Daniele o bona lengeloi
1Ka selemo sa boraro sa puso ea Siruse, khosi ea Peresiea, Daniele, ea neng a bitsoa Beleteshasare, a fihleloa ke molaetsa. Molaetsa ona e ne e le 'nete, empa o le thata hore motho a o utloisise. Daniele o ile a senoleloa molaetsa ona ka pono, 'me a o utloisisa.
2Ka 'ona matsatsi ao, 'na Daniele ka ba bofifing ka libeke tse tharo tse tletseng. 3Ka itima lijo tse monate, ka ila nama, ka se ke ka noa veine, ka se ke ka itlotsa ka ole ka libeke tseo tse tharo.
4Ka letsatsi la mashome a mabeli a metso e mene la khoeli ea pele, ke ne ke eme lebōpong la nōka e kholo ea Tigerese. 5Eaba ke lelatsa mahlo a ka, kea sheba, 'me ka bona monna e mong ea apereng seaparo se entsoeng ka lene, thekeng a itlamme ka senyepa sa khauta e tsoang Ufase. 6'Mele oa hae o ne o benya joaloka lehakoe le phatsimang, sefahleho sa hae se ka lehalima, mahlo a hae a ka mabone a tukang, matsoho a hae le maoto a hae a benya joaloka lethose le hlakolisitsoeng, lentsoe la hae le utloahala joaloka molumo oa letšoele la batho.
7Ke 'na feela ea ileng a bona pono ena. Banna ba neng ba eme le 'na bona ha baa ka ba e bona, empa ba ile ba tšoha haholo hoo ba ileng ba baleha, ba ea ipata. 8Ka baka leo, ka sala ke le inotši, ke bohile pono e kholo, 'me ka felloa ke matla, tšobotsi ea ka ea fetoha, ka tšerema mangoèlè.
9Ka utloa lentsoe la hae ha a bua, 'me ha ke le utloa ka oela fatše ka sefahleho, ka akheha.
10Eaba ke bona letsoho le nkama, le nkhumamisa ka mangoèlè le ka matsoho a ka.
11Motho eo a re ho 'na: “Uena Daniele ea ratoang haholo, utloisisa seo ke u bolellang sona. Ema ka maoto, hobane ke rōnngoe ho uena.”
Hoba a rialo ka ema ke ntse ke thōthōmela.
12Eaba o re ho 'na: “Se tšabe, Daniele, hobane ho tloha ka letsatsi la pele leo ka lona u neng u qale ho batla kutloisiso le ho ikokobeletsa Molimo oa hao, thapelo ea hao e ne e utloahale, 'me joale ke tlile ho arabela thapelo eo ea hao. 13Empa lengeloi le sireletsang 'muso oa Peresiea le ile la nthibela ka matsatsi a mashome a mabeli a motso o mong. Eaba Mikaele, le leng la mangeloi a ka sehloohong, oa nthusetsa, hobane ke ne ke setse moo ke le mong le khosi ea Peresiea. 14Joale ke tlile ho u tsebisa se tla hlahela sechaba sa heno ka nako e tlang, hobane pono ena e supa tse tla etsahala ka nako e tlang.”
15Hoba a bue mantsoe ana ho 'na ka talima fatše, leleme la ka la rareha. 16Eaba letsoho le kang la motho le ama molomo oa ka, leleme la ka la raroloha, ka bua le ea emeng kapele ho 'na, ka re: “Oho, monghali oa ka, pono ena e nkutloisitse bohlōkō, ke khathetse matla. 17'Na mohlanka oa hao, nka bua joang le uena? Ke feletsoe ke matla, ke sitoa le ho phefumoloha.”
18Letsoho leo le kang la motho la nkama hape, 'me la 'matlafatsa. 19Motho eo a re ho 'na: “Se tšabe, uena ea ratoang haholo. Khotso e be le uena! Matlafala, e, matlafala!”
Hoba a bue le 'na ka matlafala, ka re: “Bua, mong'a ka, hobane joale u 'matlafalitse.”
20Eaba motho eo o re: “Na u tseba lebaka le ntlisitseng ho uena moo? Joale ke tla ea loantša lengeloi le sireletsang Peresiea. Hoba ke tsamaee, khosana ea Bagerike e tla tla. 21Ke tla u bontša se ngotsoeng Bukeng ea 'Nete. Ha ho le ea mong ea emeng le 'na ntoeng ena, haese Mikaele, khosana ea heno.
