LIPOLELO 18

₁“Baprista, e leng Balevi, ke hore ba morabe oohle oa Levi, ha ba na ho ba le seabo lefeng la Iseraele; ba tla ja linyehelo tsa lijo le limpho, le liabo tse etsetsoang Morena. ₂Balevi ha ba na ho ba le lefa joaloka bana babo bona. Morena ke eena lefa la bona, joalokaha a buile ho uena.

₃“Tsena e tla ba liabo tsa baprista tse tsoang ho sechaba, tse tsoang ho ba etsang linyehelo tsa secheso; e ka ba pholo kapa nku, ba tla nea moprista sephaka, le litlhaha, le moholu. ₄U mo nee le lilopotsiea tsa lijo tsa hao, le tsa veine, le tsa ole, le tsa boea ba linku tsa hao tse kutoang pele, ₅hobane Morena Molimo oa hao, o mo khethile har'a merabe eohle, hore a sebeletse ka lebitso la Morena kamehla eohle, eena le bara ba hae.

₆“Ha Molevi ea tsoang motseng ofe kapa ofe oa naha eohle ea Iseraele, moo a jakileng teng, a lakatsa ka moea oa hae oohle ho tla sebakeng seo Morena a tla se khetha, ₇o tla sebeletsa ka lebitso la Morena Molimo oa hae, joaloka bana babo ba Balevi, ba emeng moo, kapele ho Morena. ₈O tla ja seabo se tšoanang le sa baprista ba bang, kaholimo ho hoo a ho fumanang ka ho rekisa lintho tsa hae.”

₉“Ha u fihla naheng eo Morena Molimo oa hao, a u neang eona, u se ke ua ithuta ho etsa manyala a tšoanang le a etsoang ke lichaba tseo. ₁₀Har'a lōna ho se fumanoe le ea mong ea fetisang mora oa hae kapa morali oa hae har'a mollo, ea sebelisang bonohe; eo e leng molepi oa linako, kapa senohe, kapa moloi, ₁₁kapa ea sebelisang lithatho, kapa ea buang le balimo, kapa moloi, kapa lethuela. ₁₂Bohle ba etsang lintho tsena ke manyala ho Morena, 'me ka baka la manyala ana Morena Molimo oa hao, o ba leleka kapele ho eena. ₁₃Uena u tšepahale ka ho tlala ho Morena Molimo oa hao.”

₁₄“Leha lichaba tsena tseo u tla li hapa li kholoa balepi ba linako, le linohe, empa ha e le uena, Morena Molimo oa hao, ha a u lumelle ho etsa joalo. ₁₅Morena Molimo oa hao, o tla hlahisa Moporofeta ea kang 'na har'a bana babo lōna; le tle le mo mamele. ₁₆Sena ke seo le neng le se kōpe ho Morena Molimo oa lōna, ha le le thabeng ea Horebe, mohl'a letsatsi leo sechaba se neng se phuthehile ka lona, la re: ‘A re se hlole re utloa lentsoe la Morena Molimo oa rōna, hape; le mollo o moholo ona re se hlole re o bona hape, re tle re se ke ra shoa.’

₁₇“Morena o ne a re ho 'na: ‘Ba buile hantle. ₁₈Ke tla ba hlahisetsa Moporofeta ea kang uena har'a bana babo bona; ke tla mo ruta hore na a tle a re'ng, 'me o tla ba bolella tsohle tseo ke tla mo laela tsona. ₁₉Motho ea sa tl'o mamela mantsoe a ka, ao Moporofeta eo a tla a bua ka lebitso la ka, o tla ikarabella ho 'na. ₂₀Empa moporofeta ea tla re o bua ka lebitso la ka, feela a bua seo ke sa mo laelang hore a se bue; kapa ea tla bua ka lebitso la melimo e meng, moporofeta eo o tla shoa.’

₂₁“Mohlomong le ka 'na la re ka lipelong tsa lōna: ‘Lipolelo tseo Morena a sa kang a li bua re tla li tseba joang?’ ₂₂Ha moporofeta a bua ka lebitso la Morena, empa ntho eo a e buang e sa etsahale, e sa phethahale, ntho eo ke e sa buuoang ke Morena. Moporofeta eo o e buile ka boikakaso; le se ke la mo tšaba.”