Tefelo ea sebe sa polao
1“Haeba ho fumanoa setōpō sa motho ea bolailoeng se rapaletse har'a naha eo Morena Molimo oa hao, a u neang eona hore e be ea hao, 'me ho sa tsejoe hore na motho eo o bolailoe ke mang; 2baholo ba sechaba sa heno, le baahlōli ba heno ba tla tla, ba lekanye bolelele ba sebaka ho tloha setōpōng, ho ea fihla metseng e se pota-potileng. 3Ha ho fumanehile hore na motse o haufi le setōpō ke ofe, baholo ba motse oo ba tla nka khomo ea sethole har'a mohlape. Sethole seo e be se e-s'o ka se thapisoa, se e-s'o ka se panoa. 4Baholo ba motse oo ba tla theolela sethole seo ka khohlong e nang le metsi a phallang, e e-s'o ka e lengoa, kapa e e-s'o ka e jaloa; ebe ba se robela molala kamoo ka khohlong. 5Baprista, e leng bara ba Levi, ba tla atamela, hobane bona ba khethiloe ke Morena Molimo oa hao, hore ba mo sebeletse, 'me ba hlohonolofatse ka lebitso la Morena. Khang efe kapa efe, le kotsi efe kapa efe, e tla ahlōloa ho ea ka qeto ea bona. 6Baholo bohle ba motse oo, o haufi le setōpō sa motho ea bolailoeng, ba tla hlapela matsoho a bona holim'a sethole seo molala oa sona o ileng oa robeloa ka khohlong. 7Ba tla re: ‘Hase matsoho a rōna a tšolotseng mali ana, le mahlo a rōna ha aa ka a bona tšollo ena ea mali. 8Oho, Morena, ak'u tšoarele sechaba sa hao sa Iseraele, seo u se lopolotseng. U se ke ua jarisa sechaba sa hao sa Iseraele molato oa ho tšolla mali a se nang molato.’ Ba tla tšoareloa molato oa ho tšolla mali. 9U tla tlosa mali ao a se nang molato, a tšolotsoeng, har'a lōna, ha u etsa se nepahetseng mahlong a Morena.”
Ha ho nyaloa mothōpuoa
10“Ha u e-ea ntoeng, u futuhela lira tsa hao, Morena a neelana ka tsona matsohong a hao, u li etsa bathōpuoa, 11'me har'a bathōpuoa u bona mosali e motle, u utloa u mo rata, 'me u lakatsa ho mo nyala, 12u tla mo tlisa ka tlung ea hao. O tla beola hlooho ea hae, a sètè le manala a hae. 13O tla hlobola liaparo tseo a thōpiloeng a li apere, a lule ka tlung ea hao khoeli e tletseng a ntse a llela ntat'ae le 'm'ae. Kamora' moo u tla kena likobong tsa hae, u be monna oa hae, eena e be mosali oa hao. 14Empa haeba u se u sa mo rate, u tla mo lokolla, a ikele moo a ratang. Feela ho hang u se ke ua mo rekisa hore u fumane chelete. U se ke ua mo etsa joalokaha eka ke lekhoba, hobane u ile ua mo nyala ka ho mo qobella.”
Litokelo tsa mora oa matsibolo
15“Ha monna a nyetse basali ba babeli, e mong e le thatohatsi, e mong e le ea hloiloeng, ba mo tsoaletse bana, 'me mora oa matsibolo e le oa ea hloiloeng, 16mohla monna eo a arōlelang bara ba hae lefa la tseo a nang le tsona, a se ke a re mora oa matsibolo ke oa mosali oa thatohatsi, empa mora oa mosali ea hloiloeng e le eena oa matsibolo. 17O tla ananela mora oa matsibolo, oa mosali ea hloiloeng, a be a mo nee liabo tse peli tsa lintho tsohle tseo a nang le tsona, hobane ke mora oa hae oa matsoathaka, 'me litokelo tsa mora oa matsibolo ke tsa hae.”
Mora ea manganga
18“Ha monna a e-na le mora ea manganga, ea sa utloeng litaelo, ea sa mameleng ntat'ae, kapa ea sa mameleng 'm'ae ere leha ba mo khalemela a sa ba mamele, 19ntat'ae le 'm'ae ba tla mo tšoara, ba mo tlise ho baholo ba motse, khorong ea motse oa habo. 20Ba re ho baholo ba motse: ‘Mora enoa oa rōna o manganga, ha a utloe litaelo, ha a re mamele. Ke monyollo le letahoa.’ 21Banna bohle ba motse ba tla mo tlepetsa ka majoe, a be a shoe. Kahoo u tla tlosa bokhopo ho uena, 'me Baiseraele bohle ba tla utloa, 'me ba tšabe.”
Setōpō sa senokoane
22“Ha monna a lokeloa ke lefu ka baka la molato oa hae, 'me a bolaoa, setōpō sa hae sa leketlisoe sefateng; 23setōpō seo sa hae se se ke sa qeta bosiu se ntse se leketlisitsoe sefateng. Se hle se epeloe ka lona letsatsi leo, hobane ea leketlisitsoeng sefateng o rōhakiloe ke Molimo. U se ke ua silafatsa naha ea heno, eo Morena Molimo oa hao, a u neang eona hore e be lefa la hao.”
