Toro ea bobeli ea Nebukadenesare
1Khosi Nebukadenesare a rōmela molaetsa ho batho ba lichaba tsohle, le ba merabe eohle, le ba lipuo tsohle ba ahileng lefatšeng lohle, a re:
“Khotso e ke e le atele!
2“Ke bone ho le molemo hore ke le tsebise lipontšo le limakatso tseo Molimo ea holimo-limo a nketselitseng tsona.
3“Lipontšo tsa hae
ke tse kholo hakaakang!
Limakatso tsa hae
li hlolla hakaakang!
'Muso oa hae
ke oa mehla le mehla,
puso ea hae
e akaretsa melōko eohle!
4“ 'Na Nebukadenesare, ke ne ke le ha ka, ke phomotse, ke le ka tlung ea ka ea bokhosi, ke iketlile. 5Eaba ke lora toro e ileng ea ntšosa. Ha ke robetse liphateng tsa ka ke ne ke tšoenngoa haholo ke menahano ea ka le ke lipono tseo ke neng ke li bona. 6Ka baka leo, ka etsa taelo e reng ke bitsetsoe bahlalefi bohle ba Babilona hore ba tl'o ntlhalosetsa toro ena. 7Eaba ho tla linohe, le balepi ba linaleli, le Bakalatiea, le balupi, 'me ka ba phetela toro ena; feela ba sitoa ho ntlhalosetsa eona. 8Qetellong Daniele o ile a tla ho 'na. Lebitso la hae ke Beleteshasare, hobane, o reeletsoe molimo oa ka, o bile o na le moea oa melimo e halalelang ka ho eena. Ke ile ka mo phetela toro ea ka, ka re:
9“Uena Beleteshasare, mookameli oa linohe, ke tseba hore moea oa melimo e halalelang o ka ho uena, 'me ha ho sephiri se ka u sitang. Toro ea ka ke ena; ak'u ntlhalosetse eona.
10“Ha ke ntse ke robetse liphateng tsa ka ke ile ka bona lipono tsena: Ka talima, 'me ka bona sefate se metse bohareng ba lefatše, se le selelele haholo. 11Sefate sena sa 'na sa hōla, sa matlafala, sa ea fihla marung, sa bonahala lipheletsong tsohle tsa lefatše. 12Mahlaku a sona a ne a khahleha, se behile haholo, 'me litholoana tsa sona li lekane ho jeoa ke bohle. Libatana tsa naha li ne li itšireletsa moriting oa sona, le linonyana tse fōfang li hahetse makaleng a sona, le libōpuoa tsohle li phela ka sona.
13“Ha ke ntse ke robetse liphateng tsa ka, ke ile ka bona leqosa le halalelang le theoha leholimong. 14La hōoeletsa, la re:
“ ‘Remang sefate,
makal'a sona le a khethule,
mahlaku le a hlōhlōre,
tholoana le li hasanye;
batana li balehe moriting oa sona,
nonyana li falle makaleng a sona.
15Kutu le metso ea eona
le li siee mobung,
ka mahlahlela a tšepe,
le ka mahlaahlela a lethose,
le e tlamelle joanng bo botalana.
Motho enoa a laloe
ke phōka ea leholimo,
a je joang ba naha
a le har'a libatana.
16Pelo ea hae ea botho e fetohe,
e fetohe e be ea phoofolo,
lemo tse supileng li fete a le joalo.
17“ ‘Qeto ena e phatlalalitsoe,
ea phatlalatsoa ke maqōsa,
kahlōlo ea etsoa ka ba halalelang,
e le hore batho bohle
ba tle ba tsebe:
Ea Holimo-limo
o laola 'muso oa batho,
o o nea ofe le ofe
ea ratoang ke eena,
kapa a hlomamise mofo
setulong sa khosi.’
18“Ena ke toro eo 'na khosi Nebukadenesare, ke ileng ka e lora. Joale uena Beleteshasare, ntlhalosetse eona, hobane bahlalefi bohle ba 'muso oa ka ba hlōtsoe ho ntlhalosetsa eona. Empa uena u ka etsa joalo, hobane moea oa melimo e halalelang o teng ka ho uena.”
Daniele o hlalosa toro
19Daniele, ea neng a bitsoa Beleteshasare, a qeta nakoana a tsielehile haholo, a tšoenyehile. Khosi ea re ho eena: “Beleteshasare, u se ke ua tšoenngoa ke toro ena, kapa ke tlhaloso ea eona.”
