Daniele o rapella sechaba sa habo
1Ka selemo sa pele sa puso ea Dariuse, mora oa Ahashuerushe, oa morabe oa Bamede, ea ileng a etsoa khosi ea naha ea Bakalatiea, 2'na Daniele ka ithuta Mangolong a Halalelang, ka tseba hore ho ea ka lentsoe la Morena, le neng le fihle ho moporofeta Jeremia, ho tla feta lilemo tse mashome a supileng Jerusalema e ntse e le lesupi. 3Eaba ke talima ho Morena Molimo, ke ipiletsa ho eena ka thapelo, le ka likōpo, le ka ho itima lijo, le ka ho apara tse mahoashe, le ka ho itšèla ka molora.
4Ka rapela Morena Molimo oa ka, ka etsa boipolelo bona, ka re: “Oho, Morena, uena Molimo e moholo, ea tšabehang, u baballa selekane sa hao sa lerato ka botšepehi ho ba u ratang, ba bolokang melao ea hao. 5Re entse sebe, ra etsa tse khopo le tse mpe. Re u fetohetse, ra kheloha melao ea hao le litaelo tsa hao. 6Ha rea ka ra mamela bahlanka ba hao, baporofeta, ba buileng ka lebitso la hao ho likhosi tsa rōna, le ho mahosana a rōna, le ho bo-ntat'a rōna, le ho sechaba sohle sa naha ena.
7“Oho, Morena, u lokile, empa rōna re hlajoa ke lihlong kajeno, rōna banna ba Juda, le baahi ba Jerusalema, le Baiseraele bohle ba haufi le ba hōle, ba linaheng tsohle tseo u ba qhalanyelitseng ho tsona ka baka la ho u hlokela botšepehi. 8Oho, Morena, rōna le likhosi tsa rōna, le mahosana a rōna, le bo-ntat'a rōna, re hlajoa ke lihlong, hobane re entse sebe. 9Morena Molimo oa rōna eena o mohau, oa tšoarela, leha rōna re mo fetohetse. 10Ha rea ka ra mamela lentsoe la Morena Molimo oa rōna, ra tsamaea ka melao ea hae, eo a re beetseng eona ka bahlanka ba hae, baporofeta. 11Baiseraele bohle ba tlōtse molao oa hao, ba o kheloha, ba se ke ba u mamela.
“Ka baka leo, lithōhako le likahlōlo tse hlapanyelitsoeng, tse ngotsoeng Molaong oa Moshe, mohlanka oa Molimo, li re oetse holimo, hobane re u sitetsoe. 12U phethahalitse lipolelo tsa hao, tseo u neng u li bue ho rōna le ho babusi ba rōna, ka ho re lihela koluoa ena e tšabehang. Lefatšeng lohle ha ho e-s'o ka ho etsoa se kang sena se entsoeng mona Jerusalema. 13Joalokaha ho ngotsoe Molaong oa Moshe, koluoa ena eohle e re oetse holimo. Empa le joale ha re e-s'o ka re rapela Morena Molimo oa rōna ka ho furalla bokhopo ba rōna, le ka ho latela 'nete ea hae. 14Ka baka leo, Morena o 'nile a thisisa koluoa ena, empa joale o e lihetse holim'a rōna. Morena Molimo oa rōna o etsa tsohle ka ho loka, empa rōna ha rea ka ra mamela lentsoe la hae.
15“Joale, Morena Molimo oa rōna, uena ea neng a ntše sechaba sa hao naheng ea Egepeta ka letsoho la hao le matla, 'me ua tumisa lebitso la hao ho fihlela kajeno, re entse sebe, re entse bokhopo. 16Oho, Morena, ka ho ea ka ho loka hohle ha hao, kea u rapela: Bohale ba hao le khalefo ea hao a li ke li faposoe motse oa hao oa Jerusalema, thaba ea hao e halalelang. Ka baka la libe tsa rōna le makhopo a bo-ntat'a rōna, Jerusalema 'moho le sechaba sa hao, e fetohile sesomo ho bohle ba re pota-potileng.
