Ho hlaloa le ho nyaloa hape
1“Ha monna a nka mosali, 'me a mo nyala, eba hamorao o utloa a se a sa mo rate, hobane a fumane ho hong hoo a sa ho rateng ho eena, o tla mo ngolla lengolo la tlhalo, a mo nee lona letsohong la hae, ebe o mo leleka lapeng ha hae. 2Mosali eo o tla tsoa lapeng la monna eo, 'me a ka nyaloa ke monna e mong. 3Haeba monna oa bobeli le eena a se a sa mo rate, eba o mo ngolla lengolo la tlhalo, o mo nea lona letsohong la hae, o mo leleka lapeng ha hae; kapa haeba monna oa bobeli ea ileng a mo nyala a e-shoa; 4monna eane oa hae oa pele, ea ileng a mo leleka, ha a tšoanele ho mo nka hape, a mo nyala, hoba mosali eo o se a silafetse, hobane hoo ke manyala kapele ho Morena. U se ke ua tlisa sebe naheng eo Morena Molimo oa hao, a u neang eona hore e be lefa la hao.
Melao ea mefuta-futa
5“Ha monna a qeta ho nyala, a se ke a tsoa le bahlabani ha ba futuha; hape a se ke a laeloa ho etsa mosebetsi ofe kapa ofe. O tla lokolloa hore a qete selemo a le lapeng la hae, a ithabise le mosali oa hae, eo a tsoa mo nyala.
6“Ho se be ea ka reng motho a bee leloala la hae, kapa tšilo ea hae paneng, hobane hoo ke hore motho a bee paneng ntho e mo phelisang.
7“Ha motho a fumanoa a utsoa e mong oa bana babo, eo e leng oa bana ba Iseraele, a mo etsa lekhoba, kapa a mo rekisa, lesholu leo le tla bolaoa, 'me ebe u felisa joalo bokhopo har'a lōna.
8“Elang lefu la lepera hloko; le hlokomele ho etsa tsohle ho ea kamoo baprista, e leng Balevi, ba tla le ruta kateng. Ho ea kamoo ke ba laetseng kateng, le hlokomele ho etsa joalo. 9Hopolang seo Morena Molimo oa lōna, a neng a se etse ho Meriama, tseleng, ha le ne le e-tsoa naheng ea Egepeta.
10“Ha u alima oa heno ntho efe kapa efe, u se ke ua kena ka tlung ea hae, ho ea lata seo a se beileng paneng. 11U eme kantle, 'me motho eo u mo alimileng ho hong a u tlisetse seo a se beang paneng u le kantle. 12Haeba e le mofutsana, ntho eo a e beang paneng e se ke ea qeta bosiu ho uena. 13Ruri ha letsatsi le likela, u e khutlisetse ho eena, hore a tle a robale ka kobo ea hae, 'me a u hlohonolofatse. Ho uena e tla ba u entse toka kapele ho Morena Molimo oa hao.
14“U se ke ua hatella mohlanka oa hao ea futsanehileng, ea hlokang; e ka ba ngoan'eno, kapa e mong oa bajaki ba phelang motseng oa heno. 15U mo nee moputso oa hae oa letsatsi ka leng; letsatsi le se ke la likela a e-s'o o fumane, hobane ke mofutsana, 'me o lebeletse moputso oo, e le hore a se ke a ipiletsa ho Morena ka baka la hao, 'me ebe u entse sebe.
16“Bo-ntat'a ba ke ke ba bolaoa ka baka la bana ba bona; le bana ba ke ke ba bolaoa ka baka la bo-ntat'a bona. Motho e mong le e mong o tla bolaeloa sebe sa hae.
17“U se ke ua sotha kahlōlo ea molichaba kapa ea khutsana, 'me u se ka ua nka seaparo sa mohlolohali hore se beoe paneng. 18U mpe u hopole hore u ne u le lekhoba naheng ea Egepeta, 'me Morena Molimo oa hao, a u lopolla teng. Ke ka baka lena ke u laelang ho etsa ntho ena.
19“Ha u hèla koro ea hao tšimong ea hao, eba u lebala ngata har'a tšimo, u se ke ua khutlela hape ho ea e lata. E tla ba ea mojaki, kapa ea khutsana, kapa ea mohlolohali, e le hore Morena Molimo oa hao, a tle a u hlohonolofatse mosebetsing oohle oo u o etsang.
20“Ha u hlōhlōra litholoana tsa sefate sa mohloaare, u se ke ua boela ua se pheta khetlo la bobeli. Tse setseng e tla ba tsa mojaki, kapa tsa khutsana, kapa tsa mohlolohali.
21“Ha u e-kha morara serapeng sa hao sa morara, u se ke ua boela ua khoahlapisa. O setseng e tla ba oa mojaki, kapa oa khutsana, kapa oa mohlolohali. 22U 'ne u hopole hore u ne u le lekhoba naheng ea Egepeta, 'me ke ka baka lena ke u laelang ho etsa ntho ena.