Beletshasare a araba, a re: “Moren'a ka, eka toro ena e ka be e tobile ba u hloileng, le tlhaloso ea eona e tobile lira tsa hao! 20U bone sefate se ntse se hōla, se matlafala, se bile se fihla marung, se bonahala lefatšeng lohle. 21Mahlaku a sona a ne a khahleha, se behile haholo, 'me litholoana tsa sona li lekane ho jeoa ke bohle; libatana tsa naha li ema moriting oa sona, le linonyana tse fōfang li hahetse makaleng a sona.
22“Oho, khosi, sefate seo ke uena! U ile ua hōla, ua matlafala. Boholo ba hao bo hōlile hoo bo fihlang marung, le puso ea hao e fihla lipheletsong tsa lefatše. 23Khosi e ile ea bona leqōsa le halalelang le theoha leholimong, le re: ‘Remang sefate, le se felise, empa le siee kutu le metso ea sona mobung, kutu eo le e tlamelle joanng bo botalana ka mahlaahlela a tšepe le a lethose. Motho enoa a laloe ka phōka ea leholimo, a phele le libatana tsa naha, ho fihlela ho feta lilemo tse supileng.’
24“Oho, uena khosi ea ka, tlhaloso ea toro ke ena, 'me ke taelo eo Ea Holimo-limo a e etselitseng moren'a ka, khosi. 25U tla lelekoa har'a batho, u e'o phela le libatana tsa naha; u tla ja joang joaloka likhomo, u laloe ke phōka ea leholimo. Lilemo tse supileng li tla feta ho fihlela u tseba hore Ea Holimo-limo ke eena ea laolang 'muso oa batho, 'me o o nea ofe le ofe eo a mo ratang. 26Joalokaha ho laetsoe hore kutu ea sefate e siuoe le metso ea eona, u tla buseletsoa 'muso oa hao ho tloha mohla u tsebang hore Leholimo ke lona le busang. 27Ka baka leo, uena khosi, ak'u amohele keletso ea ka, u furalle libe tsa hao ka ho etsa ho lokileng, le bokhopo ba hao ka ho hauhela mafutsana; mohlomong u ka phela halelele ka boiketlo.”
Toro ea phethahala
28Tsena tsohle li ile tsa hlahela khosi Nebukadenesare. 29Hoba likhoeli tse leshome le metso e 'meli li fete, ha Nebukadenesare a ntse a tsamaea holim'a ntlo ea bokhosi ea Babilona, 30a bua, a re: “Na ee hase eona Babilona e kholo, eo ke e hahileng ka matla a ka a maholo, e le ntlo ea bokhosi le tlōtla ea botlotlehi ba ka?”
31Eare khosi e e-s'o qete ho rialo, lentsoe la tsoa leholimong, a re: “Uena khosi Nebukadenesare, polelo ena e tobile uena: U amohiloe 'muso oa hao. 32U tla lelekoa har'a batho, u e'o phela le libatana tsa naha. U tla ja joang le likhomo. Lilemo tse supileng li tla feta ho fihlela u tseba hore Ea Holimo-limo ke eena ea laolang 'muso oa batho, 'me o o nea ofe le ofe eo a mo ratang.”
33Ka eona nako eo, se neng se boleletsoe Nebukadenesare sa phethahala, a lelekoa har'a batho, a ja joang joaloka likhomo, 'mele oa hae oa laloa ke phōka ea leholimo, ho fihlela mohoètè oa hae o hōla joaloka masiba a ntsu, le manala a hae a e-ba joaloka linala tsa nonyana.
Nebukadenesare o rorisa Molimo
34“Ha nako e baliloeng e se e fetile, 'na Nebukadenesare, ke ile ka lelaletsa mahlo a ka leholimong, kelello ea ka ea botho ea khutla, eaba ke roka Ea Holimo-limo, kea mo rorisa, ke tlotlisa eena ea phelang kamehla eohle:
“Puso ea hae
e hlola kamehla eohle,
'muso oa hae
o akaretsa melōko eohle!
35Baahi bohle ba lefatše hase letho;
o etsa thato ea hae
ka mabōtho a leholimo,
le ho baahi ba lefatše o etsa joalo.
Ha ho ea ka thibelang tsoho la hae,
kapa a re ho eena: ‘U etsa'ng joale?’
36“Ka eona nako eo, kelello ea ka ea botho ea khutla, 'me boitlhompho ba ka le bokhabane ba ka ba boela ho 'na hore puso ea ka e boele e tlōtlehe. Baeletsi ba ka le mahosana a ka a mpatla, ka busetsoa tulong sa ka sa bokhosi, 'me ka tlōtleha le ho feta pele.
37“Joale 'na Nebukadenesare, ke rorisa Khosi ea Leholimo, kea e phafa, kea e tlotlisa, hobane mesebetsi eohle ea eona e nepahetse, le litsela tsa eona li lokile, 'me ba ikhōhōmōsang ea ba kokobetsa.”