17“Joale, ka lebaka la hao, uena Molimo oa rōna, ak'u mamele lithapelo le lithapeli tsa mohlanka oa hao, u hauhele Sehalalelo sena sa hao se senyehileng. 18Oho, Molimo oa ka, ak'u sekèhè tsebe, u mamele; ak'u talime, u bone tšenyeho ea rōna le ea motse ona o bitsoang ka lebitso la hao. Lithapelo tsa rōna ha re li lebise ho uena hobane re lokile, empa ke ka baka la ho tšepa mohau oa hao o moholo. 19Oho, Morena, ak'u re mamele! Oho, Morena, ak'u re tšoarele! Oho, Morena, ak'u re utloe, 'me u phethe joalo! Ka baka la hao feela, uena Molimo oa ka, u se ke ua lieha, hobane motse oa hao o bitsoa ka lebitso la hao, le sechaba sa hao se bitsoa ka lebitso la hao.”
Gabariele o hlalosa boporofeta
20Ka 'na ka bua joalo, ka rapela, ka ipolela sebe sa ka le sa sechaba sa heso sa Iseraele, 'me ka lebisa thapeli ea ka ho Morena Molimo oa ka, ka baka la thaba e halalelang ea Molimo oa ka. 21Ha ke ntse ke rapela joalo, Gabariele, monna eo ke neng ke 'mone ponong ea ka ea pele, a tla ho 'na ka nako ea sehlabelo sa mantsiboea, a potlakile. 22A bua le 'na, a ntlhalosetsa, a re: “Daniele, joale ke tlile ho uena ho tla u nea tsebo le kutloisiso. 23Hang-hang ha u qala ho rapela, ke ile ka neoa taelo; joale ke tlil'o u tsebisa eona, hobane u ea ratoang haholo. Ka baka leo, mamelisisa, 'me u utloisise pono ena.
24“Lemo tse mashome a supileng,
a supileng hasupa,
li baletsoe chaba sa heno
le motse o halalelang,
hore litšito tsohle li tle li felisoe,
libe le tsona le ke le li felise,
ho etsoe poelano
bakeng sa ho etsa bokhopo,
ho loka ha kamehla
ho tle ho be teng,
ho phethahatsoe lipono,
le bona boporofeta,
Ea Halalelang haholo
le eena a tlotsoe.
25“Ka baka lena tseba, u utloisise:
Ho tloha mohla
ho phatlalatsoang taelo,
taelo ea hore Jerusalema e tsosoe,
ho fihlela ha 'musi a fihla,
'musi ea tlotsitsoeng,
lemo tse supileng hasupa li tla feta.
Jerusalema e tla tsosoa, e hahoe,
ho betloe literata
le marako a tsosoe;
e tsitse lilemo,
lemo tse mashome a tšeletseng
a metso e 'meli hasupa,
empa mehla ena
e tla b'e le ea litsietsi!
26Hoba ho fete lilemo,
lemo tse mashome a tšeletseng
a metso e 'meli hasupa,
motlotsuoa oa Molimo
o tla bolaoa a se molato.
Mabōtho a khosana e 'ngoe
e tlang ho tla,
a tla timetsa motse
le Sehalalelo sa oona.
Pheletso ea tsena e tla tla sa morallo,
ntoa e hlabane ho fihlela e ba e lala,
nanaola e reriloeng ke Molimo
eona e sale.
27Khosana e tla etsa selekane,
e se etse le ba bangata,
selekane seo e be sa lilemo li supile;
bohareng ba nako ena ea selekane,
e tla felisa mahlabelo,
e felise le linyehelo.
khosana ena e bakileng nanaola
e tla bea Manyala
holim'a tlhōrō ea Tempele,
ho fihlela pheletso
e reriloeng ke Molimo e fihla,
e oela holim'a ea beileng Manyala,
a a bea holim'a tlhōrō.”
