola.” Uriea a tsoa ka tlung ea bokhosi, 'me khosi ea mo rōmela lijo tse ngata. 9Empa Uriea a ithoballa monyakong oa ntlo ea bokhosi, a e-na le bahlanka bohle ba khosi, a se ke a ea ha hae.
10Davida a bolelloa, ha thoe: “Uriea ha aa ka a ea lapeng.”
Eaba Davida o re ho Uriea: “Ha ke re u tsoa leetong? Joale ke hobane'ng u sa kang ua ea lapeng ha hao?”
11Uriea a re ho Davida: “Areka e lutse ka tenteng; Baiseraele, le ba morabe oa Juda, le bona ba lutse ka litenteng; le mong'a ka Joabe le bahlabani ba mong'a ka ba hlomme har'a naha; joale 'na nka ea lapeng ha ka joang, ho ea ja, le ho ea noa, le ho ea robala le mosali oa ka? Ke hlapanya ka uena, ntho e tjena nke ke ka e etsa!”
12Davida a re ho Uriea: “Le kajeno emisa mona, 'me hosasane ke tla u lokolla, u tsamaee.” Ka baka leo, Uriea a hlola Jerusalema letsatsing leo, le le hlahlamang. 13Davida a mo mema, a fihla a ja, a noa, 'me Davida a mo tahisa. Ka phirimana eona eo, Uriea a ithoballa le bahlanka ba mong'a hae, empa ha e le tlung ha hae, teng a se ke a ea.
14Hoseng Davida a ngolla Joabe, 'me lengolo leo a le neeletsa Uriea. 15Lengolong moo Davida o ne a ngotse, a itse: “Bea Uriea kamoo ntoa e leng mahlo-mafubelu kateng, ebe lōna lea checha, a tle a hlajoe, a shoe.”
16Ha Joabe a ntse a patetse motse, a isa Uriea thekōng eo a tsebang hore ho eona ho eme bahale. 17Bahlabani ba motse moo ba tsoa, ba loantša Joabe. Bahlabani ba bang ba Davida ba bolaoa; le Uriea oa Mohete le eena a bolaoa.
18Joale Joabe a rōmela molaetsa, a tsebisa Davida tsohle tse amanang le ntoa. 19A laela leqōsa, a re: “Ha u qetile ho phetela khosi tsohle tse amanang le ntoa, 20eba khosi ea halefa, e re ho uena: ‘Ke ka baka la'ng le ileng la loanela haufi le motse hakaalo? Na le ne le sa tsebe hore ba tla le fula ka metsu, ba le holim'a lerako? 21Ke mang ea neng a bolaee Abimeleke, mora oa Jerubeshete? Na hase mosali ea neng a le holim'a lerako, ea neng a 'mate ka tšiloana, 'me Abimeleke a shoella Tebese? Ke hobane'ng le ileng la atamela pel'a lerako hakaalo?’ Joale uena u tle u re ho eena: ‘Le mohlanka oa hao, Uriea oa Mohete, o bolailoe.’ ”
22Eaba leqōsa lea tsamaea, le fihla ho Davida, le mo phetela tsohle tseo Joabe a neng a le rōmile tsona. 23Leqōsa lena la re ho Davida: “Banna bano ba ile ba re fekisa. Ba ile ba tsoa motseng, ba ea re loantšetsa naheng, empa ra ba chechisa ho ea fihla khorong ea motse. 24Ba liqha, ba le holim'a lerako, ba fula bahlanka ba hao, 'me ba bang ba bahlanka ba khosi ba ile ba bolaoa; le mohlanka oa hao, Uriea oa Mohete, o bolailoe.”
25Davida a re ho leqōsa: “U tle u re ho Joabe: ‘Ntho ena e se ke ea ba ea u tšoenya, hobane sabole e 'ne e etse tse tjena. Tiisang matla, le futuhele motse ono, le o ripitle.’ Uena u mo khothatse joalo.”
26Ha mosali oa Uriea a utloa hore monna oa hae a bolailoe, a mo aparela bofifi. 27Ha nako ea bofifi ba hae e se e fetile, Davida a rōmela maqōsa ho lata Batesheba, 'me a mo isa tlung ea hae, ea e-ba mosali oa hae. A tsoalla Davida mora. Empa ntho ena eo Davida a neng a e entse ea se ke ea khahla Morena.
