Joabe o khalemela Davida
1Joabe a bolelloa, ha thoe: “Hela, khosi e ntse e lla, e hlomohetse Abosalome.” 2Eaba ho hlōla ha letsatsi leo ho fetoha bofifi ho bahlabani bohle, hobane hona letsatsing leo ba ile ba utloa ho thoe: “Khosi e hlomohetse mora oa eona.” 3Ka letsatsi leo bahlabani ba kena motseng ka lenyele, joaloka bahlabani ba hlabiloeng ke lihlong ha ba balehile ntoeng. 4Khosi ea ikhurumetsa sefahleho, ea bokolla haholo, ea re: “Jo! ngoan'aka Abosalome! Jo! ngoan'aka, ngoan'aka Abosalome!”
5Joale Joabe a ea lapeng ho khosi, a re: “Kajeno u tlontlolotse bahlanka bohle ba hao, ba u pholositseng, ba pholosa le bara ba hao, le barali ba hao, le basali ba hao, le basali ba hao ba mafielo. 6U rata ba u hloileng, empa u hloile ba u ratang. Kajeno u iponahalitse hore ha u re letho ka mahosana kapa bahlanka. Kajeno ke elelloa hore haeba Abosalome a ne a sa shoa, eba rōna bohle re shoele, u ka be u thabile. 7Ka baka leo, ema, u tsamaee, u e'o bua hantle le bahlanka ba hao, hobane ke hlapanya ka Morena hore haeba u sa ee, ha ho motho ea tla u lebela bosiung bona. Hona ho tla ba hobe ho uena ho feta bomalimabe bohle bo kileng ba u oela holimo ho tloha bohlankaneng ba hao, ho fihlela kajeno.”
8Eaba khosi ea ema, e ea lula khorong ea motse. Bahlabani bohle ba tsebisoa, ha thoe: “Khosi ke eo e lutse khorong ea motse.” Eaba bahlabani bao ba phuthehela kapele ho khosi. E mong le e mong oa Baiseraele o ne a ile a balehela lapeng la hae.
Davida o khutlela Jerusalema
9Sechaba sohle sa Iseraele, ho ea ka merabe ea sona, se ne se ngangisana ka bosona, se re: “Khosi e re namoletse matsohong a lira tsa rōna; e re pholositse le matsohong a Bafilesita, empa joale e siile naha, e balehile Abosalome. 10Abosalome eo re mo tlotselitseng ho ba khosi ea rōna, o bolailoe ntoeng. Joale ke ka baka la'ng, ha le sa re khosi e khutle?”
11Eaba khosi Davida o rōmela molaetsa ho moprista Sadoke, le ho moprista Abiatare, o re: “Bolellang baholo ba Juda, le re: ‘Ke ka baka la'ng ha e le lōna ba ho qetela, ba reng khosi e khutlele tlung ea eona? Molaetsa oa Baiseraele bohle, o reng khosi e khutlele tlung ea eona, o se o fihlile. 12Lōna le bana beso, le mali eso; joale ke hobane'ng ha le le ba ho qetela, ba reng khosi e khutle?’ 13Ho Amasa le tle le re: ‘Na uena ha u mali eso? Morena a nketse tjena le tjena, le ho feta, haeba u ke ke ua ba moloali oa mabōtho sebakeng sa Joabe, kamehla ha ke ntse ke phela.’ ”
14Khosi ea hapa lipelo tsa banna bohle ba morabe oa Juda, ba e-ba ntsoeleng, hoo ba bileng ba rōmela molaetsa ho eona, ba re: “Khutla, uena le bahlanka bohle ba hao.”
Davida le Shimei
15Eaba khosi ea khutla, e fihla Jorodane. Ba morabe oa Juda ba ea Gilegale, ho ea khahlanyetsa khosi le ho e tšelisa Jorodane. 16Shimei, mora oa Gera oa Mobenjamine, ea tsoang Bahurime, a theoha le banna ba morabe oa Juda ka potlako ho ea khahlanyetsa khosi Davida. 17Shimei o ne a e-na le banna ba sekete ba morabe oa Benjamine, le Siba, mohlanka oa lelapa la Saule, le bara ba hae ba leshome le metso e mehlano, le bahlanka ba hae ba mashome a mabeli. Batho bana ba potlakela ho ea fihla Jorodane pele ho khosi. 18Seketsoana sa tšelela mose ho Jorodane, ho ea lata ba lelapa la khosi, le ho etsa seo khosi e lakatsang ha se etsoa.
Hoba Shimei, mora oa Gera, a tšele Jorodane, a obamela khosi, 19a re ho eona: “Mong'a ka, u se ke ua ntalima ke le motho ea khopo, 'me u se ke ua hopola bobe boo mohlanka oa hao a neng a bo etse ka letsatsi leo mong'a ka, khosi ea ka, a neng a tloha Jerusalema ka lona. Khosi e se ke ea ntjara ka pelo 20Mohlanka oa hao oa tseba hore o sitiloe; ka baka leo, ke tlile kajeno, ke le oa pele har'a bohle ba morabe oa Josefa, hore ke theohe, ke tl'o khahlanyetsa mong'a ka, khosi ea ka.”
21Joale Abishai, mora oa Seruea, a araba, a re: “Eka khona Shimei a bolaeloe taba ena, hobane o ne a hlapaole motlotsuoa oa Morena!”
