2 BATHESALONIKA 3

₁Bana beso, re qetella ka ho re le re rapelle, e le hore lentsoe la Morena le 'ne le anafale, le tlotlisoe, joalokaha le se le tlotlisitsoe ho lōna. ₂Re rapelleng hore re tle re namoleloe bathong ba sa lokang, ba khopo, hobane hase bohle ba nang le tumelo. ₃Empa Morena oa tšepahala, o tla le matlafatsa, a le sireletse ho E Mobe. ₄Morena o re fa tšepo ea hore le ntse le etsa, 'me le tla 'ne le etse seo re le laelang sona. ₅Morena a ke a sokollele lipelo tsa lōna leratong la Molimo le tiisetsong e kang ea Kreste.

₆Bana beso, ka lebitso la Morena oa rōna Jesu Kreste re le laela hore le khaohane le bana babo lōna bohle ba phelang e le likhōba, e seng ka meetlo eo re le neelelitseng eona. ₇Lōna le tseba kamoo le tlamehang ho re etsisa kateng. Ha rea ka ra ba likhōba ha re ne re e-na le lōna, ₈leha e le ho ja lijo tsa motho re sa lefe letho. Empa re ile ra sebetsa ka thata, ra fufuleloa motšeare le bosiu, e le hore re se ke ra khōka le ea mong oa lōna. ₉Hase hore re ne re se na tokelo ea ho etsa joalo, empa e ne e le hore re le etsetse mohlala, le tle le re etsise. ₁₀Ha re ne re sa na le lōna, re 'nile ra le laela hore haeba e mong a sa rate ho sebetsa, le ho ja a se ke a ja.

₁₁Joale re utloa hore ba bang ba teng har'a lōna ba phelang e le likhōba, ba sa sebetseng letho, ba itšunyakang hohle tabeng tsa ba bang. ₁₂Ka Morena oa rōna Jesu Kreste, ba joalo rea ba laela, 'me re ba khothaletsa hore ba sebetse ka khotso, ba sebeletse tseo ba ka li jang. ₁₃Ha e le lōna, bana beso, le se khathale ho etsa hantle.

₁₄Haeba e mong a sa mamele seo re se bolelang lengolong lena, mo hlokomeleng, 'me le se ikamahanye le eena, a tle a hlajoe ke lihlong. ₁₅Feela le se mo nke e le sera, empa le mo khalemele e le ngoan'abo lōna.

₁₆Morena oa khotso ka sebele a ke a le fe khotso kamehla le ka mekhoa eohle. Morena a ke a be le lōna bohle.

₁₇Tumeliso ena e ngotsoe ka letsoho la ka, 'na Paulosi. Mangolong 'ohle a ka ke ngola tjena; ona ke mongolo oa ka.

₁₈Mohau oa Morena oa rōna Jesu Kreste o ke o be le lōna bohle.