22Eaba Davida o re: “Ekaba taba ea ka le lōna, bara ba Seruea, ke efe, ha e le moo kajeno le se le le lira tsa ka? Ka letsatsi lena ha ho motho ea tla bolaoa naheng ena ea Iseraele, hobane kajeno kea tseba hore ke 'na khosi ea Iseraele.” 23Khosi ea re ho Shimei: “U ke ke ua bolaoa!” Eaba khosi ea mo hlapanyetsa.
Davida o hauhela Mefiboshete
24Mefiboshete, mora oa Saule, a theoha ho ea khahlanyetsa khosi. Ho tloha mohla khosi e tsamaeang, ho fihlela e ba e khutla ka khotso, Mefiboshete, mora oa Saule, o ne a e-s'o ka a kutletsa maoto a hae, kapa a beola litelu tsa hae, kapa a hlatsoa liaparo tsa hae. 25Eare ha a fihla ho tla khahlanyetsa khosi, a e-tsoa Jerusalema, khosi ea re ho eena: “Mefiboshete, ke ka baka la'ng u sa kang ua tsamaea le 'na?”
26Mefiboshete a re: “Oho, mong'a ka, khosi ea ka, mohlanka oa ka o ile a nthetsa. 'Na, mohlanka oa hao, ke ne ke itse ke tla iqhanehela tonki ea ka, ke e palame, ke tsamaee le khosi, hobane ke sehlotsa; 27eaba mohlanka eo o ntšenya lebitso ho mong'a ka, khosi ea ka. Empa mong'a ka, khosi ea ka, u joaloka lengeloi la Molimo; ka baka leo, etsa seo u bonang se lokela. 28Bohle ba lelapa la ntate ba ne ba lokeloa ke ho bolaoa ke mong'a ka, khosi ea ka, empa u ile ua nkenya har'a bao u jang le bona. Ka baka leo, ke sa na le tokelo efe, ea hore ke 'ne ke ipiletse ho khosi?”
29Eaba khosi e re ho eena: “U sa buela'ng litaba tsa hao? Ke qetile ka hore uena le Siba le tla arolelana naha.”
30Mefiboshete a re ho khosi: “Siba a hle a e nke eohle, hobane mong'a ka, khosi ea ka, o khutletse hae ka khotso.”
Davida o leboha Barasilai
31Barasilai oa Mogileade a theoha Rogeleme, a tsamaea le khosi ho ea e tšelisa Jorodane. 32Barasilai o ne a se a tsofetse haholo, a e-na le lilemo tse mashome a robeli. Ha khosi e ntse e le Mahanaime, Barasilai o ne a e fepa, hobane o ne a ruile haholo. 33Khosi ea re ho Barasilai: “Tšela le 'na, re ee Jerusalema, 'me ke tla u fepa.”
34Empa Barasilai a re ho khosi: “Ebe ke sa tla phela nako e kae, hoo nka eang le khosi Jerusalema? 35Kajeno ke na le lilemo tse mashome a robeli; na nka hlola ke sa tseba ho khetholla botle ho bobe? Kapa nka hlola ke sa utloa monate oa seo ke se jang, kapa seo ke se noang? Na nka hlola ke sa utloa meloli ea banna ba binang, le ea basali ba binang? Ebe joale nka 'na ka imetsa mong'a ka, khosi ea ka, ka baka lefe? 36Mohlanka oa hao o tla tšela Jorodane le khosi, a e felehetse ho se hokae. Joale khosi e ka 'nea moputso oo ka baka lefe? 37Kea u rapela: Ak'u lumelle mohlanka oa hao hore a khutle, ke tle ke e'o shoela motseng oa heso, pel'a lebitla la ntate le la 'mè. Mohlanka oa hao Kimehame ke enoa; ha e be eena ea tšelelang mose le mong'a ka, khosi ea ka. Mo etsetse seo u bonang se le molemo.”
38Khosi ea re: “Ke tla tšelela mose oane le Kimehame, 'me ke tla mo etsetsa seo uena u bonang se le molemo. Le uena ke tla u etsetsa tsohle tseo u ka li kōpang ho 'na.”
39Sechaba sohle sa tšela Jorodane, le khosi ea tšela. Eaba khosi e aka Barasilai, ea mo hlohonolofatsa, 'me Barasilai a khutlela ha habo.
Baiseraele le Bajuda baa qabana
40Khosi ea tšelela Gilegale, le Kimehame a tšela le eona. Sechaba sohle sa morabe oa Juda sa tšelisa khosi nōka; le karolo e 'ngoe ea sechaba sa Iseraele ea etsa joalo.
41Joale banna bohle ba Baiseraele ba tla ho khosi, ba re ho eona: “Ke ka baka la'ng ha bana babo rōna, e leng banna ba morabe oa Juda, ba ile ba nka khosi ka lenyele, ba e tšelisa Jorodane, hammoho le ba lelapa la eona, le banna bohle ba Davida?”
42Banna bohle ba morabe oa Juda ba araba banna ba Iseraele, ba re: “Ke kahobane khosi e tsoalana le rōna. Joale taba ee e le halefisa ka baka lefe? Na khosi e kile ea re fepa? Kapa ebe re filoe limpho?”
43Banna ba Iseraele ba araba banna ba morabe oa Juda, ba re: “Kabelo ea rōna ho khosi e feta ea lōna haleshome; le ho Davida re na le tokelo e fetang ea lōna. Joale le re nyelisitse ka baka lefe? Na hase rōna ba qalileng ho bua pele ka taba ea hore khosi e khutlisoe?”
Lipolelo tsa banna ba morabe oa Juda li ne li hlaba ho feta tsa banna ba Iseraele.
